Խորհրդային Միութիւնում ստեղծուած պայթիւնալից իրավիճակը եւ այն «վնասազերծելու» հակաժողովրդավարական միջոցների արդէն իսկ առկայ հետեւանքները իրենց ազդեցութիւնն են թողնում Հայաստանի Հանրապետութեան քաղաքական, տնտեսական, բարոյա-հոգեբանական կեանքի վրա:
Ամբողջատիրութեան վերադարձի յոյսերով օրօրուող քաղաքական որոշ ուժեր եւ առանձին խմբաւորումներ աշխուժացրել են հակազգային գործունէութիւնը, վարձուած միջոցներով վտանգաւոր դաւեր նիւթելով խոչընդոտում են հանրապետութիւնում իրավիճակը շտկելու ձեռնարկումներին, արցախահայութեանը օգնելու ճիգերին, թոյլ չեն տալիս կայունացնել հանրապետութեան ներքին կեանքը այն դէպքում, երբ դեռեւս շարունակւում է աղէտի գօտու բնակչութեան եւ գաղթականների անմխիթար վիճակն ու հանրապետութեան տնտեսական ճգնաժամը։
Հետապնդելով հեռուն գնացող քաղաքական նպատակներ, փորձեր են արւում ստեղծելու օրինական իշխանութիւններին փոխարինող ինչ-որ ճակատ՝ խտրութիւն չդնելով ուժեր հաւաքագրելու միջոցների մէջ։
Այս հաստատումներից մեկնելով Հ.Յ.Դ. Հայաստանի Կենտրոնական Կոմիտէն յայտարարում է, որ՝ Հանրապետութեան քաղաքական, ընկերային, տնտեսական կեանքի ապակայունացման իւրաքանչիւր փորձ յղի է ազգակործան բախումների վտանգով եւ այլ բան չէ, եթէ ոչ դաւաճանութիւն հայ ժողովրդի ազատագրական պայքարին, նրա վեհ տեսլականին։
Հայ Յեղափոխական Դաշնակցութիւնը միաւորուելու կոչ է անում ազգային-ազատագրական պայքարին զինուորագրուած քաղաքական բոլոր ուժերին, հասարակական կազմակերպութիւններին, հանրապետութեան ողջ բնակչութեանը՝ կանխելու ուրուագծուող վտանգը եւ տէր կանգնելու անկախութեան մեր գործընթացին, կշռադատուած քայլերով այն հասցնելու յաղթական աւարտին։
ՀԱՅ ՅԵՂԱՓՈԽԱԿԱՆ ԴԱՇՆԱԿՑՈՒԹԵԱՆ
ՀԱՅԱՍՏԱՆԻ ԿԵՆՏՐՈՆԱԿԱՆ ԿՈՄԻՏԷ
23 Յունուար 1991
