Արցախին մահացու վտանգ է սպառնում։ Հակառակորդի ձեռքերն ազատ են, եւ նա պատրաստ է ամէն քայլի՝ մի քանի հազար տարիների հայկական օճախը ոչնչացնելու համար, ինչպէս Արեւմտեան Հայաստանում, Նախիջեւանում, Գանձակում։
Մեր ժողովրդի նկատմամբ երեք տարի շարունակուող սադրանքները չբաւարարեցին բարբարոսների եւ նրանց հովանաւորների արնատենչութիւնը։ Արցախը շրջապատուած է Ադրբեջանի զօրքերով եւ ճակատագրական օրեր է ապրում։ Արցախն օգնութեան է կանչում իր արիւնակից եղբայրներին։
Հայ Յեղափոխական Դաշնակցութիւնը ջանք չի խնայի՝ իր ամբողջ կարելիութիւնները տրամադրելով Արցախի հայութեան իրաւունքների պաշտպանութեանեւ Հայրենիքի պատիւն ու սահմանները պաշտպանելու գործին, ուստի Ձեզ կոչ է անում.
-Անյապաղ դադարեցնել ներքին հակամարտութիւնները եւ համախմբել բոլոր ջանքերը՝ յանուն մեր սրբազան հողերի պաշտպանութեան,
-Ազգային զինուած ջոկատները հայրենի իշխանութեան ղեկավարութեամբ մղել գործելու Արցախի եւ սահմանամերձ շրջանների պաշտպանութեան ուղղութեամբ,
-Ամէն կերպ կանխել Հանրապետութիւնում քաղաքական եւ հասարակական իրադրութիւնն ապակայունացնելու փորձերը,
-Ապահովել Արցախի տնտեսական անկախութինը եւ նրա ղեկավարութեան ինքնուրոյնութիւնը,
-Ճեղքել Հայաստանի ինֆորմացիոն շրջափակումը,
-Ապահովել Հայաստանի ելքը միջազգային քաղաքական թատերաբեմ եւ Արցախի խնդիրը արծարծել միջազգային ատեաններում։
Մեր ժողովուրդը պէտք է յաղթի, քանի որ օժտուած է ինքնակազմակերպման, կարգապահութեան, ազգային իդէալներին նուիրուելու, անձնազոհութեան բնատուր յատկութիւններով։
ՀԱՅ ՅԵՂԱՓՈԽԱԿԱՆ ԴԱՇՆԱԿՑՈՒԹԵԱՆ
ՀԱՅԱՍՏԱՆԻ ՊԱՏԱՍԽԱՆԱՏՈՒ ՄԱՐՄԻՆ
5 Սեպտեմբերի 1990 թ. ք. Երեւան