[1]ԻՌՆԱ-ի համաձայն՝ Իսլ. խորհրդարանում կրօնական համայնքների պատգամաւորները ընդառաջելով հանր. նախագահ դոկտ. Հասան Ռոհանիի արտայայտութիւնները եւ դիրքորոշումները՝ կրօնական փոքրամասնութիւնների նկատմամբ առաւել ուշադրութիւն դարձնելու կապակցութեամբ, ընդգծեցին, որ Իրանը իրենց հայրենիքը լինելով՝ կրօնական փոքրամասնութիւնների փորձագէտները չեն խնայելու իրենց ջանքը՝ երկրի առաւել վերելքի եւ զարգացման ի խնդիր:
Այս մասին Իսլ. խորհրդարանում Թեհրանի եւ հիւսիսային իրանահայութեան պատգամաւոր դոկտ. Կարէն Խանլարեանը ԻՌՆԱ-ին տւած հարցազրոյցում ընդգծելով, որ Իրանը բոլորի հայրենիքն է, աւելացրեց. «Կրօնական փոքրամասնութիւնների համար կարեւոր են Իրանի ազգային շահերը եւ կրօնական փոքրամասնութիւնների փորձագէտներն ու մասնագէտները չեն խնայելու իրենց ջանքը՝ երկրի շինարարութեան ու զարգացման գործընթացին նպաստելու համար»:
Դոկտ. Խանլարեանը նշեց, որ Իրանի Սահմանադրութեան մէջ յստակ կէտեր կան կրօնական փոքրամասնութիւնների իրաւունքների վերաբերեալ, որոնք եւ յարգւել են երկրի քաղաքական համակարգում:
Նա իրանահայութեան պատրաստակամութիւնն է յայտնել գործադիր ուժի մէջ առաւել դերակատարութիւն ստանձնելու համար եւ աւելացրել է «Կրօնական փոքրամասնութիւնների ներկայացուցիչները ներկայ են Օրէնսդիր մարմնում, սակայն պարագան նոյնը չէ Գործադիր իշխանութիւնում»:
Դոկտ. Խանլարեանը ընդգծեց, որ կրօնական փոքրամասնութիւնների մէջ կան այնպիսի ականաւոր մասնագէտներ, որոնցից ոմանք նոյնիսկ միջազգային բեմերում ճանաչւած գիտնականներ են եւ մասնագիտական ու դեռ աւելի բարձր մակարդակում նրանցից օգտւելը կարող է նպաստել Իրանի միջազգային դիրքի բարելաւմանը:
ԻՌՆԱ-ն նմանօրինակ հարցազրոյցներ է ունեցել խորհրդարանում կրօնական փոքրամասնութիւնների այլ պատգամաւորների հետ:
alikonline.ir
21/08/2013