[1]Արցախէն ու Հայաստանէն ձայներ կը լսուին՝ Քեսապ զինեալ ջոկատներ ուղարկելու մասին, դուրս հանելու համար զինեալները եւ ապահովելու համար քեսապցիներուն վերադարձը:
Որքա՛ն ալ անհաւանական՝ այս ձայները յուզիչ են ու պարզապէս կը մատնեն այն խոր յուզումն ու անհանգստութիւնը, զորս իւրաքանչիւր հայ, ո՛ւր ալ ապրի, կը զգայ իր ազգակիցներուն պարտադրուած դժխեմ ճակատագիրին պատճառով:
Մենք ի՞նչ կրնանք ընել…
– Ընդառաջել Հայ Դատի յանձնախումբի կոչերուն, ցուցմունքներուն: Երբ մեզմէ կը պահանջուի նամակներ գրել մեր բնակած շրջանը ներկայացնող Քոնկրեսի կամ Ծերակոյտի անդամներուն, ապա անպայմանօրէ՛ն արձագանգենք, գրենք մեր ինքնուրոյն նամակը: Եթէ դժուար է գրել, բառերը գտնել, ապա այցելենք Հայ Դատի յանձնախումբի կայքէջը. այնտեղ մեր գործը դիւրացնող բոլոր տուեալները ներկայացուած են: Չբաւականանալ նամակներով: Վերցնել հեռաձայնը եւ ուղղակի փոխանցել մեր պահանջները, մեր ընդվզումը պատահածին հանդէպ: Մեր ընդվզումը հասցնել մինչեւ Սպիտակ տուն, նախագահ Օպամային:
– Ընդառաջել ցոյցերու եւ հաւաքներու մասնակցելու կոչերուն, հրաւէրներուն: Մեր բողոքը արտայայտելու համար, վստահաբար, ձեռնարկներ պիտի կազմակերպուին: Ժամանակ պիտի չըլլայ լայն քարոզչութիւն կատարելու: Կազմակերպողները պիտի վստահին մեզմէ իւրաքանչիւրի նախաձեռնութեան եւ ինքնաբուխ մասնակցութեան: Մե՛նք տարածենք ձեռնարկներու լուրերը, հաւաքներուն մասնակցելու յորդորներով դիմենք մեր շրջապատին:
– Մեր նիւթական աջակցութիւնը բերենք դրամահաւաքի աշխատանքներուն:
– Արժանապատուութեան հարց դարձնենք դարաւոր թշնամիին ձեռագիրով իրագործուող մեր ժողովուրդի մէկ հատուածը տարագրելու ծրագիրին ձախողութիւնը:
Այլապէս՝ մեր զաւակները մեզ պիտի ծաղրեն ամէն անգամ, երբ բեմերէն յայտարարենք Ցեղասպանութիւնը կրկնել չտալու մեր յանձնառութիւնը:
ԱԲՕ ՊՈՂԻԿԵԱՆ
asbarez.com
25/03/201