Միացյալ Նահանգների չորս կոնգրեսական, որոնք տարիներ շարունակ Թուրքիային դատապարտող եւ Հայոց ցեղասպանության ճանաչման անհրաժեշտության մասին բարձրաձյանող հայտարարություններ են արել, ինչպես նաեւ տարբեր բանաձեւեր հեղինակել, այս անգամ Ապրիլի 24-ին իրենց դիրքորոշումն այլ կերպ են հայտնել. եկել են Հայաստան՝ հենց Ծիծեռնակաբերդում Ցեղասպանության զոհերի հիշատակը հարգելու համար:
Ներկայացուցիչների պալատի Արտաքին հարաբերությունների հանձնաժողովի նախագահ Էդ Ռոյսը հիշեցնում է Հիտլերի այն խոսքը, թե ո՞վ է հիշում հայերի բնաջջման մասին, եւ հավելում. “Մենք ենք հիշում եւ այստեղ ենք՝ ասելու համար, որ կանգնած ենք հայ ժողովրդի կողքին”:
“Եթե մենք անցյալին ճիշտ գնահատական չենք տալիս, ապագայի հետ կապված ճիշտ քայլեր չենք կարող ակնկալել: Այնպես որ, կարեւոր է, որ մենք անկեղծորեն խոսենք 1,5 միլիոն հայերի Ցեղասպանության մասին”,- լրագրողների հետ հանդիպմանը նշեց Ռոյսը:
Նույն հանձնաժողովի անդամներից Դեյվիդ Սիսլին հայտնեց, որ այստեղ է կոչ անելու Թուրքիային, որ ճանաչի պատմական փաստը, որպեսզի փոխհատուցման համար իրական բանակցություններ սկսվեն:
Ցեղասպանությունը ճանաչելու եւ հայերից ներողություն խնդրելու կոչին միացան նաեւ կոնգրեսականներ Լոյս Ֆրենկելը եւ Էլիոտ Էնջելը: ԱՄՆ-ից ժամանած պատվիրակությունն անդրադարձավ նաեւ Թուրքիայի՝ երեկ տարածած հայտարարությանը:
“Կարդացել եմ այդ հայտարարությունը, բայց ինձ համար կարեւորն այն է, որ մենք ընդունում ենք Օսմանյան Կայսրության տարիներին հայերի դեմ կատարվածի ողջ կարեւորությունը”,- նշեց Ռոյսը:
“Կարծում եմ՝ դա շատ կեղծավոր հայտարարություն էր, եւ Ցեղասպանության ժխտումն այլ տեսքով ներկայացնելու մեկ այլ փորձ: Սա նաեւ Ցեղասպանություն իրագործելու համար պատասխանատվությունից խուսափելու միջոց է: Ես դա առաջընթացի նշան չեմ համարում”,- ասաց ԱՄՆ Հայ Դատի հանձնախմբի ղեկավար Քեն Խաչիկյանը։