Tert.am-ի հետ զրույցում ԱԺ «Հայ Յեղափոխական Դաշնակցություն» խմբակցության ղեկավար Արմեն Ռուստամյանը, անդրադառնալով վարչապետ Հովիկ Աբրահամյանի՝ ԱԺ-Կառավարություն հարցուպատասխանի ժամանակ հնչեցրած հայտարարությանը, որ «կուտակային»-ի մասին նախագծում պարտադիր բաղադրիչի վերացման հարցում կան որոշակի պարտավորություններ «դրսի» հետ կապված, նկատեց, որ «դրսի կողմերը» խնդիր չունեն՝ Կառավարությունը փոխվե՞լ է, չի փոխվել, իրենք գործ ունեն Հայաստանի Հանրապետության հետ:
-Պարո՛ն Ռուստամյան, կա՞ն արդեն այն առաջարկությունները, որոնք պետք է ներկայացնեիք Կառավարությանը:
-Այս առաջարկությունները պատրաստում ենք քառյակի շրջանակներում: Եվ կախված նրանից, թե Կառավարությունն ինչպես կարձագանքի դրանց, կարձագանքենք: Հիմա այս փուլում ենք: Առաջարկությունները դեռ մշակվում են և ամենամոտ ժամանակներս կուղարկվեն Կառավարություն:
-«Կուտակային»-ի մասին նոր օրինագծի հետ կապված այս պահին ի՞նչ վիճակ է, և առաջարկների մասով 4 խմբակցությունների միջև կա՞ կոնսենսուս:
-Շատ հստակ է. եղել է Սահմանադրական դատարանի որոշում, ամեն մեկը փորձում է յուրովի մեկնաբանել: Մեր համոզմամբ, ըստ էության, Սահմանադրական դատարանն ասել է այն, ինչ մենք հայտարարում էինք, այն է, որ այս պարտադիր բաղադրիչի կիրառումը և այն գործընթացը, որ սկսվեց, բազմաթիվ խախտումներ է արձանագրում: Հիմա, մեր կարծիքով, դրա լավագույն լուծումը հենց հրաժարվելն է պարտադիր բաղադրիչից. կարող է կուտակայինը մնա, բայց դա պետք է մնա այնպես, որ մարդիկ շահագրգռվեն…
-Այո՛, ասել էիք, որ պայմանները գայթակղիչ լինեն: Հիմա, Կառավարության նախագծում «պարտադիր»-ի մասին ձևակերպում կա՞:
-Կառավարությունը փորձում է ինչ-որ լուծումներ գտնել՝ փաստացի, ըստ էության, հրաժարվել պարտադիրից, բայց վտանգը պահպանվում է, քանի որ դե յուրե այդ փոփոխությունները չեն ամրապնդվում, այս փոփոխությամբ պարտադիրը, փաստորեն, չի վերանում: Այսինքն՝ դե յուրե պահպանվում է, դե ֆակտո՝ նույն տրամաբանությունն են ուզում աշխատացնել, «բայց պարտադիրը կարող եք չմուծել»: Ինչպես օրինակ՝ ժամանակին Սահմանադրական դատարանն ասաց՝ «պարտադիրը մնում է, բայց քաղաքացիները պարտավոր չեն այդ պարտադիրով առաջնորդվել»: Հիմա դրա նման ինչ-որ անորոշություն պահպանված է, և բնական է, որ փորձում ենք այդ անորոշությունները վերացնել: Հիմա իրենք դա նկատի ունենալով՝ առաջ ընկան ու փոփոխությունների նախագիծն են բերել, որը մեզ չի գոհացնում, որովհետև չի լուծում կարևորագույն խնդիրներ: Եվ մենք պատրաստվում ենք դիմել իրենց մեր առաջարկներով:
-Հովիկ Աբրահամյանը, ԱԺ-ի հետ վերջին հարցուպատասխանի ժամանակ մեկ շաբաթ ժամանակ խնդրեց՝ ակնարկելով, որ դրսի հետ կապված հարցեր կան: Տեղյա՞կ եք, թե խոսքն ինչի մասին է:
-Մենք էդ հանդիպման ժամանակ էլ ենք դրա մասին լսել, երբ որ կառավարությունում՝ վարչապետի հրավերով հանդիպում ունեցանք: Եվ էդտեղից սկսվել է էդ հարցի հետ կապված որոշակի բանակցություններ: Եվ, դժբախտաբար, կարծում եմ, այդ հանդիպման արդյունքը լիովին չի արտահայտվում այն նախագծի մեջ, որը Կառավարությունը ներկայացրել է: Մեր պատկերացրածը մի փոքր այլ էր, բայց Կառավարությունն, այո՛, ինչ-որ պրոբլեմներ տեսնում է նախորդ կառավարության հետ ունեցած հարաբերությունների մասով: Չի ուզում դիտվել իրավահաջորդը նախորդ Կառավարության, որովհետև խնդիրներ կան, որոնք պետք է լուծվեն ժամանակի մեջ: Ի վերջո, դրսի էսպես… կողմերը խնդիր չունեն՝ Կառավարությունը փոխվե՞լ է, չի փոխվել, իրենք գործ ունեն Հայաստանի Հանրապետության հետ: Եվ, բնականաբար, իրենց համար այդ փոփոխությունները չպետք է հանգեցնեն ինչ-որ կտրուկ շրջադարձերի, եթե օրենքներով այդ ամենը չի ամրագրվում: Հիմա, թե ինչ պրոբլեմներ կա, դրա մասին մենք լավ տեղյակ չենք, բայց որ դրանք գոյություն ունեն այդ մասին հայտարարել է վարչապետը:
-Խոսքը Հայաստան հրավիրված ֆոնդերի ֆինանսական կառավարիչներին մասի՞ն է, այսինքն, թե ի՞նչ է լինելու նրանց հետ:
-Լավ տեղյակ չենք, բայց որ էդ պրոբլեմները գոյություն ունեն, դրա մասին վարչապետը հայտարարել է: Ճիշտ կլինի այդ մասին հարցն ուղղել Կառավարությանը:
-Պարո՛ն Ռուստամյան, հիասթափված չե՞ք Ձեր գործընկերներից՝ ԱԺ նախագահի քվեարկության առթիվ: Մասնավորապես լրատվամիջոցներից մեկը՝ Lragir.am-ը գրեց, որ փաստորեն ԱԺ ում կա գաղտնի՝ 7-րդ խմբակցություն:
– Երբ որ ազատ է թողնվում քվեարկությունը, կարող է նման արդյունք գրանցվել: Որքան ինձ հայտնի է, քառյակի մասով մյուսների մոտ ազատ է թողնվել, մենք՝ չէ, ոնց հայտարարել էինք ի սկզբանե, նույն հետևողականությամբ էլ առաջնորդվում ենք: Եվ էդ հարցերը պետք է ուղղել նրանց, ովքեր մասնակցել են:
tert.am