Պաշտօնական այցելութեամբ Արժանթին գտնուող նախագահ Սերժ Սարգսեան 7 յուլիսի երեկոյեան հանդիպում ունեցաւ արժանթինահայ համայնքի ներկայացուցիչներուն հետ:
Արժանթինահայ համայնքի անդամները նախագահ Սերժ Սարգսեանի այցելութեան առիթով հանդէս եկան համայնքին կողմէ պատրաստուած մշակութային ձեռնարկով:
Նախագահը շնորհակալութիւն յայտնելէ ետք համայնքին նշեց, որ 8 յուլիսին Պուենոս Այրեսի մէջ յիշարժան իրադարձութիւն պէտք է ըլլայ` պիտի հիմնադրուի Հայոց ցեղասպանութեան թանգարանը, Արժանթինի հայ համայնքին նուիրած է ֆրանսահայ նկարիչ Ժանսեմի` ցեղասպանութեան նիւթով նկարած աշխատանքներէն մէկը, որ հռչակաւոր գեղանկարիչը փոխանցած էր Հայաստանի Հանրապետութեան նախագահին: Սերժ Սարգսեան գեղանկարը սիրով յանձնած է արժանթինահայ համայնքին` իբրեւ Պուենոս Այրեսի մէջ բացուելիք Հայոց ցեղասպանութեան թանգարանի առաջին ցուցանմուշ:
Համայնքը նախագահ Սերժ Սարգսեանին նուիրած է պետական իշխանութեան նախագահական գաւազան: Այդ գաւազանը նախագահին յանձնուած է Հայ առաքելական Ս. եկեղեցւոյ Արժանթինի հայոց թեմի առաջնորդ Գիսակ արք. Մուրատեան:
Համայնքի ներկայացուցիչներուն հետ հանդիպումին Սերժ Սարգսեան անդրադարձած է Հայոց ցեղասպանութեան 100-րդ տարելիցի շեմին Թուրքիոյ իրականացուցած քայլերուն:
«Թուրքիոյ ղեկավարութիւնը նոյնիսկ կը խօսի հայերուն եւ թուրքերուն մօտ «արդար յիշողութիւն» ստեղծելու անհրաժեշտութեան մասին: Սակայն իր յաջորդ քայլով իսկ կը փորձէ ականապատել արդարութիւնը` հաւասարութեան նշան դնելով մէկուկէս միլիոն անմեղ զոհերուն, որոնք հիմնականին մէջ ծերեր, կիներ եւ երեխաներ էին, եւ Օսմանեան կայսրութեան յանցագործ ղեկավարներու արկածախնդրութեան պատճառով Առաջին աշխարհամարտին զոհուած թուրք զինուորներուն միջեւ», ըսաւ ան:
Հայաստանի նախագահը նաեւ անդրադարձաւ սուրիահայերու խնդիրին. «Ինչպէս գիտէք, այսօր սուրիահայութիւնը կը շարունակէ դժուարին իրադրութեան մէջ մնալ: Այսօր ատիկա մեր մեծագոյն մտահոգութիւնն է: Մենք կ՛ընենք մեր կարելին եւ կը շարունակենք մեր աշխատանքը` անոնց համար արժանապատիւ կեցութիւն ապահովելու համար: Վստահ եմ, որ աշխարհագրական հեռաւորութիւնը ձեզի համար խոչընդոտ չէ, եւ սուրիահայ մեր քոյրերուն եւ եղբայրներուն տառապանքը արձագանգ կը գտնէ ձեր սրտերուն մէջ: Որեւէ կասկած չունիմ, որ ինչպէս ամբողջ աշխարհի մէջ, այնպէս ալ Արժանթինի մէջ իւրաքանչիւր հայու սիրտ կը ցաւի ամէն մէկ հայու թափած արցունքին ու տառապանքին համար: Ուստի կը յորդորեմ ձեզի առաւել աշխուժ ներգրաւուիլ համազգային խնդիրներու լուծման գործին մէջ: Մենք նախանձախնդիր ենք սփիւռքի հետ կապերու ամրապնդման հարցին մէջ»:
Սերժ Սարգսեան արժանթինահայերուն յորդորած է նաեւ հայրենիքի մէջ ներդրումներ կատարել եւ «շահոյթ ստանալով` միաժամանակ կառուցել մեր բոլորի երազանքներու երկիրը»:
Հայրենիք-սփիւռք կապերու ամրապնդման, հայապահպանութեան գործին մէջ ներդրած նշանակալի աւանդին, ինչպէս նաեւ աշխուժ հասարակական եւ բարեգործական գործունէութեան համար Արժանթինի հայ համայնքի շարք մը գործիչներ եւ բարեկամներ Հայաստանի Հանրապետութեան նախագահի հրամանագիրով պարգեւատրուած են Հայաստանի Հանրապետութեան մետալներով: «Մխիթար Գոշ»-ի մետալով պարգեւատրուած են իրաւագէտ, Արժանթինի Հանրապետութեան արդարադատութեան նախկին նախարար Լէոն Կառլոս Արսլանեան, հասարակական-քաղաքական գործիչ, «Խտրականութեան, ցեղասպանութեան եւ այլատացութեան դէմ պայքարի հիմնարկ»-ի տնօրէն Փետրօ Մուրատեան, հասարակական-քաղաքական գործիչ, ՀՅԴ Բիւրոյի անդամ Մարիօ Նալպանտեան: Համայնքային ազգային կառոյցներու քանի մը ներկայացուցիչներ, բարերարներ եւ աշխուժ գործիչներ եւս պարգեւատրուած են «Մխիթար Հերացի»-ի, «Մովսէս Խորենացի»-ի մետալներով: Հանդիպումին ընթացքին նախագահ Սերժ Սարգսեան յանձնած է Հայաստանի Հանրապետութեան պետական պարգեւները, շնորհաւորած պարգեւատրուածները եւ մաղթած յաջողութիւններ:
aztagdaily.com