[1] Իրանի Իսլ. խորհրդարանում հիւսիսային իրանահայութեան պատգամաւոր դոկտ. Կարէն Խանլարեանը աշխատանքային այցով օրերս գտնւում էր Ուրմիայում:
Այցելութեան ընթացքում «Արամ Մանուկեան» ազգային սրահում պատգամաւորը նախ հանդիպել է ազգային միութիւնների ներկայացուցիչների հետ, որոնց թւում էին ՀՕՄ-ի Ուրմիայի մասնաճիւղի վարչութիւնը, Հ. Մ. «Արարատ» կազմակերպութեան Ուրմիայի եւ Գեարդաբադի մասնաճիւղերի վարչութիւնները, «Մասիհա» հայոց դպրոցի տեսուչն ու ուսուցչական կազմը, ինչպէս նաեւ մանկապարտէզի ուսուցչուհին, Ս. Ստեփանոս եկեղեցու խնամակալ մարմինը եւ հայկական գիւղերի հոգաբարձութիւնների ներկայացուցչութիւնը: Շուրջ երկու ժամ տեւած հանդիպման ընթացքում պատգամաւորին ներկայացւեցին աշխատանքային համապարփակ զեկոյցներ, արծարծւեցին տեղական հիմնախնդիրներ: Ապա դոկտ. Կարէն Խանլարեանը, հանդիպեց անհատների հետ, որոնք ունէին անհատական խնդիրներ ու դժւարութիւններ եւ դրանց լուծման գործում պատգամաւորի աջակցութեան կարիքն էին զգում: Պատգամաւորը լսեց նրանց՝ ցուցումներ տւեց եւ խոստացաւ օգնել:
Աւելի ուշ պատգամաւոր դոկտ. Կարէն Խանլարեանը հանդիպեց Ուրմիայի Ազգային գործակալական խորհրդի հետ, որտեղ արծարծւեցին առկայ դժւարութիւնների հետ կապւած հարցեր:
Պէտք է կարեւորութեամբ նշել, որ Ազգային գործակալական խորհուրդը բաւականին լուրջ աշխատանք է տանում դժւարութիւնները հարթելու ուղղութեամբ եւ դրական արդիւնքներ է արձանագրում, իսկ արդէն պատգամաւորի հետ արծարծւող խնդիրների մասով զգացւում է պետական եւ Ատրպատականի Թեմական խորհրդի աջակցութեան կարիքը եւ այդ իսկ պատճառով հարցերը բարձրացւեցին հէնց դոկտ. Կարէն Խանլարեանի ներկայութեամբ:
alikonline.ir