[1]Այսօր, Փետրվարի 6-ին, խորհրդարանական ճեպազրույցների ժամանակ, ՀՅԴ Բյուրոյի անդամ, ԱԺ ՀՅԴ խմբակցության ղեկավար Արմեն Ռուստամյանը, ամփոփելով քառօրյան, առանձնացրեց «Շրջանառության հարկի» մասին օրենքի հետաձգման հարցը և ՎՊ հաշվետվության հարցը:
Նա նշեց, որ ՎՊ հաշվետվության հետ կապված դեպքերը պետք է բացառվեն, և ամեն ինչ պետք է կատարվի օրենքի տառին համապատասխան, ինչը չի կատարվել:
Լրագրողները հարց ուղղեցին Արմեն Ռուստամյանին ոչ իշխանական ուժերի կողմից ներկայացված` կառավարական ճգնաժամի նախագծի մասին: Պատգամավորը կարծիք հայտնեց, որ արդեն վաղուց կառավարական ճգնաժամը լուրջ բնույթ ունի ու մտահոգիչ է:
Նա հավելեց, որ ԱԺ-ում կա ներկայացուցչական կազմի լուրջ խախտում, և դրանից էլ ամեն ինչ սկսվում է: «Նորից գալիս ենք նրան, որ երկրում պետք է կատարվի համակարգային փոփոխություն, առանց դրա հնարավոր չէ, որ մենք ազատվենք այդ բացասական գնահատականներից»,- ասաց Արմեն Ռուստամյանը:
Լրագրողները հետաքրքվեցին, թե ի՞նչ կարծիք ունի ՀՅԴ-ն երեկ ԲՀԿ նախաձեռնությամբ կազմակերպված խորհրդաժողովում Գագիկ Ծառուկյանի արտահայտած մտքերի վերաբերյալ: Արմեն Ռուստամյանը նշեց, որ այն, ինչ հրապարակավ ասվել է, դրա մասին Դաշնակցությունը վաղուց է հայտարարել: Պատգամավորը նշեց, որ կարող է, այդ ելույթի հետ կապված, բառ առ բառ ասել, թե Դաշնակցությունը երբվանից է այդ մասին խոսել:
Արմեն Ռուստամյանի խոսքով` 2010-ին, երբ եղել է Դաշնակցության Գերագույն ժողովը, երբ Դաշնակցությունը դուրս եկավ կոալիցիայից, ինքն անձամբ ասել է, որ Դաշնակցությունը ցանկանում է ձևավորել նոր որակի իշխանություն: «Մենք, փաստորեն, վաղուց ենք խոսել նոր որակի իշխանության մասին ու թե ինչ է դա նշանակում: Ասել ենք, որ իշխանություն-պետություն նույնացել են, բազմաթիվ անգամ ենք ասել: Ասողին լսող է պետք, մենք էսքան ասում ենք, մեզ ոչ ոք չի լսում, հիմա պարզվում է, որ այդ ամենի վերաբերյալ Դաշնակցությունը պետք է տեսակետ հայտնի: Ի՞նչ տեսակետ պետք է հայտնի Դաշնակցությունը իր իսկ կողմից առաջ քաշված գաղափարների վերաբերյալ, իհարկե, պետք է կողմ լինի»,- ասաց Արմեն Ռուստամյանը:
Ըստ պատգամավորի` անհասկանալի է, որ, կառավարման մոդելը չփոխելով, փորձում են նոր որակի իշխանություն ձևավորել: «Մենք պատերազմի մեջ ենք քանի տարի, նոր ենք հիշե՞լ, որ պատերազմը կարող է խոչընդոտել կառավարման մոդելի փոփոխությանը: Այդպես որ լիներ, Իսրայելը խորհրդարանական համակարգ չէր ունենա: Մենք խոսել ենք այդքան կադրային քաղաքականության մասին, որ Սփյուռքի բանիմաց կադրերը պետք է ընդգրկվեն պետականաշինության գործընթացի մեջ: Մենք էլ ենք ասում, որ իշխանափոխությունը չպետք է մարդափոխություն լինի: Իշխանափոխությունը, որպեսզի ծառայի ժողովրդին, վարչախումբ ու համակարգ պետք է փոխվի: Կուզենայի, որ քաղաքական ուժերով նստենք ու մեր ժողովրդին բացատրենք մանրամասն, թե ինչ պետք է անել, որ մեր ժողովրդին չխաբենք ու հուսախաբ չանենք: 90-ականներին ունեցել ենք անխոցելի, լավագույն ընտրություններ, բա ինչո՞ւ դրանից հետո ժողովրդավարությունը չամրապնդվեց, որովհետև ունեցանք այնպիսի Սահմանադրություն, որը ժողովրդավարության հերն անիծեց` հիմք դնելով գերկենտրոնացված իշխանության ստեղծմանը»,- ասաց Արմեն Ռուստամյանը:
Լրագրողները ՀՅԴ խմբակցության ղեկավար Արմեն Ռուստամյանից հետաքրքրվեցին, թե ինչ կասի Բերձորում տեղի ունեցած միջադեպի մասին:
«Ես շատ պարզ հայտարարել եմ, որ դատապարտում եմ բռնությունը, բայց նաև երկու բան եմ ավելացրել, որ ԼՂ-ն անկախ պետություն է, կեսից, եկեք, օյիններ չանեն, ու չփոխենք տրամաբանությունը: Կա’մ ընդունում ենք, որ ԼՂ-ն անկախ է, կա’մ` ոչ, եթե` ոչ, ուրեմն ջուր ենք լցնում ադրբեջանցիների ջրաղացին: Դուք կարո՞ղ եք պատկերացնել, որ Ֆրանսիան ձեզ վիզա տա նրա համար, որ այնտեղ իշխանափոխության երթ կազմակերպեք, չկա տրամաբանություն: Բացի այդ` ես չեմ ընդունում Հիմնադիր խորհրդարանի նպատակները, չեմ ընդունում, որ Ցեղասպանության օրվա հետ կապվեն ներքաղաքական նպատակները: Մենք հասկանո՞ւմ ենք, թե ինչ հարված ենք հասցնում ապրիլի 24-ի օրվա նշանակությանը: Մենք մեր միջև թշնամանք սկսենք ու ուրախացնե՞նք մեր թշնամիներին: ԼՂ-ն պատերազմի մեջ գտնվող երկի՞ր է թե՞ ոչ: Գնալ ու քաղաքական խնդիրներ առաջացնել, կարծում եմ, այո, վտանգավոր է: Բայց այն, ինչ կատարվել է սահմանին, անթույլատրելի է: Մենք դատապարտել ենք, ներողություն, բայց ուրիշ էլ ի՞նչ պետք է անեինք»:
Արմեն Ռուստամյանն անընդունելի է համարում Հայաստանի ներքաղաքական խնդիրները Արցախ տանելը:
Անդրադառնալով Բերձորում տեղի ունեցած միջադեպին, Արմեն Ռուստամյանն ընդգծեց, որ Արցախի Հանրապետությունն անկախ պետություն է և Հայաստանի ներքաղաքական խնդիրներն այնտեղ տանելը չի կարող ընդունելի լինել: «Արցախը նաև պատերազմող երկիր է, և այս պայմաններում Հայաստանից գնալ այնտեղ ինչ-որ երթ անցկացնել, ճիշտ չենք համարում:
Մենք բազմաթիվ անգամ հայտարարել ենք, որ Արցախի Հանրապետությունն անկախ պետություն է և ձգտում ենք հասնել Արցախի միջազգային ճանաչմանը, իսկ նման քայլերով՝ շեղվում ենք այն տրամաբանությունից, այն քաղաքականությունից, որ որդեգրել ենք: Կամ ինչպե՞ս եք պատկերացնում, որ ձեզ թույլ տան գնալ այլ երկրում ինչ-որ երթ անցկացնել»:
Արմեն Ռուստամյանը նաև ընդգծեց, որ ինքը դատապարտում է նաև Բերձորում տեղի ունեցած բռնությունները: «Իհարկե, համաձայն եմ, որ ոստիկանության գործողությունները համաչափ չեն եղել, և մենք արդեն դատապարտել ենք այդ բռնությունները, սակայն միևնույն ժամանակ անընդունելի է «Հիմնադիր խորհրդարանի» այդ նախաձեռնությունը»,- նշեց պատգամավորը:
Պատգամավորը նաև անընդունելի է համարում «Հիմնադիր խորհրդարանի» գործունեությունը.
«Նրանք փորձում են Հայաստանի ներքաղաքական խնդիրները կապել Հայոց ցեղասպանության 100-րդ տարելիցի հետ: Սա այն պահն է, որ մենք պետք է միասնական լինենք և աշխարհին ցույց տանք մեր համախմբվածությունը, սակայն նրանք անում են լրիվ հակառակը: Չի կարելի այս կարևոր և պատասխանատու պահին նման նախաձեռնություններով հանդես գալ»: