ՀՅԴ-ն շարունակում է իր հանդիպումները
[1]Դաշնակցությունը հավատում է ապակենտրոնացված ղեկավարմանը. ՀՅԴ-ն շարունակում է իր հանդիպումները
Այսօր ՀՅԴ ներկայացուցիչները սահմանադրական հանրաքվեի քարոզարշավի շրջանակներում եղան Կոտայքի մարզի Չարենցավան եւ Հրազդան քաղաքներում:
ՀՅԴ ԳՄ ներկայացուցիչ, ԱԺ ՀՅԴ խմբակցության քարտուղար Աղվան Վարդանյանի, ՀՅԴ ԳՄ անդամ Լիլիթ Գալստյանի, ՀՅԴ ԳՄ անդամ Պետրոս Մեղրյանի և հրազդանցիների հանդիպումն անցավ լեփ-լեցուն դահլիճում:
Նախքան սահմանադրական փոփոխությունների քննարկմանն անցնելը ՀՅԴ ԳՄ ներկայացուցիչ Աղվան Վարդանյանն անդրադարձավ այս գիշեր Փարիզում տեղի ունեցած սարսափելի ահաբեկչություններին` իր ցավակցությունը հայտնելով Հայաստանի բարեկամ Ֆրանսիայի ժողովրդին:
Հանդիպման մասնակիցները մեկ րոպե լռությամբ հարգեցին ահաբեկչության անմեղ զոհերի հիշատակը: Աղվան Վարդանյանը, խոսելով սահմանադրական փոփոխությունների մասին, նշեց, որ Դաշնակցությունն ի սկզբանե համոզված կողմ է եղել խորհրդարանական կառավարման համակարգին, և արդեն քսան տարի հետևողականորեն պաշտպանել է այդ գիծը: «Ես այն մարդկանցից եմ, ովքեր տանել չեն կարողանում, երբ ոմանք խոսում են ամբողջ ժողովրդի անունից: Ես կփորձեմ իմ համոզումը փոխանցել ժողովրդին պարզ, հասկանալի ձևով: Ամենավատն այն է, որ որոշ մարդիկ փորձ են անում որոշել բոլորի փոխարեն` ասելով` «Մեկ է` մեզանից ոչինչ կախված չէ», «Մեկ է` իշխանությունները ինչ ուզենան կանեն»: Սա ամենավատ ծառայությունն է, որ կարող են անել մեր քաղաքացիներին, որովհետև քաղաքացին թևաթափ է լինում: Եվ եթե քաղաքացին չի գիտակցում իր քվեի արժեքը, հենց այդ ժամանակ իշխանությունը կարող է նրա կարծիքը հաշվի չառնել»,- ասաց Աղվան Վարդանյանը:
Նա ներկայացրեց այն բոլոր կարևոր փոփոխությունները, որոնք նախատեսվում են խորհրդարանական կառավարմանն անցնելու դեպքում. իշխանությունը ապակենտրոնացվում է՝ դառնալով ավելի հրապարակային, թափանցիկ, որոշումները կայացվում են ժողովրդի աչքի առաջ, ոչ թե մի քանի հոգու մեջ, հաճախ` ստվերում:
«Դաշնակցությունը հավատում է կոլեգիալ և ապակենտրոնացված ղեկավարմանը: Մենք միշտ ասել ենք, որ Հայաստանի համար անթույլատրելի է մեծամասնական ընտրակարգը, ինչը էականորեն նվազեցնում է իշխանության` ԱԺ-ում մեծամասնություն ձևավորելու հնարավորությունը: Այսօրվա «ոչ» ասող քաղաքական ուժերը 10-15 տարի կռիվ են տվել, որ լինի 100 տոկոս համամասնական ընտրակարգ»,- ասաց Աղվան Վարդանյանը` հավելելով, որ Դաշնակցության հետևողական պայքարի արդյունքում հնարավոր դարձավ սահմանադրական փոփոխությունների նախագծում ամրագրել 100 տոկոս համամասնական ընտրակարգը:
Աղվան Վարդանյանը հավելեց, որ տասնամյակներ շարունակ Դաշնակցությունը անթույլատրելի է համարել քաղաքական դաշտի բաժանումը երկու թշնմական մասերի: Տարիներ շարունակ Դաշնակցությունը պայքարել է, որ ընդդիմությունը դերակատարում ունենա, այնպիսի գործուն լծակներ ունենա, որ կարողանա մասնակցել պետական, քաղաքական որոշումների մշակմանը:Եվ սահմանադրական փոփոխություններով ընդդիմությանը տրվում է այդ հնարավորությունը:
«Սա պետություն է, երկիր է, որտեղ ով է լինի ընդդիմություն, ով էլ լինի իշխանություն, կարողանան իրար հետ աշխատել, իրար լրացնեն, զսպեն, որ առաջ գնալու տեղ լինի, ոչ թե իրար հայհոյեն ու ատեն»,- ասաց Աղվան Վարդանյանը: Քննարկումներն ուղեկցվեցին հարց ու պատասխանի ձևաչափով:
yerkir.am
Վաղը Սահմանադրությունը բոլորինն է դառնալու. մեկնարկեցին ՀՅԴ-ի մարզային հանդիպումները
[2]Այսօր ՀՅԴ անդամները սահմանադրական հանրաքվեի քարոզարշավի շրջանակներում եղան Կոտայքի մարզի Չարենցավան քաղաքում: ՀՅԴ ԳՄ ներկայացուցիչ, ԱԺ ՀՅԴ խմբակցության քարտուղար Աղվան Վարդանյանը, ՀՅԴ ԳՄ անդամներ Լիլիթ Գալստյանը և Պետրոս Մեղրյանը հանդիպեցին չարենցավանցիների հետ:
Աղվան Վարդանյանը, խոսելով ՀՅԴ-ի` առանձին իրականացվող քարոզչության մասին, նշեց, որ Չարենցավանում հանդիպումը առաջինն է մարզային հանդիպումների շրջանակներում: Այսօր և վաղը չորս մարզերում հանդիպումներ կանցկացնեն ԱԺ ՀՅԴ խմբակցության ղեկավար Արմեն Ռուստամյանը, ԱԺ ՀՅԴ խմբակցության պագամավոր Արծվիկ Մինասյանը, ՀՅԴ-ական Դավիթ Լոքյանը: Առաջիկա շաբաթ, կիրակի օրերին կլինեն Հայաստանի մնացած մարզերում. յուրաքանչյուր մարզում 3-4 հանդիպում է նախատեսված:
Խոսելով սահմանադրական փոփոխությունների մասին` Աղվան Վարդանյանը նշեց, որ Սահմանադրությունն այն փաստաթուղթն է, որով երկիրն ապրելու է առաջիկա 10-20 տարիներին` անկախ այն բանից` կընդունվե՞ն սահմանադրական փոփոխությունները, թե՞ ոչ:
«Ուղղակի ասել «ոչ» սահմանադրական փոփոխություններին, չքննարկելով այդ փոփոխությունների բովանդակությունը և չհամեմատել նախկինի հետ, նշանակում է մասնակից չլինել: Վաղը Սահմանադրությունը բոլորինն է դառնալու, և այն, ինչ մերժել ես` առանց հիմնավորման, դու ապրելու ես այդ պայմաններում: Այս առումով շատ կարևոր է, որ իսկապես բովանդակային քննարկում լինի, ինչ ունեն, և ինչն է փոխվելու»,- ասաց նա:
Վարդանյանի խոսքով` վատն այն է, որ սահմանադրական փոփոխությունները քննարկում են իշխանություն-ընդդիմություն համատեքստում, այսինքն` եթե իշխանությունը կողմ է սահմանադրական փոփոխություններին, ուրեմն ընդդիմությունն անպայման պետք է դեմ լինի:
«Դաշնակցությունն ընդդիմություն է, բայց կողմ է սահմանադրական փոփոխություններին, որովհետև Դաշնակցությունը 20-23 տարի շարունակ անընդհատ ասել է, որ ճիշտը խորհրդարանական համակարգն է, այլ ոչ թե նախագահական կամ կիսանախագահական համակարգը: Մենք մեր տեսակետներն ու սկզբունքները երբեք չենք փոխել»,- ասաց նա:
Աղվան Վարդանյանը հավելեց, որ ներկայումս ունենք անունով կիսանախագահական համակարգ, բայց բոլոր մտածող մարդիկ հասկանում են, որ ունենք սուպերնախագահական համակարգ, երբ իրականում մեկ մարդ է որոշում բոլոր հարցերը, քանի որ ԱԺ-ում մեկ կուսակցության մեծամասնություն ունենք, նախագահն ու վարչապետը նույն կուսակցությունից են, և բոլոր հարցերը լուծվում են մեկ տեղում: Մինչդեռ` խորհրդարանական կառավարման համակարգում որոշումները կայացվում են կոլեգիալ ձևով, բոլոր հարցերը քննարկվում են ԱԺ-ում` բաց, թափանցիկ ձևով, և կառավարությունն էլ պարբերաբար հաշվետու է ԱԺ-ին:
«Մենք երկար ժամանակ պայքարել, կռիվ ենք տվել, համոզել, որ մեծամասնական համակարգը չարիք է մեր պետության համար, որովհետև այս 20-23 տարիների ընթացքում իշխանությունը կարողացել է իր համամասնականով բերած տոկոսներին ավելացնել մեծամասնականով անցածներին ու ստանալ մեծամասնություն: Եվ երբեք իշխանությունն իր գործադրած ընտրակաշառքներով ու վարչական ռեսուրսի կիրառմամբ չի կարողացել միայն համամասնականով կազմել մեծամասնություն: Նույնիսկ այսօրվա պառլամենտում, եթե հանենք մեծամասնական տեղերը, ապա որևէ կուսակցություն մեծամասնություն չունի: Եվ 100 տոկոս համամասնականով շանսերը՝ մեծամասնություն կազմելու, էապես նվազում են»,- ասաց Աղվան Վարդանյանը:
Չարենցավանցիները բարձրացրեցին իրենց հուզող հարցերը սահմանադրական փոփոխությունների վերաբերյալ, և բոլոր հարցերին ՀՅԴ անդամները տվեցին սպառիչ պատասխաններ: Վերջում Աղվան Վարդանյանը կոչ արեց չարենցավանցիներին` անտարբեր չլինել և գնալ, քվեարկել սահմանադրական փոփոխությունների օգտին, քանի որ այն տալիս է երկրում ինչ-որ բան փոխելու հնարավորություն:
yerkir.am