Մենք այդ ռիսկին գնում ենք, ով ինչ ուզում է` խոսի

Այսօր լրագրողները ՀՅԴ Բյուրոյի անդամ, ՀՅԴ խմբակցության ղեկավար Արմեն Ռուստամյանին մի շարք հարցեր ուղղեցին ՀՅԴ-ՀՀԿ համագործակցության վերաբերյալ երեկ նրա արած պարզաբանումների կապակցությամբ:

– Քիչ առաջ Վահրամ Բաղդասարյանն ասաց, որ սպասում է Ձեր երեկվա ասածի հետ կապված պարզաբանման, արդյո՞ք վերահաստատում եք Ձեր երեկվա ասածները:

– Ես ինչ ասել եմ, բնականաբար, հաստատում եմ իմ ասածները, ես կրկնելու որևէ բան չունեմ:

– Վահրամ Բաղդասարյանն ասում էր, որ կվերանայեն իրենց մոտեցումները:

– Վահրամ Բաղդասարյանի ասածներն իրեն հասցեագրեք: Ես կրկնելու որևէ բան չունեմ, ես ինչ ասել եմ, ասել եմ ամբողջական, լիարժեք, իրավիճակին համապատասխան:

– Սա ի՞նչ հետևանք կունենա ձեր հետագա համագործակցության հարցում:

– Մեր համագործակցությունը միջոց է, ես նպատակների մասին եմ մտածում: Ես ուզում եմ, որ մեր երկիրն այս իրավիճակից դուրս գա: Մենք ունենք լուրջ պրոբլեմներ, մեր երկրի պրոբլեմները պետք է հաղթահարենք: Դրա համար Դաշնակցությունը պատրաստ է ամեն ինչ դնել, անգամ` իր հեղինակությունը: Այս հարցով որևէ կասկած որևէ մեկի մոտ թող չմնա: Մենք սկսել ենք լավ գործընթաց և պետք է շարունակենք, որպեսզի դրական արդյունքներով երկրի վիճակը շտկենք:

– Հրանտ Մարգարյան-Սերժ Սարգսյան հանդիպում կլինի՞:

– Հանդիպումները տեղի են ունենում, տեղի կունենան այնքան ժամանակ, քանի դեռ չենք հանգել վերջնական եզրակացության:

– Խոսակցություն կա, որ նախարարական պորտֆելների, մարզպետերի մասին եք խոսելու: Հասե՞լ եք ինչ-որ փուլի:

-Ինչո՞ւ, խոսակցությունները նո՞ր են: Հանդիպումներ բազմիցս լինելու են, բացատրել եմ՝ մենք ինչ ենք ուզում և որ ճանապարհով ենք գնում: Հանդիպումները միջոց են՝ մեր խնդիրները լուծելու: Հանդիպումների մեջ արտառոց բան մի՛ փնտրեք:

– Դուք մտավախություն չունե՞ք, որ Ձեր հայտարարությունից հետո կվտանգվի համագործացությունը, որովհետև փաստացի Դուք նրանց հեղինակազրկված եք համարում:

– Ես մտավախություն ունեմ, որ չվտանգվի մեր երկրի առաջընթացը: Այլ մտահոգություն ինձ համար գոյություն չունի, որևէ համագործակցություն ստորադաս է այդ խնդրին: Մենք երբեք ինքնանպատակ համագործակցության մեջ չենք մտել ու չենք մտնի: Մենք ուզում ենք համագործակցել` հանուն մեր երկրի, հանուն մեր ժողովրդի:

-ՀՀԿ-ն հեղինակազրկված է, և Դուք շարունակում եք դա պնդե՞լ:

-Ես նորից եմ բացատրում՝ եթե կա լուրջ դժգոհություն, իսկ այդ դժգոհությունն առկա է. ես համարում եմ՝ հանրաքվեի այն «ոչ»-ի քանակը, որ արձանագրվեց, խոսում է դժգոհության մասին, ուրեմն այդ դժգոհությունը չի կարող չնշանակել, որ կան չլուծված հարցեր, կան կուտակված խնդիրներ: Բնականաբար, իշխանությունը չի կարող մեծ հեղինակություն ունենալ, եթե չի լուծել այդ խնդիրները: Բայց այդ հեղինակության պակասը մեր խնդիրն է նաև, մենք համարում ենք՝ այդտեղ էլ է մեր հարցը: Մենք համարում ենք, որ պետք է ամեն ինչ անել, որպեսզի մեր երկիրը դուրս բերենք այնպիսի մի մակարդակի, որ ժողովուրդը լիարժեք վստահի իր իշխանություններին: Այդ վիճակը գոյություն չունի: Տարբեր բառախաղերի մեջ մտնելով՝ փորձում են շեղել մեզ իրական նպատակներից: Մենք պարտավոր ենք այն ճգնաժամը, որ այսօր գոյություն ունի ՀՀ-ում, հաղթահարել ու լուծել, դրա համար մենք պատրաստ ենք, անկախ ամեն ինչից, անկախ նրանից, թե ով ինչ կխոսի, նաև մեր հեղինակության հաշվին համագործակցել, որովհետև հասկանում ենք, որ այսօր իշխանության մեջ լինելը հեղինակության համար հարված է: Այդ ամենը գիտակցելով ենք մենք անում, բայց վստահ ենք, որ եթե ճիշտ ճանապարհ ենք սկսել և այդ ճանապարհը ճիշտ քայլերով, համապատասխան մոտեցումներով իրականացնենք, շատ արագ արդյունք կունենանք, և մեր ժողովուրդը դուրս կգա այս վիճակից: Այսօր հոռետեսությունը շատ է, դրա դեմ է պետք պայքարել:

– Եթե ՀՀԿ-ն փակի համագործակցության դռները, ձեր վճարած գինն այլևս արժեք կարող է չունենալ:

– Համագործակցություն ասածը մեզ համար… Ավելի լավ է հիմա պարզենք այդ ամենը, քան հետո: Դա երբեք ինքնանպատակ չի եղել, մենք համագործակցում ենք` հանուն մեր երկրի, մեր ժողովրդի, և պորտֆելների մասին բանավեճը, որ սկսվել է մամուլում, մեզ համար անընդունելի է, որովհետև մենք պորտֆելների կռիվ չունենք, մենք աթոռակռիվ չունենք, մենք խնդիր ունենք` կարողանալ մեր երկիրն այս վիճակից դուրս բերել: Սա անընդատ ասում ենք, բայց չեն ուզում ընդունել, որովհետև կան հակադաշնակցական տրամադրությունների մեջ ապրողներ, նրանք ուզում են Դաշնակցությունն իրենց պրիմիտիվ պատկերացումների մեջ տեսնել: Դաշնակցությունն ամենածանր պայմաններում էլ չի հուսահատվում և լավատեսությունը փոխանցում է նաև ժողովրդին: Մենք մի գործ ենք ուզում անել, որ բոլորի համար էլ վերջում լավ լինի:

– Ճի՞շտ է, որ Ձեր երեկվա հայտարարությունը պարզաբանումների առիթ է տվել:

-Ոչ մի պարզաբանում էլ տեղի չի ունեցել: Եթե նկատի ունեք հարաբերությունների շտկում, այդպիսի բան գոյություն չունի: Մամուլի թեթև ձեռքով այդ ամենը կոնտեքստից կտրված է ներկայացվել: Ինչ ասել եմ, ասել եմ իրավիճակի վերլուծության տրամաբանությամբ, ես դրանից չեմ հրաժարվում, որովհետև համարում եմ, որ կան կուտակված խնդիրներ, և դրանց լուծման հիմնական պատասխանատուն իշխանություններն են, ուրեմն այդ իշխանությունները հեղինակության խնդիր ունեն: Պետք է այնպես մտածել, որ եթե ինչ-որ փուլ հաղթահարել ենք, ուրեմն ամեն ինչ լուծված է: Մենք նախադրյալներ ենք ստեղծել` հարցերը լուծելու համար, բայց մենք հարցերը դեռ չենք լուծել: Մենք իսկապես խնդիր ունենք նույն «ոչ»-ին, ովքեր իրենց դժգոհությունն են արտահայտել և «ոչ» են քվեարկել` առանց գիտակցելու, որ «ոչ» են ասել մի բանի, որ իրենց «ոչ»-ի դարմանն է լինելու, համոզել:

– Հնարավոր չէ՞ր այնպես անել, որ իշխանությունը հեռանա:

– Մենք այս Սահմանադրությամբ դա արել ենք: Մենք չպետք է որոշենք՝ ով պետք է գա, ով պետք է հեռանա: Ժողովուրդը պետք է ունենա հնարավորություն իր կամքով, իր ուզած ձևով իշխանությունն ընդունելու: Մենք այդ հնարավորությունն ենք ստեղծել: 2017 թվականին կունենանք աննախադեպ` լավագույն ընտրություններ, որովհետև դրա համար նախադրյալներ են ստեղծված: Հիմա մնում է Ընտրական օրենսգիրքը դրան համապատասխանեցնել, որը ևս մեր բանակցությունների թեման է: Եթե չի եղել ընտրություն, որի ժամանակ ժողովուրդն իր կամքով իր իշխանությունը ընտրի, ուրեմն խոսել վարկանիշների մասին անիմաստ է: Պետք չէ դրա տակ ենթատեքստեր փնտրել: Մենք էլ ենք մտնում այս ամեն ինչի տակ, հասկանում ենք, որ մեր կուսակցության վարկանիշը կարող է անկում ապրել, որովհետև այդ հոգեբանական վիճակը կա:

– Լևոն Զուրաբյանն ասում է, որ դուք ընտրությունների մասին չեք մտածում, երբ ձեր վարկանիշը դնում եք հարվածի տակ հիմա:

– Մենք ոչ միայն ընտրությունների մասին ենք մտածում, մենք մեր երկրի ապագայի մասին ենք մտածում: Լևոն Զուրաբյանը կլինի, մյուսները կլինեն` մեր մոտեցումները մենք ներկայացրել ենք: Մենք բաց ենք խոսել, հրապարակային ենք գործել, որևէ կերպ չենք շեղվել մեր նախանշած նպատակներից և հետևելու ենք դրանց, որքան էլ ոմանց համար անընդունելի լինի: Մենք ունենք լուրջ խնդիր` այս երկիրը պետք է այս վիճակից դուրս բերել: Սրա համար ՀՅԴ-ն պատրաստ է դնել ամեն ինչ, անգամ` իր վարկանիշը: Իսկ այդ բառը կտրել են կոնտեքստից և դարձրել քննարկման նյութ: Ես բոլորովին այլ բան եմ ասել, ես բոլորովին այլ առարկա եմ նշել, որի շուրջ պետք է համագործակցեն բոլորը, որ մենք կարողանանք այս վիճակը շտկել: ՀՅԴ-ի խնդիրն էլ հենց սա է` աջ ու ձախ չնայելով՝ պետք է գնանք առաջ՝ հասկանալով, որ մենք ճիշտ բան ենք արել մինչև հիմա: Մենք Սահմանադրություն ենք փոխել, որը նախադրյալներ է ստեղծել երկիրն այս վիճակից դուրս բերելու, բայց դրան պետք է միս ու արյուն տանք, դե յուրե եղած իրավիճակը դե ֆակտո իրավահարաբերությունների վերածենք, և ես վստահ եմ, ինչպես «այո»-ն քարոզելու ժամանակ եմ ասել, հիմա էլ եմ վստահ, որ եթե մենք դա անենք, 2017 թվականին ունենալու ենք ավելի լավ ընտրություններ, ավելի լավ իշխանություն:

– Ասում են՝ այս կերպ Դաշնակցությունը փորձում է ցատկել վերջին վագոնը և տեղ զբաղեցնել 17-ի խորհրդարանում:

– Նրանք պետք է ցատկեն, ովքեր իրենց տեղը չեն գտել: Դաշնակցությունը վաղուց` 125 տարի իր տեղն ունի: Եթե մարդիկ նման բաներ են հայտարարում, հրապարակավ ցույց են տալիս շատ բան: Դաշնակցությունը ցատկելու խնդիր չունի: 125 տարի պետության, ժողովրդի համար պայքարել է և շարունակում է պայքարել՝ նվիրված իր գաղափարներին ու սկզբունքներին: Ովքեր դա ընդունում են, մենք նրանց հետ համագործակցում ենք` լինի ընդդիմությունից, թե իշխանությունից: Հարյուր անգամ նույնը կրկնել ենք: Մենք հրապարակել ենք՝ ինչ հարցերի շուրջ ենք համագործակցում: Հիմա դա համընկել է իշխանության հետ: Հիմա եթե մենք մի բան ենք ասել, պետք է կատարենք, ու շատ անտրամաբանական կլինի, որ ասածներդ անելու համար չստանձնես համապատասխան պատասխանատվություն: Մենք այդ ռիսկին գնում ենք, ով ինչ ուզում է` խոսի:

– Եթե պորտֆելների հարց չի քննարկվում, ի՞նչ է այժմ քննարկվում:

– Քննարկվում են գլխավոր հարցերը: Պորտֆելներն ածանցյալ են: Քանի որ նախագահական համակարգը գործում է, պորտֆելների քանակը ոչ մի կապ չունի, եթե դու չունես իշխանությունը կրող ուժը. նախագահն է որոշում ամեն ինչ: Մենք ավելի շատ խոսում ենք համագործակցության մասին: Համագործակցությունը կարող է դրսևորվել տարբեր ձևերով: Բայց կարևորում ենք, թե հանուն ինչի ենք համագործակցում: Եթե ռազմավարության մեջ համաձայնության չենք եկել, պորտֆելը հարց չի փոխի:

– Ո՞րն է համագործակցության թեման, անկյունաքարը:

-Նույն տրամաբանությունն է, ինչ յոթ կետերով արտահայտված է` ստանձնել այդ ուղղությամբ երկիրը զարգացնելու հանձնառություն:

– Գուցե կոալիցիա չլինի՞:

-Ամեն ինչ էլ հնարավոր է: Եթե մենք, կոալիցիա չլինելով, կարողացել ենք այդ յոթ կետերից չորսն իրականացնել, մենք համարում ենք, որ շատ գործ ենք կատարել: Բայց նաև պատրաստ ենք, անգամ` քննադատությունների ներքո, մեր ստանձնած ճանապարհով ընթանալ առաջ, մենք վստահ ենք, որ հասնելու ենք մեր նախանշած նպատակներին: Բանակցությունները բազմաբնույթ են, կա ռազմավարություն, որ իշխանությունների հետ պետք է ճշտելն այդ քննարկումներն են ընթանում: Այդ քննարկումները կհասնեն հանգուցալուծման, մարդիկ կտեղեկանան: Պետք է փորձել հապճեպությամբ ինչ-որ հարցերի պատասխան ստանալ:

– Երեկ Շարմազանովը նշում էր, որ Ձեր հայտարարությունն էմոցիոնալ ֆոնի վրա արված է, որի համար կզղջաք: Էմոցիոնալ հայտարարություննե՞ր երեկ եղան:

– Ես կարծում եմ, որ պարոն Շարմազանովը հաստատել է այն, ինչ ես եմ ասում: Ես, ըստ էության, ասել էի, որ կուտակված խնդիրների պարագայում իշխանությունները հեղինակության խնդիր ունեն, և ինքն էլ ասում է, որ ժողովրդի ուշքը չի գնում Հանրապետականի համար: Չնայած ես Հանրապետական չեմ ասել, որովհետև իշխանությունը և Հանրապետականը տարբերել է պետք: Ամեն դեպքում` ես ասել եմ, որ մենք ունենք իրավիճակ, որ ազդեցություն պահպանող ուժ է Հանրապետականը, որը ստացել է ժողովրդի ձայնը, ընտրության արդյունքը դա է ցույց տվել: Այս ամենը ես ասել եմ, բայց ասում եմ, որ սա նաև մեր պրոբլեմն է՝ ունենալ այնպիսի իշխանություն, որ լինի ավելի վստահելի, մեր ժողովրդի կողմից ընդունելի, որ նրա ցանկացած հրահանգը ժողովուրդը կատարի, որովհետև այնպես չէ, որ իշխանությանը թվա, թե միայն ինքը և իր ուժային ռեսուրսներն արդեն պետություն են, ո’չ: Պետություն են նաև այն մարդիկ, ովքեր ապրում են այդ պետության մեջ: Կտրված կապը պետք է վերականգնենք: Սա պետք է կարողանանք իրար հետ իրականացնել: Այս առումով չեմ կարծում, որ ես ու պարոն Շարմազանովն իրար հակասում ենք:

– Նշում եք, որ չորս կետերն իրականացվել են, մնում է երեք կետ: Ստացվում է, որ, չլինելով ՀՀԿ-ի հետ կոալիցիայի մեջ, դուք անկախ կարողանում եք հասնել ինչ-որ հաջողությունների: Հնարավոր չէ՞ր երեք կետն էլ իրականացնել` առանց ՀՀԿ-ի հետ համագործակցելու, առանց ձեր հեղինակությունը վտանգի տակ դնելու:

– Մեր առաջարկած յոթ կետերը չեն նշանակում անմիջապես, տվյալ պահին իրականացում: Դա գործընթաց է, որի ուղղությամբ, մենք տեսնում ենք, գոյություն ունի համապատասխան քաղաքական կամք և հանձնառություն: Սա արդեն բավարար հիմք է տալիս, որպեսզի մենք ամենասերտ համագործակցության մեջ գտնվենք իշխանության հետ՝ այս հարցերի լուծման առումով: Մնացած կետերը, կարծում եմ, իրականություն կդառնան ընթացքում: Պարտադիր չէ, որ տվյալ պահին ամեն ինչ իրականացվի: Կետեր կան, որ աշխատանք են պահանջում, այս ամենը չի կարելի պատկերացնել որպես մեկանգամյա լուծման խնդիր:

– Հայ-թուրքական արձանագրությունների հա՞րցն էլ:

– Հայ-թուրքական արձանագրությունների հարցը և այլն, բոլորը գործընթաց են ենթադրում, ժամանակ են պահանջում: Այս ամեն ինչը պետք է տեղի ունենա ըստ ընթացքի:

yerkir.am