«ԱԼԻՔ», Ա. Է. – «Դաշնակցութեան մղումը բովանդակային բնոյթ ունի եւ չի կաշկանդւում ձեւականութեամբ:
Սովորաբար կոալիցիան կազմւում է այն պահին, երբ խորհրդարանում ոչ մի կուսակցութիւն մեծամասնութիւն ձեռք չի բերում: Այդ պայմաններում երկու կամ աւելի կուսակցութիւնների համաձայնութեամբ ստեղծւում է կոալիցիա՝ մեծամասնութիւն ապահովելու անհրաժեշտութեան պահանջով: Դա սոսկ վարչական լուծում է եւ յաճախ խորքային համաձայնութեան բնոյթ չունի: Այդ առումով այս համագործակցութիւնը միտւած չէ մեծամասնութիւն ապահովելուն: Քանի որ իշխող Հանրապետական կուսակցութիւնը այդ մեծամասնութիւնը արդէն իսկ ունի»,- յայտարարել է ՀՅԴ Բիւրոյի անդամ ճրտգ. Վիգէն Բաղումեանը, ի պատասխան «Ալիք»-ի այն հարցին, ըստ որի՝ ի՞նչ հեռանկար են ուրւագծում ՀՅԴ-ՀՀԿ բանակցութիւնները, կոալիցիա՞, թէ՞ համագործակցութիւն…:
Պրն. Բաղումեանը ապա շարունակեց. «Բայց կայ մի աւելի մեծ պահանջ, քան այդպիսի վարչական պահանջն է: Այս պահանջը՝ երկրում շօշափելի դրական փոփոխութիւններ առաջացնելու, տնտեսական զարգացումն ու սոցիալական արդարութիւնը խթանելու եւ հանրապետութեան ներքին ու արտաքին բազմաթիւ մարտահրաւէրները լաւագոյնս լուծելու անյետաձգելի պահանջն է:
Այսօր տարածաշրջանը վտանգներով լի իրավիճակում է, Հայաստանը կիսապատերազմական վիճակում է եւ ամէն օր կան զոհեր եւ վիրաւորներ: Հսկայ գումարներ են պէտք հայոց հերոսական բանակը մարտունակ վիճակում պահելու համար: Միւս կողմից ժողովուրդը դժգոհ է եւ իշխանութիւններին չի վստահում: Այդ պայմաններում, իշխող Հանրապետական կուսակցութիւնը համագործակցութեան առաջարկ է ներկայացրել եւ մենք բնականաբար դրական պատասխան ենք տւել՝ առաջադրելով մեր պայմանները: Իհարկէ, շատ աւելի հեշտ կը լինէր «ընդիմութիւն» խաղալ, մի կողմ կանգնել ու միայն քննադատել, հայհոյել ու ա՛յդպիսով «մաքուր» մնալ: Բայց դրանով հարցեր չեն լուծւում: Եթէ այսօրւայ դժւար պայմաններում համագործակցութիւնը մերժում ես, նշանակում է՝ միայն լաւ պայմաններում պատասխանատւութիւն վերցնելու «հերոս» ես:
Որեւէ ժողովրդանւէր եւ հայրենասիրութիւն դաւանող կազմակերպութիւն չի կարող պետութեանը «ոչ» ասել: Պետութիւնը եւ պետականաշինութիւնը գերագոյն արժէքներ են: Հայրենիքը շատ աւելի բարձր արժէք է, քան այս կամ այն կուսակցութիւնը եւ դրանից բխող «մաքուր» մնալու մտահոգութիւնը:
Իսկ ինչո՞ւ այս օրերին:
Նախ, նոր Սահմանադրութեան ընդունումը վերջակէտ է դնում ընթացիկ կացութեանը, ըստ որի՝ մի անձ՝ նախագահը միայնակ որոշումներ է կայացնում գրեթէ բոլոր գլխաւոր հարցերում: Այս բարեփոխումները դուռ են բացում քաղաքական նոր մշակոյթի, կասեցնելով արատաւոր բարքերը, չարաշահումներն ու օլիգարխիկ կարգ ու սարքը: Այս համագործակցութեան շնորհիւ մենք ձգտում ենք երաշխաւորել նոր Սահմանադրութեան ճշգրիտ կենսագործումը՝ ընթացիկ օրէնքների դիպուկ վերամշակումով:
Երկրորդ՝ համագործակցութիւնը պայմանաւորւած է Հանրապետական կուսակցութեան յանձնառութեամբ, որ ինքը վերանայի անցեալի բացասական երեւոյթները եւ ապա միասնաբար ջանքեր դնենք ժողովրդի պահանջած բարեփոխումները իրագործելու համար: Այն ժամանակ, երբ վերականգնւի ժողովրդի վստահութիւնը պետութեան նկատմամբ, մենք իրագործւած կը համարենք այս համագործակցութեան նպատակները:
Մի քանի օրից ստորագրւելու եւ հրապարակւելու է ՀՅԴ-ՀՀԿ «Քաղաքական համագործակցութեան համաձայնագիր»-ը: Այդտեղ ներկայացւած կը լինեն համաձայնեցւած սկզբունքներն ու ծրագրերը, որոնց ուղղութեամբ գործունէութիւն պիտի ծաւալեն երկու կուսակցութիւնները, համատեղ ստանձնելով կառավարութեան ծրագրերի իրականացման պատասխանատւութիւնը:
alikonline.ir/hy/