«ԱԼԻՔ», Ա. Է.- Արցախեան քառօրեայ պատերազմը նոր մտածումների տեղիք տւեց մեզ. յախուռն մտածումներ՝ յաղթանակած ու միաժամանակ վերանայման հրամայականի կանչող:
«Արարատ» մարզաւանում երէկ, ապրիլի 11-ի երեկոյեան թեւածում էր Արցախեան ոգին: Մարզաւանի մի հատւածում երիտասարդական համահաւաքն էր պահանջատիրական ոգով ու շնչով շեշտադրւած, իսկ «Վաչիկ Ղարաբէգեան» սրահում կազմակերպութեան Երէցների միութիւնը կազմակերպել էր Արցախեան թեմայով երեկոյ, որտեղ միութեան նախագահ Հարմիկ Զովելեանը հարցեր էր ուղղում հրաւիրւածներին` Արցախում վերջին օրերի իրադարձութիւնների մասին: Կլոր սեղանին հրաւիրւած էին մասնակցելու` «Ալիք» օրաթերթի գլխաւոր խմբագիր Դերենիկ Մելիքեանը, քաղաքական վերլուծաբան-թուրքագէտ` Գրիգոր Ղազարեանը, հասարակական գործիչ Իւետ Դանիէլեանը, «Ալիք» օրաթերթի խմբագրակազմի անդամ, Թեհրանի Հայ Դատի յանձնախմբի նախագահ Արամ Շահնազարեանը եւ ուսանող-փորձագէտ Արա Աւետեանը: Հեռակապով զրոյցին Արցախից մասնակցեց նաեւ արդէն երկու տասնամեակ Արցախում հաստատւած Արա Պուլուզեանը, ով փոխանցեց տեղեկութիւններ` Արցախեան առօրեայից: Այդ ողջ ընթացքում ներկաները իրենց նիւթական օժանդակութիւնն էին բերում Արցախինª մօտենալով անկիւնում տեղադրւած սեղանին: Բացի նիւթական օժանդակութիւնից, պատրաստակամութիւն յայտնվեց ողջ ներուժով կենտրոնանալու Արցախի աջակցութեան գործին:
Կարծես սրա տրամաբանական շարունակութիւնն էր երիտասարդական համահաւաքը արդէն մատուռի շրջակայքում, ուր համախմբւած երիտասարդները իրենց բարձրագոչ լոզունգներով զօրակցութեան կոչ էին յղում իրենց արցախցի տարեկիցներին: Համահաւաքը կազմակերպւել էր համայնքի երիտ-ուսանողական կազմակերպութիւնների, միութիւնների եւ սկաուտական միաւորների նախաձեռնութեամբ: Օրւայ առթիւ ելոյթով հանդէս եկած Գեւիկ Մկրտչեանի խօսքի հիմքում Ադրբեջանի ձախողած պատերազմն էր եւ ողջ հայութեան համախմբման գործօնը, որի պահպանումը ամենակարեւոր ազգային հիմնաքարն է այսօր:
Մատուռի դուռը բաց էր եւ զոհւած զինւորների հոգու անմահութեան մոմերն էին վառւում:
Այստեղ, իրենց հերթին, երիտասարդները նիւթաբարոյական օժանդակութիւն էին կատարում ի զօրակցութիւն Արցախի:
alikonline.ir [1]