ՀՅԴ Բյուրոյի քաղաքական ներկայացուցիչը ամփոփեց ՀՅԴ նախընտրական քարոզարշավը

Այսօր ՀՅԴ Բյուրոյի քաղաքական ներկայացուցիչ Արմեն Ռուստամյանը լրագրողների հետ հանդիպման ժամանակ ամփոփեց նախընտրական քարոզարշավը: Նրա խոսքով՝ Դաշնակցությունն այն քաղաքական ուժն է, որը որևէ վարչական լծակ չի օգտագործել ընտրությունների արդյունքների վրա ազդելու համար:

«Մենք զերծ ենք մնացել գայթակղությունից` օգտագործել որևէ լծակ: Ժողովրդավարական ընտրություններ ունենալու համար լուրջ հիմքեր ենք ստեղծել, չնայած նրան, որ վարկանիշային թեկնածուների մեծ թիվը և, առհասարակ, վարկանիշային ընտրակարգը մեր սրտով չէր: Սա կոմպրոմիսի արդյունք էր, բայց ասում ենք, որ բարձր մակարդակի ընտրություններ անցկացնելու տարբերակը մի քիչ նսեմացվել է այս ընտրակարգով»,- ասաց Ռուստամյանը՝ հավելելով, որ իրենք խնդիր են դրել ժողովրդին բացատրել, որ չի կարելի գերդաստանային կապերի միջոցով գնալ ընտրությունների:

Հարցին՝ առաջիկա խորհրդարանում ՀՅԴ-ն պայքարելո՞ւ է ռեյտինգային ընտրակարգի դեմ, և քննարկումներ լինելո՞ւ են այս առնչությամբ ՀՀԿ-ի հետ, նա պատասխանեց, որ այդ ընտրակարգին դեմ են նաև այլ քաղաքական ուժեր: «Մենք հենց սկզբից ենք ունեցել քննարկումներ ՀՀԿ-ի հետ: Մեր գործընկերները տեղյակ են, որ մենք սրան դեմ ենք, հենց հարմար առիթ եղավ, մենք այս խնդիրը կրկին բարձրացնելու ենք: Բոլոր քաղաքական ուժերն էլ դեմ են խոսել ռեյտինգային ընտրակարգին»,- նշեց Ռուստամյանը:

Նրա խոսքով՝ ստեղծված է մի իրավիճակ, որ իշխանության վերարտադրություն չլինի: «Իշխանությունների վերարտադրության համար երկու հիմք կար` մեծամասնական ընտրակարգը, բացակաների, ուրիշների փոխարեն քվեարկությունները, որոնք լցոնումների, կարուսելների հնարավորություն էին տալիս, և սա բերում էր նրան, որ լինում էին ուռճացված թվեր: Այս ընտրություններին մասնակցությունը լինելու է շատ ավելի քիչ, որովհետև ուրիշների փոխարեն քվեարկություն չի լինելու: Մենք այդ երկու ռեսուրսներից զրկել ենք իշխանություններին»,- ասաց Ռուստամյանը:

ՀՅԴ Բյուրոյի քաղաքական ներկայացուցիչ Արմեն Ռուստամյանի խոսքով՝ քաղբանտարկյալ լինելու համար պետք է հինգ չափորոշիչի համապատասխանել: Այսօր պատասխանելով լրագրողների հարցին՝ ՕՐՕ դաշինքի համակիր Սամվել Բաբայանի ձերբակալության հիմքում շատերը տեսնում են քաղաքական դրդապատճառ, Դաշնակցությունն ինչպե՞ս է գնահատում նախընտրական շրջանում նման ձերբակալություններն ու իրադարձությունները, հատկապես, որ ՀՅԴ-ն ոչ վաղ անցյալում ունեցել է ձերբակալությունների փորձ, նա ասաց. «Մեզ մոտ շատ ավելի տխուր փորձ է եղել, կուսակցություն է փակվել: Եթե ինչ-որ անձ հանցագործություն է կատարում և եթե կատարել է նախընտրական փուլում, ուրեմն այդ հանցագործության դեմ որևէ քայլ չպե՞տք է կատարվի, նա չպե՞տք է պատժվի: Մերը հստակ քաղաքական էր, որովհետև փակվեց կուսակցությունը: Եթե հանցագործություն է կատարվում, ժամանակահատվածը կապ չունի, պետք է պատժվի, ով էլ լինի»:

Ռուստամյանի խոսքով՝ Սամվել Բաբայանին իրենք ճանաչել են լավագույն հատկանիշներով՝ ազատագրական պայքարի ժամանակ:

«Ցավում եմ, որ նրա անունն այս պատմության մեջ կա, բայց քանի օրենքով ուժի մեջ մտած դատավճիռ չկա, մենք պարտավոր ենք առաջնորդվել անմեղության կանխավարկածով: Բայց ես չեմ բացառում… Ասում են, որ ծուխն առանց կրակի չի լինում, ինչ-որ մի բան կա, բայց ի՞նչ կա, ես տեղյակ չեմ, քննություն է ընթանում, և քանի քննության տվյալները չկան, դրանց մասին խոսելն անլուրջ է»,- նշեց նա` հավելելով. «Իհարկե, մարդիկ կարող են սա օգտագործել, նախընտրական փուլում շատերն անկապ բաներ են անում, հիմա չեն հրաժարվի դա անելու գայթակղությունից, բայց քաղբանտարկյալ անվանել կամ նման հայտարություններ անել, կարծում եմ, շատ վաղաժամ է. քաղբանտարկյալ լինելու համար հինգ չափանիշ է պետք»:

Արմեն Ռուստամյանը լրագրողների հետ հանդիպման ժամանակ անդրադարձավ առաջին նախագահ Լևոն Տեր-Պետրոսյանի առաջ քաշած՝ Ղարաբաղյան խնդրի կարգավորմանն առնչվող թեզերին: «Այս ամենի մեջ, որպես դրական կողմ, տեսնում եմ այն, որ մենք ամբողջ աշխարհին ներկայանում ենք որպես քաղաքակիրթ ժողովուրդ, հանդուրժող հասարակություն ունեցող պետություն, որտեղ կարող են ազատ քննարկումներ իրականացվել, ինչպիսին իրականացնում է ՀԱԿ-ը»,- ասաց նա` հավելելով, որ տպավորություն է՝ վերոնշյալ քաղաքական ուժն իրականացնում է Ադրբեջանի քարոզչությունը:

«Կա քաղաքական ուժ, որ հենց Ադրբեջանի քարոզիչն է դարձել, որովհետև այն, ինչ ասում են նրանք, դուք ուղիղ կլսեք նաև պաշտոնական Բաքվի շուրթերից»,- նշեց Ռուստամյանը:

Նա համոզված է, որ այդ առաջարկը կործանանար է ՝ նկատի ունենալով այն հարևանի գործոնը, ում հետ, ըստ այդ ծրագրի, պետք է այդ խաղաղությունն ունենանք: «Այդ հարևանն ուզում է քո՝ օր առաջ ոչնչացումը, դրանով է դաստիարակում իր ամբողջ սերնդին, որևէ զիջում այդ հարևանը չի պատրաստվում կատարել: Էդ որ ասում են` փոխզիջում, իրականում նման բան չկա: Ադրբեջանի ամենաբարձր զիջումն այն է, որ Ղարաբաղին տան ինքնավարություն Ադրբեջանի կազմում: Դա ծիծաղելի է պարզապես: Էլ չեմ ասում, որ այդ ծրագիրն առաջարկելուց առաջ պետք էր հարգել սեփական ժողովրդի կարծիքը և հաշվի նստել ժողովրդի կարծիքի հետ, իսկ այդ կարծիքի հետ Տեր-Պետրոսյանը երբեք հաշվի չի նստել»,- ընդգծեց ՀՅԴ-ական գործիչը:

Նրա բնորոշմամբ՝ Լևոն Տեր-Պետրոսյանն իր կյանքի նպատակն է դարձրել մեզ պարտադրել բոլորովին այլ հայեցակարգ, որը չի համատեղվում Ղարաբաղի ժողովրդի պատկերացումների հետ:

Դիտարկմանը, թե Լևոն Տեր-Պետրոսյանն ասում է, որ ինքն առաջարկում է այն ծրագիրը, որի շուրջ Հայաստանի իշխանություններն են բանակցում, Ռուստամյանն արձագանքեց. «Նախ` հարց է առաջանում` եթե Սերժ Սարգսյանը դա անում է, Լևոն Տեր-Պետրոսյանի մեջտեղ գալու իմաստը ո՞րն է: Հիմա դու եկել ես հրապարակ, ի՞նչ ես անում, համ էլ ասում ես ՝ ես ընդդիմությո՞ւն եմ: Հետո էլ ասում է՝ միայն այդ մասով է պաշտպանում Սարգսյանին, բայց մյուս խոսքն էլ այն է լինում, որ այն բոլոր պրոբլեմները, որ այսօր Հայաստանում կան՝ արտագաղթ և այլ չլուծված խնդիրներ, Ղարաբաղի չլուծված խնդրի պատճառով են: Սա նշանակում է, որ նա արդարացնում է գոյություն ունեցող խնդիրները»:

Ռուստամյանը նշեց նաև, որ մադրիդյան սկզբունքները ներառում են կարևոր տարրեր, որոնց մասին Լևոն Տեր-Պետրոսյանը չի ցանկանում խոսել: «Այդտեղ կարգավիճակի լուծման ձև կա, նրա ժամանակ այդ լուծումը չկար, կար փուլային տարբերակ` որ ամեն ինչ հանձնենք, նոր հետո անդրադառնանք կարգավիճակի հարցին: «Տարածքներ կարգավիճակի դիմաց» սկզբունքը ենթադրում է կարգավիճակի ստացում, հետո նոր տարածքների հանձնում, իսկ նրանք հակառակն են ասում: Թող դրա մասին խոսեն, ուրիշներին մեղադրելը հեշտ է: Լևոն Տեր-Պետրոսյանը թող պատասխանի հարցին՝ ո՞նց եղավ, որ իր շրջապատը հանդուրժում էր իրեն, բայց երբ փաստաթուղթ բերվեց, և Անվտանգության խորհուրդը հասկացավ, որ այս փաստաթղթի ստորագրումն ինչ վտանգներ է պարունակում, որ դա ձեռնտու է Ադրբեջանին, այլ պահվածք որդեգրեց: Ադրբեջանը մադրիդյան սկզբունքներին դեմ է, սա շատ կարևոր է»,- ասաց նա:

Արձագանքելով դիտարկմանը` եթե այս փաստաթուղթը չստորագրվի, մեզ առաջարկվելու է ավելի վատ պայմաններով փաստաթուղթ, Ռուստամյանն ասաց. «Պատերազմի մեջ գտնվող երկրում այսպիսի՝ ուժերը ջլատող քարոզչություն իրականացնել ինչպե՞ս կարելի է: Նա ասում է այն, ինչ ասում է Արբեջանը»:

Նրա խոսքով՝ Եվրախորհրդի իր գործընկերների բերանից նույն բանն է լսում, բայց չէր ցանկանա նույն շարքում տեսնել նաև Լևոն Տեր-Պետրոսյանին: «Նրանց ես նույն պատասխանն եմ տալիս` բայղուշություն մի ՛ արեք մեր ժողովրդի գլխին»,- եզրափակեց Արմեն Ռուստամյանը:

Տպել Տպել