Եթե ՀՀԿ-ն չհրաժարվի ռեյտինգայինը պահելու մոտեցումից, կարող է հայտնվել մեկուսացման մեջ

ԱԺ ՀՅԴ խմբակցության ղեկավար Արմեն Ռուստամյանի կարծիքով` Ընտրական օրենսգրքի հետ կապված հարցերի լայն սպեկտր կա, որը պետք է քննարկվի: Այս մասին նա ասաց խորհրդարանում լրագրողների հետ զրույցում: Պատգամավորը նշեց, որ իրենք պատրաստ են դա անել՝ նկատի ունենալով նախորդ ընտրություններում բացթողումներն ու մտահոգությունները, որոնց մասին բարձրաձայնվել է:

«Կարևորագույն հարցը մնում է ռեյտինգային ընտրակարգից հրաժարվելը: Բայց մենք ընդհանրապես ռեյտինգից հրաժարվելու հարցը չէ, որ դնում ենք, ռեյտինգի կիրառումն անձնավորված դասական տրամաբանության մեջ իրականացնելու կողմնակից ենք»,- ասաց նա:

Ռուստամյանը մանրամասնեց, որ դա ենթադրում է բաց ցանկերով քվեարկություն` ամբողջ հանրապետությունով մեկ: «Սա ամենաժողովրդավարական ձևն է, այսինքն` ընտրողը ոչ միայն կուսակցություն է ընտրում, այլ նաև այդ ցուցակի մեջ նախասիրություն արտահայտում որևէ անձի նկատմամբ: Այսպես ստացվում է, որ կուսակցությունը չէ, որ որոշում է հերթականությունը, թե ով պետք է անցնի, այլ որոշում է ժողովուրդը, թե մանդատները կուսակցության մեջ ում տրվեն: Սա ամենաժողովրդավարական և տարածված ձևն է»,- պարզաբանեց նա, ապա շարունակեց, որ իրենք ասում են՝ պետք է հնարավորություն տալ ընտրողին, որ ոչ միայն ցուցակն ընտրի, այլ նաև այդ ցուցակից ում է ուզում, որ անցնի:

Հարցին՝ Հանրապետականը պաշտպանում էր ռեյտինգային ընտրակարգը, հիմա արդյո՞ք հետ կկանգնի, պատգամավորը պատասխանեց. «Ես կարծում եմ՝, որ եթե այս հարցում Հանրապետականը փորձի պահպանել ռեյտինգային ընտրակարգը պահելու պահանջը, կհայտնվի մեկուսացման մեջ, և չեմ կարծում, որ դա նրանց համար նախընտրելի է»:

Նա ընդգծեց, որ իրենց առաջարկը կարող է նաև ընդունելի լինել բոլորի համար: «Ընտրությունն անձի հետ կապված կատարվում է ամբողջ հանրապետությունում, ոչ թե առանձին վերցված տարածքներում, այսպես կարևորվում են քաղաքական դեմքերը, ոչ թե տարածում հեղինակություն ունեցող անձինք»,- բացատրեց Ռուստամյանը:

Նրա խոսքով՝ իրենց համար կարևոր է նաև հետընտրական զարգացումների ընթացքում մասնակիցներին օժտել այնպիսի մեխանիզմներով, որ կարողանան ոչ միայն արձանագրել կեղծիքները, այլ նաև դրանց ծավալը:

Ռուստամյանը հայտնեց, որ հանձնախմբի հետ հանդիպել են, նրանց առաջարկները տրամաբանական են, մոտեցումները՝ հիմնականում ընդունելի: «Պատրաստ ենք քննարկել բոլոր ողջամիտ առաջարկները: Ավելորդ հապճեպություն այս հարցում պետք չէ, սա սահմանադրական օրենք է և պետք է հասնել կոնսենսուսով փոփոխության»,- ասաց նա և ավելացրեց, որ քաղհասարակությունն էլ պետք է ընդգրկվի, ինչպես նաև արտախորհրդարանական ուժերը կարող են դերակատար լինել, որովհետև նրանք կարող են մասնակցել ապագա ընտրություններին, և նրանց անտեսել չի կարելի: Ըստ պատգամավորի՝ այս գործընթացները պատշաճ կատարելուց հետո նոր միայն կարելի է խոսել արտահերթ ընտրությունների մասին:

Ռուստամյանը հայտարարեց, որ ՀՅԴ-ն ունի նաև առանձին առաջարկը: «Քանի որ ոստիկանությանը նախատեսվում է տալ հատուկ լիազորություններ, և պետք է ստեղծվի հատուկ ստորաբաժանում, որը պետք է ընտրական իրավունքը վերահսկի, առաջնահերթ է դառնում ոստիկանության ենթակայության հարցը փոխելը: Այսօր ոստիկանությունը անմիջապես ենթակա է վարչապետին: Վարչապետը, ով էլ լինի, քաղաքական ուժ է ներկայացնելու, և ոստիկանությունը չի կարող այս գործընթացում մեկի ենթակայության տակ լինել, ով ունի շահագրգռվածություն, ուստի պետք է սա փոխել, ոստիկանությունը հանել վարչապետի ենթակայությունից և դնել կառավարության ենթակայության տակ»,- պարզաբանեց նա:

Հարցին՝ ՀՅԴ-ն այս փոփոխություններից հետո կկարողանա՞ հաղթահարել անցողիկ շեմը, Ռուստամյանը պատասխանեց. «Մնացած քաղաքական ուժերից Դաշնակցության տարբերությունն այն է, որ, լինելով գաղափարական կուսակցություն, ունենք մեր կայուն էլեկտորատը: Այնքան փոփոխություն ենք տեսել այս ընթացքում, բայց կա որոշակի զանգված, որ մեր էլեկտորատն է, և դա պահպանվել է»:

Իսկ թե արդյո՞ք մտավախություն չունեն, որ անցողիկ շեմը չեն հաղթահարի, Ռուստամյանն ասաց, որ իրենք ընդհանրապես մտահոգություն չունեն, անգամ այն դեպքում, եթե պատգամավոր չունենան ԱԺ-ում: Նա նաև նշեց, որ միայնակ են գնալու ընտրություններին: «ՀՅԴ-ն, դաշինքների մեջ մտնելով, գաղափարական խնդիրներ կկորցնի, սա է մեր տեսակի հիմնական տարբերությունը»,- ասաց նա:

yerkir.am

Եթե ՀՀԿ-ն չհրաժարվի ռեյտինգայինը պահելու մոտեցումից, կարող է հայտնվել մեկուսացման մեջ

Մենք պատրաստ ենք Ընտրական օրենսգրքի շուրջ քննարկումների, լրագրողների հետ զրույցում նշեց ՀՅԴ խմբակցության ղեկավար Արմեն Ռուստամյանը։

Նա նկատեց, որ իրենց համար շարունակում է առաջնային մնալ ռեյտինգային համակարգի վերանայման հարցը։

«Մենք ռեյտինգից ընդհանրապես հրաժարվելու հարցը չենք դնում, պարզապես ռեյտինգի կիրառումը անձավորված, դասական տրամաբանության մեջ իրականացնելու կողմնակից ենք։ Դա ենթադրում է բաց ցանկերով քվեարկություն ամբողջ հանրապետությում։ Սա ամենաժողովրդավարական տարբերակն է։ Ընտրողը ոչ միայն կուսակցությանն է ընտրում, այլև այդ ցուցակում իր նախընտրած անձին։ Այսպիսով կուսակցությունը չի որոշում հերթականությունը, թե ով պետք է անցնի, այլ ժողովուրդն է որոշում մանդատները կուսակցության մեջ ում տրվի», – նշեց Ռուստամյանը։

Անդրադառնալով որպես այլընտրանայքին տարբերակ առաջարկվող փակ ցուցակներին՝ Ռուստամյանն ասաց, որ երկու տարբերակն էլ իրենց համար ընդունելի է, բայց ավելի ժողովրդավարական է վերը նշվածը, որովհետև փակ ցուցակի դեպքում մարդն ընտրում է ցուցակը և այլևս չունի հնարավորություն ցուցակի դասավորության մեջ միջամտություն կատարելու։

Հարցին հնարավո՞ր է, որ ՀՀԿ-ն մնա իր դիրքորոշմանը և հրաժարվի ռեյտինգային համակարգը փոխելու առաջարկից, Ռուստամյանը նշեց, որ այդ դեպքում ՀՀԿ-ն կարող է հայտնվել մեկուսացման մեջ։

«Մենք առաջակում ենք տարբերակ, որը ընդունելի է բոլորի համար՝ ռեյտինգայինից ամբողջությամբ չենք հրաժարվում, այլ դասական ռեյտինգային ենք կիրառում։ Ընտրությունը՝ անձի հետ կապված, կատարվում է ամբողջ հանրապետությունով, ոչ թե առանձին վերցրած տարածքներով։ Այս դեպքում կարևորվում են քաղաքական անձինք, այլ ոչ թե տարածքում որոշակի հեղինակություն ունեցողները», – նշեց նա։

aysor.am

Տպել Տպել