Գյուղնախարարը պատմում է, որ տնտեսական քաղաքականության շատ հարցերում իրենք ունեն իրենց մոտեցումները
Գյուղատնտեսության նախարար Արթուր Խաչատրյանը ՀՅԴ-ի կազմակերպած սոցիալ-տնտեսական քաղաքականության մասին հանրային քննարկման ժամանակ հայտարարեց, որ վերջին տարիներին տնտեսությունն անշեղորեն աճել է, բայց երբ որ խոսում են տնտեսական աճի մասին, մարդիկ զայրացած իրենց են նայում, որովհետեւ հասարակությունը բեւեռացված է: Ըստ նրա՝ տնտեսությունն անշեղորեն աճում է, բայց ունենք արտագաղթ, որովհետեւ կա անարդարություն:
«Առավոտի» հետ զրույցում հարցին՝ եթե սա ասեր վերջին տարիներին ընդդիմություն եղած, իշխանական կոալիցիայի մաս չկազմած կուսակցության ներկայացուցիչ, ինչ-որ չափով հասկանալի կլիներ, բայց եթե ՀՅԴ-ն ունեցել է պորտֆելներ, ունեցել է լծակներ՝ ազդելու իշխանական որոշումների վրա, ինչո՞ւ չի արել այս տարիներին, նախարարը պատասխանեց. «Մենք նախկին նախագահի հրավերքով 2016-ին, հասկանալով իրավիճակի օրհասականությունը, անդամակցեցինք կառավարությանը: Եթե դուք նայեք մեր նախարարների գործունեությունը, ապա ընդգծված ձախակողմյան է եղել: Մենք միշտ էլ ասել ենք՝ պետք է ստեղծել մեխանիզմներ, որոնք կարող են ստեղծված արժեքը ճիշտ վերաբաշխել հասարակության անդամների միջեւ: Այս կառավարությունում էլի մենք ունենք 2 նախարար, ու էլի մենք այս կառավարության մեջ ընդգծված ձախ ենք, նույնիսկ կառավարության նիստերի ժամանակ էլ կտեսնեք, որ մենք խոսում ենք, որ փոքր ձեռնարկատերերին պետք է պաշտպանենք, երբ հարցը գնաց 115-ից 58 մլն-ի իջեցնելուց, նաեւ երբ խոսք էր գնում տեղական արտադրողների նկատմամբ պրոտեկցիոնիստական քաղաքականության իրականացման մասին, այստեղ էլ էլի կտեսնեք, որ ռեպլիկների տեսքով մենք ցույց ենք տալիս՝ որոնք են մեր մոտեցումները: Բայց պետք է հասկանանք՝ կա կառավարություն, կա կառավարության մեծամասնություն, ուղղակի մենք այն կառավարության մեջ էլ, այս կառավարության մեջ էլ ընդգծված ձախակողմյան քաղաքականություն ենք իրականացրել: Բայց միջոցները սահմանափակ են: Եթե մենք ունենանք ամբողջական իշխանություն ինչ-որ մի պահի, կտեսնեք, որ մենք մեր ուղղվածությունը շարունակում ենք»:
Գյուղնախարարն ասաց, որ երբ իրենք խոսում են ստեղծված արժեքի բաշխման մասին, դա նաեւ աշխատատար ճյուղերի զարգացմանն է վերաբերում. «Նպաստի փոխարեն, երբ մարդը նպաստ է ստանում, ավելի լավ է գնա աշխատատար ցածր մարժայով ձեռնարկությունում աշխատի, բայց գումար ստանա, որ չեղած տեղից փող ստանալու այդ մշակույթը դուրս գա: Ընտանիքը եթե 20 տարի նստած է սոցիալական համակարգի վրա, ուրեմն այդ սոցիալական համակարգն ինչ-որ մի տեղ խաթարվել է»:
Մեր դիտարկմանը, որ մինչ նպաստառուների ցուցակից մարդկանց հանելը պետք է նախ աշխատատեղեր ստեղծվեն՝ Արթուր Խաչատրյանն արձագանքեց. «Հենց դա ենք ասում՝ պետությունը պետք է իր վրա վերցնի ակտիվ գործառություններ: Ծայրահեղ դեպքերում կա՛մ ինքը կարող է ձեռնարկություններ ստեղծել, կա՛մ պետություն-մասնավոր հատված գործընկերության շրջանակներում ձեռնարկություն լինի: Կա մեծ կառավարության գաղափարախոսություն, կա՝ փոքր: Փոքրն ասում է՝ ես ձեռքերս լվանում եմ, շուկան ինքն իրեն կկարգավորվի, եթե մեծ ձախողումներ են լինում, այդ դեպքում թիրախային ինտերվենցիա եմ անում, եւ կա մյուս մոտեցումը, որն ասում է՝ պետությունը պատասխանատու է տնտեսության համար, պետությունը պատասխանատու է ժողովրդի համար եւ սոցիալական բարեկեցության համար, ակտիվ քայլեր է ձեռնարկում: Մենք ասում ենք, որ պետք է այնքան շուկա, որքան հնարավոր է, եւ այնքան միջամտություն, որքան անհրաժեշտ է, մենք խրախուսում ենք մրցակցությունը, բայց եթե տեսնում ենք, որ մրցակցության արդյունքում բացեր են առաջանում՝ ձեռնարկություններ չեն ստեղծվում, ձեռնարկությունները Երեւանի կենտրոնում են ստեղծվում, այդ դեպքում արդեն անմիջականորեն պետք է մասնակցել»:
Հ. ՋԵԲԵՋՅԱՆ
16 օգոստոսի 2018
© 1998-2018 Առավոտ
