- Հայ Յեղափոխական Դաշնակցութիւն - https://old.arfd.am -

Մենք Քոչարյանին չենք աջակցել և չենք էլ պատրաստվում աջակցել

[1]Մենք Ռոբերտ Քոչարյանին չենք աջակցել և չենք էլ պատրաստվում աջակցել. խորհրդարանում լրագրողների հետ զրույցում ասաց ՀՅԴ խմբակցության ղեկավար Արմեն Ռուստամյանն` անդրադառնալով հարցին, թե ինչո՞ւ է ՀՅԴ-ն անվերապահորեն սատարում երկրորդ նախագահին:

«Ընդհանրապես, կուռքեր չպետք է ստեղծի մեր ժողովուրդը: Դժբախտաբար, ես 88 թվականից այդ վիճակը տեսել եմ, նորից նույն սխալը չկրկնենք: Կուռքեր չկան, անվերապահ որևէ մեկին պաշտպանել ոչ մեկին խորհուրդ չեմ տալիս: Մեր՝ անվերապահ պաշտպանությունն արժեհամակարգին է վերաբերում, միայն դրան»,- պարզաբանեց պատգամավորը:

ՀՅԴ-ական պատգամավորը շեշտեց, թե՝ իրենք ասում են՝ մի դատիր, որ չդատվես, բայց եթե դատում ես, պետք է դատես առանց ցասումի և կողմնակալության: «Սա է հանրահայտ ճշմարտությունը, եթե մի անգամ մենք մեր կրքերով, զգացմունքներով և անաչառ չլինելով դատեցինք, վաղը դա կդառնա նորմ և հետո դրա դեմ պետք է պայքարենք: Չի կարելի անարդարության դեմ ոչ արդար միջոցներով պայքարել՝ սա է մեր ասածը` կլինի Ռոբերտ Քոչարյանի, թե որևէ մեկ ուրիշի դեպքում»,- հայտարարեց նա:

Ռուստամյանը նկատեց, որ անգամ մեղադրվողը իրավունքներ ունի: «Մենք այդ մակարդակին հասած ազգ ենք, մենք քարե դարում չենք ապրում, որ զգացմունքներով դատենք: Եթե դատարանը մեղավոր կճանաչի, թող ամենախիստ պատիժը տա, վերջանա հարցը, բայց պետք չէ դատարանից առաջ ընկնել: Այդպես կարելի է ցանկացածին դատել, և մենք կունենանք հասարակություն, ուր բոլորը բոլորի դեմ են լարվելու: Այդ մթնոլորտը ես, դժբախտաբար, տեսնում եմ, սա է ինձ մտահոգում»,- ասաց նա:

Հարցին էլ` կհամագործակցե՞ն Ռոբերտ Քոչարյանի հետ, Ռուստամյանն ասաց, որ իրենք համագործակցում են ցանկացած անձի հետ, ով կիսում է ՀՅԴ մոտեցումներն ու նպատակները: «Այդպես որ լիներ՝ մենք ՀՀՇ-ի հետ էլ չպետք է համագործակցեինք, ՀԱԿ-ի հետ քառյակ չպետք է կազմեինք, երբ ուղիղ մեզ հետ են խնդիր ունեցել: Մենք Լևոն Տեր-Պետրոսյանին ընդունել ենք մեր գերագույն մարմնում, և ինչ քարկոծում ասես՝ եղել է նաև այդ ժամանակ: Բայց մենք համարել ենք, որ ճիշտը դա է, որովհետև մենք մեր երկրում թշնամիներ չպետք է ունենանք»,- նշեց նա:

Անդրադառնալով հարցին, թե կիսո՞ւմ են Քոչարյանի կողմնակիցների մտահոգությունները, որ նրա նկատմամբ քաղաքական հետապնդում է իրականացվում, ՀՅԴ խմբակցության ղեկավարը պատասխանեց, որ քաղբանտարկյալների մասով կան հինգ չափորոշիչներ, բայց դրանք չեն կիրառվել որևէ մեկի նկատմամբ, որպեսզի հնարավոր լինի հստակ ասել՝ ով է քաղբանտարկյալ:

«Քաղաքական հետապնդումների մասին կարող է միայն խոսք գնալ այն ժամանակ, երբ կապացուցվի, որ այդ հինգ չափորոշիչներից մեկը խախտվել է: Մենք ասել ենք՝ այն մեղադրանքը, որը դրվել է, այդ մեղադրանքն, այո, կարող է այդպիսի տպավորություն առաջացնել: Եվ մենք արդեն տեսնում ենք, որ այն միանշանակ չի: Ավելի լավ է մարդուն ներկայացնես այնպիսի մեղադրանք, որի համար ունես հսկայական փաստեր, քան՝ մի բանում մեղադրես, որը դեռ պետք է ապացուցվի, հետո գտնենք՝ մեղավորն ով է: Մենք այսօր ունենք 10 զոհերի փաստը, և պետք է գտնել՝ ովքեր են մեղավորները՝ անաչառ կատարելով բոլոր բացահայտումները, իր ամբողջության մեջ: Իսկ երբ առաջադրում եք մեղադրանք, որը դեռ պետք է ապացուցվի, այդ դեպքում նա կարող է դրանով արդարանալ»,- ասաց նա:

Մենք պետք է շարունակենք մնալ այն հիմքի վրա, որ մեր երկրում գործում են օրենսդրական կարգավորումներ, Սահմանդրություն և դա որևէ ձևով շրջանցելն ուղղակի անընդունելի է, մեզ ամբողջ աշխարհը չի հասկանա, հայտարարեց ԱԺ ՀՅԴ խմբակցության ղեկավար Արմեն Ռուստամյանն` անրդադառնալով վարչապետի սահմանադրական փոփոխություններ անցկացնելու մտադրությանը:

Ռուստամյանի խոսքով` Հայաստանը տարբեր միջազգային կառույցների հետ ձևավորել է օրենսդրական դաշտը և այդ օրենսդրական դաշտը մեկ օրում ոչնչացնել հնարավոր չէ: «Մենք հակասահմանադրական որևէ միջոցառման կամ ծրագրի չենք պատրաստվում մասնակից դառնալ»,- հայտարարեց նա:

Պատգամավորը հայտարարեց, որ վարչապետի կողմից հրապարակում հնչեցրած բոլոր գաղափարները քննարկման կարգ ու ձև ունեն: «Բայց դատարաններ կան, պետական մարմիններ կան, և մեկ օրում համարել, որ դրանք գոյություն չունեն, ճիշտ ճանապարհ չէ: Ես չեմ կարծում, որ վարչապետը դա նկատի ունի, քանի որ ԱԺ նախագահի հետ հանդիպումից հետո լավատեսությունն, այդ առումով, ավելի մեծացել է: Մենք էլ պատրաստ ենք բոլոր քննարկումներին մասնակցել, մեր լուման բերել, հասկանանք` ինչ ենք ուզում անել և ինչի համար»,- հայտարարեց նա:

Ռուստամյանը շեշտեց, որ արտահերթ խորհրդարանական ընտրություններն այսօր մեկ ճանապարհ ունեն` դա երկու անգամ վարչապետ չընտրելն է: Նա նաև ասաց, որ չի կարծում` վարչապետի մտավախությունը տեղին է, թե խորհրդարանը կարող է գաղտնի վարչապետ ընտրել: «Եթե նա ինչ-որ դավադրություններ է տեսնում, վարչապետի խոսքից դա կարելի էր նկատել, ես, ճիշտն ասած, դրա հիմքերը չեմ տեսնում: Առայժմ չի եղել նման դեպք, որ մի բան պայմանավորվենք ու չարվի: ԱԺ-ն իր այսօրվա կարգավիճակով որևէ կերպ չի խոչընդոտում գործադիրի աշխատանքներին, այն օրենքները, որ պետք են, ընդունում է, անգամ անձեռնմխելիությունից զրկեց իր գործընկերոջը: Չեմ պատկերացնում, թե այդ կասկածանքն ինչից է առաջացել, եթե կա այդպիսի կասկածանք, ճիշտ կլինի դրա մասին խոսենք, հասկանանք՝ դա իրակա՞ն է, թե՞ոչ»,- ասաց նա:

Պատգամավորն արձանագրեց, որ եթե այդ կասկածանքը փարատելու համար այդ ճանապարհն է ընտրվում, դա նորից պետք է ԱԺ միջոցով կատարվի: «Դրա համար 70 ձայն է պետք, էլի նույն ԱԺ-ն պետք է անի, չէ՞: Եթե նախապես կա այն տպավորությունը, որ այստեղ ինչ-որ դավադրություններ կան, 70 ձայնի դեպքում չի աշխատո՞ւմ այդ դավադրությունը»,- նշեց նա:

Եթե ժողովուրդն է որոշում, որ Սահմանադրությունը պետք է փոխվի, Ռուստամյանի խոսքով, ամբողջ աշխարհը ժողովրդի իշխանությունը հասկանում է մեկ ձևով՝ հանրաքվե, ոչ թե հրապարակ: Նրա խոսքով՝ չի կարող հրապարակի որոշումը համարվել ամբողջ ժողովրդի որոշում: Նա նաև հավելեց, որ իրենք դեմ չեն հանրաքվեին, սակայն այդ դեպքում բոլոր հարցերը պետք է դրվեն հանրաքվեի և ոչ միայն այս մեկը: