Երևանի ավագանու ընտրությունների քարոզարշավի շրջանակներում այսօր ՀՅԴ թեկնածուները հանդիպել են Երևանի Նոր Նորք վարչական շրջանի բնակիչների հետ: ՀՅԴ-ի թիմը շրջեց փողոցներով, լսեց մարդկանց, ծանոթացավ խնդիրներին, ներկայացրեց իրենց ծրագիրը, որն ուղղված է հենց այդ խնդիրների լուծմանը:
ՀՅԴ քաղաքապետի թեկնածու Միքայել Մանուկյանը լրագրողների հետ զրույցում, անդրադառնալով հարցին` որքանո՞վ է իրենց հաջողվում ընտրողին համոզել, որ հենց ՀՅԴ-ին ձայն տան, պատասխանեց. «Պետք է համոզենք, դա մեր պարտքն է: Դա մեզ մոտ ստացվում է»:
Մանուկյանի խոսքով` այսօր քաղաքացիներն, իրոք, համերաշխության պահանջ ունեն: «Մենք ենք համերաշխության կրողը ու պետք է մեր գործով և պահվածքով համոզենք, որ կարող ենք արդյունավետ կառավարել քաղաքը, ապահովել համերաշխությունը»,- ասաց նա:
Իսկ թե հիմնականում ինչի՞ց են բողոքում երևանցիները, Մանուկյանը նշեց, որ խնդիրները բազմազան են: «Երևանում չկա մի ոլորտ, որ խնդիր չունենա: Եթե ինչ-որ բաներ էլ արված են, դրանք վերջնական փուլին հասած չեն. աղբահանության խնդիր կա, կանաչապատման խնդիր կա, Երևանում հիմնականում շեշտը դրվել է ծաղկապատման վրա, այնինչ շատ կարևոր է ծառապատումը: Բազմաթիվ են խնդիրները»,- ասաց նա:
Հարցին էլ` ո՞ւմ են համարում իրենց մրցակից, Մանուկյանն ասաց. «Բոլորին էլ մրցակից ենք համարում, բայց ամենալավը մենք ենք»:
