Այն, ինչ պարտադրանքով փորձ է արվում իրականացնել, մեր համար անընդունելի է, իսկ դեկտեմբերին ընտրությունների անցկացումը, ըստ էության, պարտադրանք է. խորհրդարանում լրագրողների հետ զրույցում հայտարարեց ԱԺ ՀՅԴ խմբակցության ղեկավար Արմեն Ռուստամյանը` անդրադառնալով արտահերթ խորհրդարանական ընտրություններին և այդ նպատակով ԱԺ արտահերթ նիստում քննարկվող ԸՕ բարեփոխումների նախագծին։
«Մենք ենք ստեղծել այս ֆորսմաժորը։ Ստեղծել ենք ճգնաժամ, ուզում ենք հաղթահարել։ Այս ճգնաժամը ստեղծվել է այն պարզ պատճառով, որ դրվել է պարտադրանք` ընտրություններն անցկացնել դեկտեմբերին։ Ամեն ինչ հարմարեցվում է դեկտեմբերին: Չենք հասցնում` ընտրական մասնագիտացված հանձնաժողովներն ուսուցումով ձևավորվեն, անգամ այդ պահանջն է հանվել, քանի որ դեկտեմբերը դրված է որպես գլխավոր հարց: Մենք ի՞նչ որակի ընտրություն ենք ուզում անցկացնել, սա է խնդիրը»,- ասաց պատգամավորը:
Ռուստամյանն ասաց, որ իրենք դեմ են հատուկ ռեժիմին, սակայն եթե քվեարկության դրվի ԸՕ-ն, իրենք կողմ կքվեարկեն: Նա անընդունելի համարեց, որ ոստիկանությանը ընտրությունները վերահսկելու դեր է վերապահվում, սակայն այդ կառույցը ենթարկվում է մի քաղաքական ուժի ներկայացուցիչներին:
Պատգամավորը նաև չբացառեց, որ այս ԸՕ-ն չի ընդունվի:
Հարցին` ՀՀԿ-ն ասաց, որ կողմ չի քվեարկի, սա սաբոտա՞ժ է, Ռուստամյանը պատասխանեց. «Ի՞նչ է նշանակում սաբոտաժ, նրանք իրենց տեսակետն են հայտնում: Մենք ասում ենք` ճիշտ է ԸՕ փոխելը, բայց այս ԸՕ-ն փոխելուց հետո էլ պետք է ժամանակ հատկացնե,լ որպեսզի քաղաքական ուժերը պատրաստվեն: Մրցակցային պայմաններն են խախտվելու, և սրանով իսկապես ական է դրվելու այս ընտրությունների տակ: Սա ձեռնտու չէ այն իշխանությանը, որն այսօր ունի վստահություն, որ ինքը, միևնույն է, մեծամասնություն է ունենալու, ինչի՞ է պետք այդ ականապատ դաշտով այդ մեծամասնությունը ստանալը, ես չեմ հասկանում»:
Ռուստամյանի խոսքով` դեկտեմբերը հանգեցնում է նրան, որ երկու ճանապարհն էլ նորմալ ընտրություն անցկացնելու ճանապարհ չեն մեզ համար: «Առաջին` չի ընդունվում և մնում է նույնը, որը վատ է, երկրորդ` ընդունվում է, սակայն կարճ ժամանակահատված է հատկացվում, և քաղաքական ուժերը չեն հասցնում պատրաստվել, վերադասավորվել»,- ասաց նա:
Պատգամավորը հայտնեց, որ ՀՅԴ-ն մասնակցելու է արտահերթ ընտրություններին: «Կողմ ենք լույսին, դեմ ենք խավարին, և’ կողմ ենք, և’ դեմ ենք: Անխուսափելի իրավիճակ է, ու մենք երկրից չենք թողնելու գնանք, ընտրություններն այս ձևով են անում, այս ձևով կմասնակցենք»,- ասաց նա:
Ինչ վերաբերում է կոնսենսուսին, որ Վենետիկի հանձնաժողովն ասել է, Ռուստամյանն ասաց, «Վենետիկի հանձնաժողովի նախագահն է ասել, որ իրենք իրենց տեսակետը պահպանել են և կրկին գնդակը գցել քաղաքական ուժերի դաշտ»: Նա հավելեց, որ եթե դեկտեմբերի մասին է խոսքը, կոնսենսուս չկա, իսկ եթե` ԸՕ-ի, ապա կոնսենսուս կա:
yerkir.am
Քաղաքական ճգնաժամ է, որովհետև կա պարտադրանք՝ դեկտեմբերին անցկացնել ԱԺ ընտրություններ
ԸՕ բարեփոխումների նախագծի վերաբերյալ հոկտեմբերի 22 -ի ԱԺ արտահերթ նիստում ՀՅԴ խմբակցության ղեկավար Արմեն Ռուստամյանն իր ելույթում նշեց, որ տպավորություն ունի, որ հերթական անգամ ստեղծել են խնդիր, որն ուզում են հերոսաբար հաղթահարել:
Ըստ նրա՝ եթե խոսում են ճգնաժամի առկայության, ֆորս մաժորի մասին, պետք է ճիշտ գնահատել, թե դրանք ինչի հետևանքով են առաջացել: Ռուստամյանի խոսքով՝ դրանց առաջացման պատճառը պարզ է՝ կա պարտադրանք՝ ամեն գնով ընտրություններն անցկացնել դեկտեմբեր ամսին, ինչն էլ լուրջ խնդիրներ է առաջացրել: «Օրենք ընդունենք, թե` ոչ, երկու պարագայում էլ գնում ենք ոչ լիարժեք, այսինքն՝ դրանից տուժելու է ընտրությունների որակը, քանի որ եթե չենք ընդունում այս օրենսգիրքը, մնում է հինը, որը մեզ՝ բոլորիս համար անընդունելի է, եթե ընդունում ենք, այն էլ` ոչ լիարժեք փոփոխություններ կատարելով, որի մասին ես դեռ կխոսեմ, ունենում ենք մի վիճակ, որ լրջագույն փոփոխություններ կատարված օրենսգիրքը մտնում է ուժի մեջ, և մեկ ամիս անց անցկացնում ենք ընտրություններ: Գնացեք, հարցրեք՝ աշխարհում միջազգային ժողովրդավարական ընտրությունների անցկացման փորձ գոյություն ունի: Եվ ոչ ոք չի կարող ասել, որ սա լավ պրակտիկա է»,- ասաց Ռուստամյանը՝ հավելելով, որ այստեղ ոչ թե Դաշնակցության կամ որևէ մեկի գնահատականի հարցն է, այլ կան ունիվերսալ ճշմարտություններ:
Ըստ պատգամավորի՝ սա հանգեցնելու է նրան, որ ամեն ինչ հարմարեցնելու են դեկտեմբերի ժամկետին: Ռուստամյանի մեկնաբանմամբ՝ անգամ հանձնաժողովների ձևավորումը, որը մինչ այժմ կարևորել են ու որոշել, որ պետք է մասնագիտական ուսուցում անցնեն, ձեռք բերեն որոշակի գիտելիքներ, հիմա դա էլ են հանել՝ ասելով, թե՝ ոչինչ, մարդը կարող է մասնագիտական ուսուցում չանցնի, բայց ընդգրկվի այդ հանձնաժողովի կազմում: «Չնայած այն հանգամանքին, որ նախկին հանձնաժողովի անդամներն էլ, որոնք ունեին մասնագիտական ուսուցում, այնուամենայնիվ, այս փոփոխված պայմաններին պետք է ադապտացվեն: Ես դեռ չեմ ասում այլ խնդիրները` որ մյուս քաղաքական ուժերին պետք է ժամանակ տրվի վերանայելու, վերադասավորելու ուժերը, ցուցակները կազմելու: Ասում են՝ յուրաքանչյուր 3-ի մեջ 1 կին պետք է լինի, այո, շատ լավ բան ենք արել, բայց մարդիկ դրան պետք է պատրաստվեն, չէ՞: Ես նման բազմաթիվ օրինակներ կարող եմ բերել, որ ժամանակն անհրաժեշտ է ոչ թե ժամանակավաճառություն անելու, ժամանակ շահելու կամ չգիտեմ ինչի համար, քանի որ մենք ի սկզբանե արտահերթ ընտրություններին կողմ ենք եղել, այլ ժամանակն անհրաժեշտ է նորմալ, որակյալ ընտրություն անցկացնելու համար: Սա է խնդիրը»,- ասաց պատգամավորը:
Նրա հավաստմամբ՝ երբ իրենց հիշեցնում են, որ գործընթացը վաղուց են սկսել, իրար հետ համաձայնության պրոցես են անցել ամռանը, շատ լավ է, բայց թող հիշեցնեն նաև, որ այդ գործընթացն իմաստ է ձեռք բերում այն ժամանակ, երբ պայմանավորվածությունները տեղ են գտնում բերված նախագծի մեջ:
Ռուստամյանը նշեց, որ իրենք 3 առաջարկություն են առանձնացրել իրենց՝ մեկ տասնյակից ավելի նախաձեռնություններից, քանի որ հենց այդ երեքի հետ կապված եղել է համաձայնություն՝ համաձայնել են բոլոր 4 քաղաքական ուժերը: «Հիմա մեզ ասում են՝ շատ լավ է այդ ամենը, բայց դեկտեմբերը թույլ չի տալիս դա անել: Այսինքն՝ ստացվում է՝ դեկտեմբերը դրել ենք ու ամեն ինչ պետք է հարմարեցնենք դեկտեմբերին: Իսկ ես խնդիրներ եմ տեսնում՝ հետո ԱԺ-ն ինչպե՞ս պետք է աշխատի: Այն երեք առաջարկությունները, որ մենք ներկայացրել ենք, իրենցից այնպիսի պարզագույն ճշմարտություններ են ներկայացնում, որի հետ վիճելն ուղղակի անիմաստ է: Տեսեք՝ բաց համամասնական ընտրակարգն ամբողջ աշխարհն է ընդունում, որ իսկապես ավելի ժողովրդավարական է: Ինչ վերաբերում է ռեյտինգային ընտրակարգին, ապա դրանից 2 պատճառով էինք հրաժարվում՝ սա ոչ թե ուղղակի անձի ռեյտինգ է, այլ տարածքներով պայմանավորված ռեյտինգ: Երկրորդ պատճառն էլ այն է, որ մանդատ է ստանում մեկը, որը քիչ ձայն ունի»,- ասաց Ռուստամյանը՝ հավելելով, որ սրանց համար էին իրենք գործող ռեյտինգային համակարգից հրաժարվում:
Աշխարհը, սակայն, ըստ պատգամավորի, չի ասում՝ ռեյտինգային համակարգը վատն է, ընդհակառակը` սա համարում է շատ ավելի ժողովրդավարական:
ՀՅԴ խմբակցության ղեկավարը նշեց նաև, որ ինքը մեծ կասկածանք ունեմ, որ եթե մեկ քաղաքական ուժ ունենում է 2/3 մանդատ, որով կարող է փոխել Սահմանադրությունը, ապա մեծ գայթակղություն կա ուժեղացնելու իր իշխանությունը: «Այսօր, երբ խոսում ենք սուպերվարչապետական համակարգի մասին, ես վախենում եմ, որ վաղը գնանք սուպերնախագահական համակարգի: Մենք քանիցս ասել ենք՝ ընտրություններն ավարտվում են, բայց շահարկումները դրանց արդյունքի վերաբերյալ շարունակվում են՝ կե՞ղծ են եղել, թե՞ ոչ: Մենք միջոց ենք առաջարկել, որ դրանով ավարտվեն այս խոսակցությունները: Ինչո՞ւ ենք սրան էլ դեմ: Եթե ընդունում եք գաղափարը, սրանք գոնե անցումային դրույթների մեջ ներառեք: Մենք, բնականաբար, կողմ ենք ընտրական այս օրենքին, որովհետև, ի վերջո, ցանկացած օրենսդրական նախաձեռնություն, որն առաջընթաց է ապահովել, երբեք դեմ չենք եղել»,-ասաց պատգամավորը:
Ռուստամյանը նշեց նաև, որ այս նախագծին էլ են կողմ, քանի որ իրենց առաջարկություններից ընդգրկվել են այնտեղ, բայց իրենց՝ կողմ քվեարկությունը չպետք է կապել դեկտեմբեր ամսվա՝ իրենց համար անընդունելի ժամկետի հետ:
