Մե՛կ պաշարում են, ասում են՝ Նիկոլ Փաշինյանին ընտրեք, մե՛կ պաշարում են, ասում են՝ մի՞ ընտրեք

Մեկ պաշարում են ԱԺ-ն ու ասում`Նիկոլ Փաշինյանին ընտրեք, մեկ պիտի պաշարեն, ասեն` մի՞ ընտրեք. Արմեն Ռուստամյան
Շատ գովելի է, որ բոլորը կամաց-կամաց հասկանում են` գործընթացները պետք է Սահմանադրության տառին և ոգուն համապատասխան լինեն, որ ԱԺ-ի լուծարումը կատարվի իրավունքի ուժով. խորհրդարանում լրագրողների հետ զրույցում ասաց ԱԺ ՀՅԴ խմբակցության ղեկավար Արմեն Ռուստամյանը` անդրադառնալով «Ելք»-ի կողմից վարչապետի թեկնածու առաջադրելուն:

«Ժամանակին դա էինք ասում, բայց մեզ դավաճան, հակահեղափոխական էին հանում, սակայն իրականության մեջ նպատակը հենց այն էր, որ որևէ սև բիծ կամ ինչ-որ թաքուն թակարդ, ական չդրվի այն պրոցեսի տակ, որը հանգեցնելու է ԱԺ-ի լուծարմանն իրավունքի ուժով: Այն, ինչ մենք ասում էինք, նրա համար էր, որ լուծարումը տեղի չունենա ուժի իրավունքով: Հիմա կամաց-կամաց հասկանում են, որ Սահմանադրության տառն ու ոգին պետք է հարգել, և ստիպված գնում են այս քայլին»,- ասաց պատգամավորը:

Միևնույն ժամանակ նա հայտարարեց, որ դեռ չեն որոշել` վաղն ինչպես են քվեարկելու: «Մենք կորոշենք` ինչ պետք է անենք: Գոնե մի ուրիշի առաջարկեին, որի օգտին չքվեարկելը հեշտ լիներ: Հիմա Նիկոլ Փաշինյանի օգտին չքվեարկելը հնարավոր է ժողովրդի մի զգալի մասի մոտ առաջացնի այն տպավորությունը, որ մենք հակահեղափոխական ենք, սև ուժ ենք: Այնպիսի մթնոլորտ են ստեղծել, որ մարդ չգիտի` ինչ անի, որն է ճիշտ: Այս առումով մտածելու բան կա»,- ասաց Ռուստամյանը և հավալեց, որ, բնականաբար, իրենք չեն ուզում որևէ պրոցես խափանվի:

Հարցին` ֆորսմաժորային իրավիճակները բացառո՞ւմ է, պատգամավորը պատասխանեց. «Ֆորս մաժորն արդեն սկսվել է` հենց դեկտեմբեր դնելով: Մեր համոզմամբ` հենց դրանից է սկսվել այս բոլոր արհեստական գործընթացների տրամաբանությունը: Մենք որ ասում էինք` պետք է լինի ճանապարհային քարտեզ, պետք է հրաժարական տալու գործընթացներն համաձայնեցնենք, այսպիսի բաների համար էինք ասում, որ պարզ դառնար` կա քաղաքական համաձայնություն, բայց, չգիտես` ինչու, մարդիկ որոշեցին վերջնագրային և պարտադրանքի լեզվով այս պրոցեսները տանել: Երևի համարում են, որ այս նախընտրական փուլում այսպես է պետք` բոլոր հակառակորդներին փորձել նսեմացնել, կոտրել, ավելի լավ դաշտ ունենալ ընտրությունների շեմին»:

Դիտարկմանը` նրանք դա բացատրում են, թե պրոցեսն արագացրեց գիշերային քվեարկությունը, Ռուստամյանը պատասխանեց. «Հիմա ինչ իրենք անում են, մենք այդ տրամաբանությունից ելնելով էինք անում, որ ԱԺ-ն իրավունքի ուժով լուծարվի: Եթե այդպես է, թող չառաջադրեին վարչապետի թեկնածու, ինչո՞ւ են առաջադրում: Ուրեմն խնդիր կարող է, չէ՞, առաջանալ: Մենք էլ դա էինք ասում` թողնենք, որ բնական պրոցես լինի, ոչ թե պարտադրանք, ոչ թե պարտադրեն, որ ԱԺ-ն չհավաքվի, նույն տրամաբանությունը չէ՞: Հիմա ընդհանուր մոտեցումը նայես, չես հասկանում` մեկ պաշարում են ԱԺ-ն ու ասում` Նիկոլ Փաշինյանին ընտրեք, մեկ պիտի պաշարեն, ասեն` մի՞ ընտրեք: Աբսուրդի մեջ ենք հայտնվել, չէ՞»:

Ռուստամյանը նշեց, որ ժողովուրդն իր իշխանությունը ոչ թե փողոցով ու հրապարակով պետք է իրականացնի, այլ հանրաքվեով ու ընտրություններով, և կարծես` կամաց-կամաց հասկանում են, որ դա այդպես է: Նա ասաց, որ ոչինչ չի բացառում, որ հնարավոր է Փաշինյանը վաղն ընտրվի: «Այս իրավիճակն այնքան արհեստական է, որ չես իմանում` ինչ կստացվի այս ամենից»,- եզրափակեց պատգամավորը:

yerkir.am

Պետք է հաշվի նստեն Դաշնակցության հետ` մեզ հետ ուլտիմատումներով, վերջնագրերով չի ստացվելու. Արմեն Ռուստամյան

Մենք համահեղինակություն չունեինք այդ նախագծի հետ, եթե ստորագրում ես, դա նշանակում է համահեղինակ ես. Խորհրդարանում լրագրողների հետ զրույցում ասաց ՀՅԴ խմբակցության ղեկավար Արմեն Ռուստամյանն անդրադառնալով հարցին` ՀՅԴ_ն ինչու չմիացավ երկուշաբթի օրը ԸՕ փոփոխությունների հետ կապված արտահերթ նիստ հրավիրելու ստորագրահավաքին:

«Եթե համահեղինակ ես, նշանակում է, որ քո ասածներից մի բան պետք է ընդունվի, որ համահեղինակ լինես: Մենք երեք առաջարկ ենք արել մեկը մյուսից լավը, բայց այդ երեք առաջարկները մերժվում են, ինչո՞ւ պետք է ես նախագծին միանամ»,- բացատրեց պատգամավորը և հավելեց, որ իրենք նախագծին կողմ են, բայց դրան համահեղինակ չեն: Նա ասաց, որ նախագծի քննարկումն էլ իրենց նախաձեռնությունը չէր, կառավարությունը բերել էր, իրենք կողմ եղաբ:

«Կառավարությունը բերել էր, մենք կողմ եղանք, բայց կառավարությանն էլ ներկայացրեցինք հիշեցնելով իրենց, որ բոլորի հետ համաձայնեցված երեք առաջարկ կար` ինչու չեք ընդունել, որևէ պատասխան չկա: Ինչո՞ւ պիտիմենք համահեղինակ լինենք մի բանի, որտեղ մեր ասածներից որևէ բան չի ընդգրկվել»,- հայտարարեց նա:

Դիտարկմանը` ռեյտինգայինին դեմ եք, իսկ դա հանվել է, նա արձագանքեց. «Ռեյտինգայինի մասին չի խոսքը, դրա հետ բոլորը համաձայնվել են, բայց մենք աչքներս փակ որևէ նախաձեռնությանը չենք միանում: Եթե մեզ հետ որևէ բան չեն համաձայնեցնում մենք չենք միանում այդ նախաձեռնություններին: Սա է Դաշնակցության տեսակը, պետք է հաշվի նստել այդ տեսակի հետ: Մեզ հետ ուլտիմատումներով, վերնջագրերով վախացնելով չի ստացվելու»:

Միևնույն ժամանակ Ռուստամյանը շեշտեց, որ իրենք նեղացած չեն և որ այդ ուրիշներն են որոշել, որ Դաշնակցության հետ կարելի է այդ լեզվով խոսել: «Ում հետ ասես կարող են խոսել, մեզ հետ էլ են փորձել խոսել չի ստացվել և թող բոլոր իշխանությունների ճակատագիրը չփորձեն կրկնել ներկա իշխանություններն էլ: Բոլորին թվում էր, թե Դաշնակցությունը բոլոր իշխանությունների մոտ հենց տեղ է լինում մտնում է, բա ինչի՞ հիմա դրա մասին չեն խոսում: Մենք մեր տեսակետն ունենք, մեր տեսակետն էլ պահպանում ենք»,- շեշտեց նա: Հարցին` կարո՞ղ է ուրիշ հեռանկարներ ունեն նա ասաց, որ իրենց հեռանկարը Ազատ անկախ և միացյալ Հայաստանն է, ուրիշ հեռանկար չունի Դաշնակցությունը: Դիտարկմանը` օրինակ ռևանշի, նա պատասխանեց. «Եթե ռևանշով ենք գալու Ազատ անկախ և միացյալ Հայաստանին, այո»:

Հարցին էլ` Փաշինյանին նկատի ունի՞, որ ասում է իրենց հետ ուլտիմատումներով չխոսեն, ասաց. «Ես նկատի ունեմ այն թիմը որն այս գործընթացը սկսել է: Գիտեին, որ մենք չենք միանալու, երեկ ենք սրա մասին խոսել: Ես երեկ մեր այս տեսակետը հստակ փոխանցել եմ առաջին փոխվարչապետին, հիմա իրենք գալիս են, որ մեզ վրա ճնշում բանեցնեն, որ տեսեք` գնացինք, ՀՅԴ-ն մերժեց: Իրենք չպետք է գային մեզնից ստորագրություն խնդրելու, որովհետև մենք երեկ իրենց ասել ենք, թե ինչու չենք միանալու այդ ստորագրահավաքին: Հիմա բերել են հրապարակայնացնում են, որ դրանով ճնշե՞ն Դաշնակցությանը, չի ստացվելու»:

Նա ասաց, որ իրենք իրենց երկրում են շատ բաներ իրենց սրտով չեն, բայց մասնակցելու են ընտրություններին:

«Մենք քաղաքական ուժ ենք և տվյալ պայմաններում մեր ծրագրերն իրականացնելու ցանկացած միջոց և առիթ պետք է օգտագործենք»,- հայտարարեց նա: Նա ընդգծեց, որ Դաշնակցության գոյությունն ու աշխատանքը պայմանավորված չէ նրանով, թե ՀՅԴ-ն քանի ձայն կունենա խորհրդարանում:

«Եղել է ժամանակ, որ Դաշնակցությունը մեկ պատգամավոր է ունեցել ԱԺ-ում, Դաշնակցությունը 70 տարի երկրում չի էլ եղել, բայց Դաշնակցությունը եղել է: Կարո՞ղ եք մի այդպիսի ուժ նշեք, որ այդպիսի փորձություններով անցնի ու պահպանվի: Դա չի մտածելու տեղ չի տալիս բոլորին, որ գոնե մեկ անգամ աշխատացնեն մտքները և հասկանան, որ Դաշնակցությունը կա ու պիտի լինի, ուզեն թե չուզեն պետք է հաշվի նստեն այդ փստի հետ»,- շեշտեց նա:

Ինչ վերաբերում է վարչապետի այն հայտարարությանը, որ որոշ ուժեր հայտնվելու են քաղաքական աղբանոցում, Ռուստամյանն արձագանքեց. «Այնքան մարդիկ են այդպիսի հայտարարություններ փորձել վերագրել Դաշնակցությանը: Նախ ես չեմ կարծում, որ Նիկոլ Փաշինյանը նկատի ուներ Դաշնակցությանը, 128 տարի եթե Դաշնակցության նկատմամբ ինչ ասես ասվել է, իսկ Դաշնակցություն կա դա ինչ-որ բան նշանակո՞ւմ է, թե՞ ոչ»,- եզրափակեց նա:

yerkir.am

Աբսուրդի մեջ ենք ապրում

Վաղը Նիկոլ Փաշինյանին վարչապետ ընտրելու հարցն է քննարկվելու ԱԺ-ում, «Ելքը» հորդորել է չքվեարկել, որպեսզի ԱԺ-ն ցրվի, բայց ՀՅԴ խմբակցության ղեկավար Արմեն Ռուստամյանն այսօր լրագրողների հետ զրույցում ասաց, որ իրենք դեռ չեն որոշել՝ կո՞ղմ են քվեարկելու, թե՞ դեմ. «Գոնե մեկ ուրիշին առաջադրեին, որ դեմ քվեարկելը հեշտ լիներ; Հիմա Նիկոլ Փաշինյանին չքվեարկելը կարող է ասենք ժողովրդի մի զգալի մասի մոտ առաջացնի այն տպավորությունը, որ մենք հակահեղափոխական ուժ ենք: Այնպիսի մթնոլորտ են ստեղծել, որ մարդ չգիտի՝ որն է ճիշտը»:

Հարցին՝ իրավաբաններն ասում են, որ կարող էին նաեւ որեւէ թեկնածու չառաջադրել, սահմանադրական փակուղի չէր լինի, Ռուստամյանն արձագանքեց. «Դե չեն լսել նրանք, երեւի ուրիշ իրավագետներ կան, որոնք այլ տեսակետներ են ունեցել, դրա համար էլ այս ճանապարհով են գնացել: ՀՅԴ-ն հակված է Սահմանադրության տառն ու ոգին պաշտպանելուն, եթե ասվում է քվեարկություն, ուրեմն պետք է քվեարկություն տեղի ունենա: Մենք կուսակցության որոշում կունենանք, որը կհայտարարենք վաղը»:

Aravot.am-ի հարցին՝ չի՞ բացառվում այն սցենարը, որ ՀՀԿ-ի հետ կո՞ղմ քվեարկեք, քվեարկությունը կայանա՝ Արմեն Ռուստամյանը պատասխանեց. «Մենք մեր հետ ենք մենակ կողմ քվեարկում կամ դեմ, էդ մենք ենք որոշում ինչ անենք»:

Ըստ Ռուստամյանի, «ֆորս-մաժոր իրենք են ստեղծել՝ դեկտեմբեր դնելով: Դրանից է սկսվել այս ամբողջ արհեստական գործընթացների տրամաբանությունը: Ասում էինք, որ պետք է լիներ ճանապարհային քարտեզ, հրաժարականի գործընթացը լիներ համաձայնեցված, հենց սրա համար էինք ասում, պարզ դառնար, որ կա քաղաքական համաձայնություն, գնում ենք էս ճանապարհով, լուծարում է լինում, գնում ենք արտահերթի ճանապարհով: Բայց չգիտես ինչի մարդիկ որոշեցին վերջնագրերի ու պարտադրանքի լեզվով այս պրոցեսները տանել: Երեւի համարեցին, որ նախընտրական փուլում այդպես է պետք անել՝ բոլոր հակառակորդներին փորձել նսեմացնել՝ ընտրություններին ավելի լավ դաշտ ունենալու համար»:

Մեր դիտարկմանը՝ դուք ասում եք «չգիտես ինչի», բայց իրենք բացատրում են, որ այս գործընթացն արագացրեց ձեր գիշերային քվեարկությունը՝ Ռուստամյանն արձագանքեց. «Հիմա իրենք հասկացել են, որ ինչ մենք անում էինք՝ հենց այդ տրամաբանությունից է՞լ են առաջադրում, ուրեմն խնդիր կարող է առաջանալ, չէ՞: Բա մենք էլ նույնն էինք ասում, թողեք, որ բնականոն պրոցեսով լինի, ոչ թե պարտադրանք, ոչ թե պարտադրել, որ ԱԺ-ն չհավաքվի, նույն տրամաբանությունը չի՞: Չես հասկանում, մե՛կ պաշարում են, ասում են՝ Նիկոլ Փաշինյանին ընտրեք, մե՛կ պաշարում են, ասում են՝ մի՞ ընտրեք: Այսինքն, աբսուրդի մեջ ենք ապրում»:

Մեր դիտարկմանը՝ եթե ժողովրդի իշխանություն է, ժողովուրդը ոնց ասի, այդպես էլ լինելու է՝ Ռուստամյանն արձագանքեց. «Պետք չի ժողովրդի իշխանությունն այդպես մատի փաթաթան սարքել՝ առանց հասկանալու, որ ժողովրդի իշխանությունը իրացման ճանապարհ է ասել Սահմանադրությունը: Էդքան որ ոտնահարում ենք, էս էլ ոտնահարեիք, ուրեմն գիտեն չէ՞, որ լավ բան չի, սրանից լավ հոտ չի գալիս: Որ սենց ոտնահարելով գնան, ական են դնում նոր ընտրությունների տակ»:

Ըստ Ռուստամյանի, ժողովուրդն իր իշխանությունն իրացնում է ոչ թե հրապարակների միջոցով, այլ՝ հանրաքվեով ու ընտրություններով. «Կամաց-կամաց հասկանում են դա»:

Հռիփսիմե ՋԵԲԵՋՅԱՆ

Aravot.am