- Հայ Յեղափոխական Դաշնակցութիւն - https://old.arfd.am -

Համաներումը դրական երևույթ է

Այսօր խորհրդարանը քննարկեց և առաջին ընթերցմամբ ընդունեց «Համաներման մասին» օրենքում փոփոխություններ կատարելու մասին նախագիծը: Այն ընդունվեց 72 կողմ ձայնով:

ՀՅԴ Բյուրոյի քաղաքական ներկայացուցիչ, ԱԺ ՀՅԴ խմբակցության ղեկավար Արմեն Ռուստամյանը Yerkir.am-ի հետ զրույցում նշեց, որ համաներումը միշտ էլ դրական երևույթ է, որովհետև մարդասիրական ակցիա է, և բնական է, որ իրենք կողմ էին քվեարկելու: «Իհարկե, տուժողների իրավունքները պաշտպանելու հետ կապված խնդիր կա, որի վերաբերյալ արմատական լուծումներ պետք է գտնել, որովհետև պետությունը համաներումն իրականացնելիս պարտավոր է նաև հատուցման հարցերը լուծել: Այս հարցը բաց է մնացել, բայց դա այսօրվա խնդիր չէ, վաղուց առաջացած խնդիր է, և այդ հարցի լուծումը առաջիկայում կգտնվի»,- ասաց նա:

Պատգամավորից հետաքրքվեցինք` ի՞նչ կարծիք ունի ցմահ ազատազրկվածների համաներման հարցի հետ կապված, քանի որ նրանք չեն ընդգրկվել համաներվողների ցուցակում, և այսօր ցմահ ազատազրկվածների հարազատները բողոքի ակցիա են իրականացրել ԱԺ-ի մոտ: Ռուստամյանը պատասխանեց. «Ցավում եմ, որ ցմահ դատապարտվածների հետ կապված համաներման լուծում չկա, որովհետև առաջարկ կար պատգամավորների կողմից, որ նրանք նույնպես ընդգրկվեին ցուցակում, բայց այս նախագծի տրամաբանությունը, տենդենցը դրական եմ համարում, որովհետև արդեն վաղաժամկետ ազատման փաստ կա»:

Ռուստամյանի կարծիքով` համաներումը շարունակական բնույթ պետք է ունենա, որովհետև կան մարդիկ, որ իսկապես հասկանալի չէ, թե ինչ գործերով և ինչ հիմքերով են ժամանակին դատապարտվել ծանր պատժի: «Բացի այդ` պետք է հնարավորություն տալ, և աշխարհի պրակտիկան է դա, որ նրանք կարողանան վաղաժամկետ ազատվել, ներման հնարավորություն ունենալ»,- ասաց պատգամավորը:

 

Համաներմամբ ցմահ դատապարտյալների հետ կապված անարդար վիճակի էջը պետք է կարողանայինք փակել. Արմեն Ռուստամյանը` «Դրո»-ի, «31»-ի և այլ գործերի մասին

 

ԱԺ ՀՅԴ խմբակցության ղեկավար Արմեն Ռուստամյանը կարծում է, որ անհրաժեշտ ծավալի աշխատանք չի կատարվել համաներման նախագծի մեջ նաև ցմահների հարցը ներառելու համար: Նա Tert.am-ի հետ զրույցում նշեց, որ եթե խոսում ենք համերաշխությունից, այդ էջը ևս պետք է փակել:

-«Էրեբունի-Երևանի հիմնադրման 2800-ամյակի և Հայաստանի առաջին Հանրապետության անկախության հռչակման 100-ամյակի կապակցությամբ համաներում հայտարարելու մասին» նախագիծն առաջին ընթերցմամբ ԱԺ-ն ընդունեց: Դո՞ւք էլ եք կարծում, որ ընդգրկունության առումով նախագիծն աննախադեպ էր, և համամի՞տ եք, որ ցմահների նկատմամբ անհատական մոտեցում պիտի կիրառվի, և այս ակտով իրենք պետք է շահառու չլինեն:

-Նախ բնական է, ենթադրելի էր, որ այս հոբելյանական տարում, որ 100- ամյակն է մեր պետականության վերականգման, Երևանի 2800-ամյակը, այդպիսի համաներում պետք է տեղի ուներ, և ճիշտ է, որ կատարվեց, և այն պետք է լիներ ավելի ընդգրկուն, ավելի լայն մասշտաբ ունեցող, որովհետև տարին էր թելադրում դա: Համաներումը միշտ էլ անհրաժեշտ է, առավել ևս այս տարի էր անհրաժեշտ կատարել, որովհետև դա ոչ միայն հումանիստական ակցիա է, այլ նաև մեր երկրի ապագային միտված նախանշումներ են կատարվում:

Եվ այդ առումով կարծում եմ, որ եթե դա կատարում ենք, պետք է նաև նկատի ունենանք այն անարդար վիճակը, որը գոյություն ունի ցմահ դատապարտյալների մասով. մարդիկ կան, որոնք դատապարտվել են ցմահ բանտարկության դեռ կարգը չմտած, ժամանակին եղել է մահապատիժ:

-Նկատի ունեք «Դրոյի՞» գործով:

-Նկատի ունեմ անձանց, ովքեր դատապարտվել են մինչև ցմահ դատապարտման պատիժը ուժի մեջ մտնելը, դա միայն «Դրոյի» գործը չի, «31»-ի գործով կան մարդիկ, ովքեր այն ժամանակ դատապարտվել են մահապատժի, այնուհետև ցմահ բանտարկյալներ են դարձել: Ես անձանց չեմ ասում, խոսում եմ կոնկրետ երևույթի մասին, որը կապված է մոտեցման սկզբունքի հետ: Այդ սկզբունքը պետք է նկատի ունենայինք, եթե հատկապես համերաշխության և այլնի մասին ենք խոսում: Եվ ուրեմն պետք էր այդ էջն էլ կարողանայինք փակել: Կարծում եմ՝ այդ առումով անհրաժեշտ ծավալի աշխատանք չի կատարվել, որպեսզի պատրաստ լիներ նաև համաներման մեջ դա ներառվել:

Այդուամենայնիվ տենդենցը ես դրական եմ համարում, որ այդ ուղղությամբ էլ նախանշվում է դրական տեղաշարժ կապված նրա հետ, որ գոնե առաջին անգամ վաղաժամկետ ազատում արձանագրվեց, ներման ինստիտուտը պիտի գործի, և այդ երկու ինստիտուտներով այդ գործերը պետք է վերանայվեն:

Մանրամասները՝ տեսանյութում: