[1] Այսօր ԱԺ ավանդական ճեպազրույցի ժամանակ ԱԺ ՀՅԴ խմբակցության քարտուղար Աղվան Վարդանյանը հատարարել է, որ Երևանի ավագանու ընտրությունները հնարավորություն են ՀՅ Դաշնակցության համար ապացուցելու այն կշիռը և հնարավորությունները, որոնք ունի կուսկացությունը:
«Մենք առաջարկել ենք մեր օրակարգը և ճանապարհային քարտեզը, ինչը կարող է ընդհանրական լինել և՚ իշխանության, և՚ ընդդիմության համար: Մեզ համար այս ընտրությունները հնարավորություն են ապացուցելու, որ Դաշնակցության հնարավորություններն ու կշիռը այն չէ, ինչը գրանցվել է խորհրդարանական ընտրությունների ժամանակ, մենք մայիսի 5-ին ավելի մեծ մասնկացություն ենք ապահովելու»:
Նրա խոսքով` ներքաղաքական դաշտում կա երկու խնդիր, որոնցից մեկը ստեղծված հետընտրական լարվածությունն ու զարգացումներն են, երկորրդը`Երևանի ավագանու ընտրությունները: «Վիճակը հանգուցալուծում է պահանջում, և դա կարող է լինել միայն քաղաքական համաձայնության դաշտում: Այն շեմը, նշաձողը, որ Րաֆֆի Հովհաննիսյանն է դրել` «իմ դիակի վրայով», ընդամենը մոտեցում է, բայց չգիտեմ ինչ է դա տալու և ինչ է կատարվելու հասարակության հոգեբանության մեջ»,- կարծիք է հայտնել Վարդանյանը:
Նա նաև ընդգծել է, որ պետք է միասին մտածել այս վիճակից դուրս գալու ելքերի մասին. «Մենք ամեն ինչ արել ենք, որ ընդդիմադիր դաշտը գնա միասնական ճակատով, բայց չստացվեց, գուցե լավն էլ սա է»:
Աղվան Վարդանյանի կարծիքով՝ ընդդիմադիր ուժերը ընտրություններին առանձին մասնակցելիս իրենց ուժերն ավելի կկենտրոնացնեն և ավելի լավ արդյունք կունենան: Այնուհետև նրանք կարող են համագործակցել ավագանու կազմում: Իսկ եթե ընտրություններին դաշինքով մասնակցեն, նրանք իրենց ուժերը ամբողջությամբ չեն կարողանա օգտագործել:
ԱԺ ՀՅԴ խմբակցության քարտուղարը չհամաձայնեց իշխանության այն տեսակետի հետ, որ Երևանի ավագանու ընտրությունները տեղական ինքնակառավարման ընտրություններ են, և պետք չէ այն քաղաքականացնել: «Մենք սա համարում ենք քաղաքական պայքար և մայրաքաղաքը արդյունավետ կառավարելու պայքար»,- ասել է նա:
Նրա խոսքով՝ իշխանությունները վարչական ողջ ռեսուրսը արդեն գործի են դրել, ֆինանսական հոսքերը սկսել են աշխատեցնել, և թաղային հեղինակությունները սկսել են շրջել թաղերում:
«Իշխանությունները յուրաքանչյուր ընտրությունից հետո ասում են, որ այս ընտրությունները նախորդներից կատարյալ են. եթե այսպես շարունակվի, ես վախենում եմ, որ «կատարելության» այդ ձգտումը սահման չի ունենա»: ՀՅԴ-ին վախեցնում են իշխանության ընտրությունից-ընտրություն կատարելության մասին հայտարարությունները. «Մենք մի բան գիտենք`Երեւանը չի վաճառվում:
Անդրադառնալով Էդուարդ Շարմազանովի այն հայտարարություններին, որ Տարոն Մարգարյանը վերջին քսան տարիների լավագույն քաղաքապետն է, Վարդանյանն ասել է. «Ով է չափել, որ վերջին քսան տարիների լավագույն քաղաքապետը գործող քաղաքապետն է: Քաղաքապետարանի աշխատակազմի մեծամասնությունը ՀՀԿ-ականներ են, բայց եթե խոսեք մարդկանց հետ`կասեն, որ ավելի լավ քաղաքապետեր էլ ենք ունեցել: Շարմազանովի հայտարարությւոնը նույն օպերայից է, որ մեկ անգամ էլ ենք լսել: Երեւանցիները իրենց մտքով են քվեարկելու, երիտասարդ քաղաքական գործիչ Շարմազանովի թելադրանքով չեն քվեարկելու»: