Հ.Յ.Դ. Հայաստանի Գերագոյն Մարմինը հանդէս է եկել յայտարարութեամբ առկայ քաղաքական իրավիճակի վերաբերեալ: Նախագահական ընտրութիւններն ակնառու կերպով ցոյց տուեցին, որ ժողովրդի մի զգալի հատուածի մօտ առկայ է լուրջ բարեփոխումներ իրականացնելու յստակ պահանջ: Սակայն, ցաւօք, ժողովրդի մէջ առկայ տրամադրութիւնները քաղաքական միջոցներով պաշտպանելու եւ ուղղորդելու փոխարէն ընտրուեց առճակատման կործանարար ճանապարհը: Արդիւնքում.
– հասարակութեան մէջ բարոյա-հոգեբանական անկումային տրամադրութիւնները, յուսահատութեան, երկփեղկուածութեան, փոխադարձ անհանդուրժողականութեան, անվստահութեան, երկրի զարգացման հեռանկարի նկատմամբ անորոշութեան, մարդու իրաւունքների եւ հիմնարար ազատութիւնների խաթարման զգացումը վտանգաւոր աստիճանի է հասել,
– քաղաքական կեանքում տիրապետող են դառնում քաղաքական ուժերին օտարների եւ իւրայինների բաժանելու միտումները, տեղայնական տարանջատումները, իշխանութեան եւ ընդդիմութեան միջեւ բացակայում են բնականոն յարաբերութիւններն ու երկխօսութիւնը, քաղաքական գործընթացներում առաջնորդող են ծայրահեղականութիւնը եւ առաւելապաշտութիւնը,
– վտանգւում է Հայաստանի` իբրեւ բարենպաստ ներդրումային միջավայր, զարգացող տնտեսութիւն եւ կայուն առաջընթաց ունեցող երկրի վարկն ու կարգավիճակը,
– ՀՀ եւ ԼՂՀ անվտանգութեանն ուղղուած սպառնալիքների աննախադէպ աճ է արձանագրուել, առաջանում են նոր արտաքին մարտահրաւէրներ:
Իրավիճակի յետագայ վատթարացումը յղի է հայկական երկու պետութիւնների անկախութեանն ու անվտանգութեանն ուղղուած ռազմա-քաղաքական սպառնալիքներով: Ստեղծուած իրավիճակում երկիրը կանգնած է իր ազգային-պետական ուղեգիծը վերահաստատելու, ժողովրդավարական բազմակողմանի բարեփոխումների գործընթացը խորացնելու, ներազգային համերաշխութիւնը վերականգնելու, ազգային համաձայնութեան մթնոլորտ ձեւաւորելու հրամայականի առաջ:Օրախնդիր է երկրում արտագաղթի նոր ալիքի կանխարգելումը, ներդրումային ռիսկերի չէզոքացումը, առաջընթաց զարգացման համար բարենպաստ միջավայրի վերականգնումն ու ամրապնդումը:
Այս պայմաններում հանգուցալուծման միակ ճանապարհը հատուածական-կուսակցական շահի անվերապահ ստորադասումն է յանուն Հայրենիքի եւ հայութեան առջեւ կանգնած ազգային-պետական նպատակների իրագործման: Լաւագոյն լուծումը կարող է լինել խորհրդարանական բոլոր ուժերի ընդգրկումով ազգային համաձայնութեան կառավարութեան ձեւաւորումը:
Հ.Յ.Դ. Հայաստանի Գերագոյն Մարմինը պատրաստակամ է մաս կազմել այս խնդիրների իրագործմանը նպատակամղուած համաձայնութեան կառավարութեանը եւ կոչ է անում քաղաքական ընդդիմութեանը` գնահատել ստեղծուած իրավիճակի լրջութիւնը, օգտագործել ընձեռուած հնարաւորութիւնը եւ իր մասնակցութեամբ երկրում բարեփոխումների գործընթացը դարձնել առաւել ամբողջական ու լիարժէք: Համաձայնութեան կառավարութիւնն իր առաջնահերթ խնդիրները պէտք է համարի.
– դատական համակարգին գործադիր իշխանութեան միջամտութեան բացառումը, այդ համակարգի լիարժէք անկախութեան եւ անաչառութեան ապահովումը,
– անպատժելիութեան եւ ամենաթողութեան վերացումը, օրէնքի առջեւ բոլորի հաւասարութիւնը` անկախ զբաղեցրած դիրքից ու պաշտօնից,
– ընտրական գործընթացների նկատմամբ հանրութեան վստահութիւնը երաշխաւորող, գործադիր իշխանութեան միջամտութիւնը բացառող, լիովին անկախ եւ ինքնուրոյն ընտրական նոր համակարգի ձեւաւորումը,- տնտեսական մենաշնորհները բացառող հակամենաշնորհային գործուն օրէնսդրական դաշտի ստեղծմամբ մրցակցային արդար կարգի հաստատումը,
– լիարժէք բազմակարծութեան, խօսքի ազատութեան, Հանրային հեռուստառադիոընկերութեան օբյեկտիւ եւ թափանցիկ գործունէութեան ապահովումը,
– ընդդիմութեան համար քաղաքական համակարգում լիարժէք գործելու երաշխիքների ապահովումը,- կենսապահովման նուազագոյն զամբիւղի հաշուառման հիման վրայ սոցիալական քաղաքականութեան իրականացումը:
Երկիրը բնականոն հուն մտցնելու, վերոյիշեալ խնդիրները յաջողութեամբ լուծելու, հետընտրական լարուածութիւնը արագ լիցքաթափելու համար ՀՅԴ Հայաստանի Գերագոյն Մարմինը անհրաժեշտ է համարում իրականացնել անյետաձգելի միջոցառումների ծրագիր: Այդ ծրագրի իրականացմանը կարող է նպաստել հանրապետութեան նախագահին կից` ժողովրդի վստահութիւնը վայելող անձանցից, հասարակական կազմակերպութիւնների, արտախորհրդարանական ուժերի ներկայացուցիչներից կազմուած Հասարակական Խորհրդի ստեղծումը: Խորհուրդը պէտք է նպաստի վստահութեան մթնոլորտի ձեւաւորմանը եւ հասարակութեան հետ իշխանութեան մշտական կապի հաստատմանը:
ՀԱՅ ՅԵՂԱՓՈԽԱԿԱՆ ԴԱՇՆԱԿՑՈՒԹԵԱՆ ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ
