Օրեր առաջ մի խումբ ջավախահայեր փակել էին Բավրայի մաքսային անցակետի ճանապարհը: Նրանք պահանջում էին մաքսային ռեժիմով ժամանակավոր ներմուծման սկզբունքը վերանայել: Նշենք, որ Հայաստան մտնելու համար ջավախահայերը պարտավորվում են օրական մի քանի անգամ վճարել` և’ մուտքի, և’ ելքի համար:
Խնդրի առնչությամբ այսօր լրագրողների հետ հանդիպման ժամանակ տեսակետ հայտնեց Արեւմտահայոց հարցերի ուսումնասիրության կենտրոնի ղեկավար Հայկազուն Ալվրցյանը:
Ըստ նրա` երբ Վրաստանի իշխանությունները որևէ ոտնձգություն են կատարում վիրահայերի նկատմամբ, հայկական կողմը մեծ աղմուկ է բարձրացնում, քննադատում, սակայն ավելի մտահոգիչ է ջավախահայերի նկատմամբ Հայաստանի իշխանությունների որդեգրած քաղաքականությունը:
«Մենք սովորել ենք արդեն, որ ջավախահայերի նկատմամբ մեր իշխանությունները սխալ որոշուներ կայացնեն, սակայն ժամանակն է հասկանալ մեր սխալները, այլապես մենք շատ բան կկորցնենք»,- ասաց նա և հավելեց, որ հայկական կողմի ընդունած ցանկացած որոշում վիրահայերը կարող են շահարկել. «Հայաստանում բախվելով անօրինականությունների` ջավախահայերը գերադասում են իրենց խնդիրները լուծել Վրաստանում և հետզհետե կորցնում են կապը Հայաստանի հետ»:
Ալվրցյանի խոսքով` մենք այսօր չունենք արտաքին քաղաքականություն Ջավախքի հարցովտ և չենք կարողանում վերջնական հայեցակարգ մշակել այս հարցի վերաբերյալ: Նա թվեց մի քանի հրատապ խնդիրներ, որոնք Հայաստանը պետք է Վրաստանի հետ համատեղ լուծի, այն է` համատեղ համալսարանի բացում, հայկական եկեղեցիների խնդիրը, հայոց լեզվի կարգավիճակի հստակեցում, համատեղ տնտեսական միջոցառումների անցկացում, Ջավախքում հայկական մամուլի ազատ տարածում, մշակութային կյանքի աշխուժացում և այն:
Ըստ նրա` ջավախահայերի նկատմամբ լարվածությունը, որը ժամանակին սերմանել էր Սահակաշվիլին, թուլացել է, և նշված խնդիրները լուծելու համար ստեղծված են անհրաժեշտ նախադրյալները:
