2012թ. սեպտեմբերին կայացած ՏԻՄ ընտրությունների ժամանակ Տավուշի մարզի սահմանամերձ Բաղանիսի գյուղապետի երիտասարդ թեկնածու, ներկայիս գյուղապետ Նարեկ Սահակյանի նախընտրական ծրագրում նշվում էր գյուղի բարեկարգման ու կառուցապատման համար սփյուռքահայ բարերարների ներուժի օգտագործման անհրաժեշտությունը:
Նարեկ Սահակյանը ՀՅԴ անդամ է եւ կուսակցական օղակներով կապ է հաստատել Կանադայի Մոնրեալ քաղաքի դաշնակցականների հետ:
Դրա արդյունքում ՀՅԴ տեղի կառույցի հատկացրած 2000 ԱՄՆ դոլարով Բաղանիսում շարունակում է ընդլայնվել փողոցների գիշերային լուսավորության ցանցը:
Մոտ մեկ ամիս առաջ ԱՄՆ Կալիֆոռնիա նահանգից Բաղանիս ժամանեցին ամուսիններ տեր և տիկին Արա և Արփա Խանջյանները: Նրանք ծանոթացան գյուղի պատմությանը եւ հիմնախնդիրներին :
Ամուսիններին հետաքրքրեցին սահմանամերձ Բաղանիսի բնակիչների հոգսերը, և նրանք պատրաստակամություն հայտնեցին աջակցել համայնքին:
ԱՄՆ վերադառնալուց հետո Խանջյան ամուսիների շնորհիվ Կալիֆոռնիայում հրատարակվող «Ասպարեզ» պարբերականն անդրադարձավ Բաղանիս գյուղին:
Արդյունքում գտնվել են մարդիկ, որոնք պատրաստակամություն են հայտնել ֆինանսական աջակցություն ցուցաբերել Բաղանիսում ծրագրերի իրականացմանը:
Ոսկան ՍԱՐԳՍՅԱՆ
aravot.am
