Երէկ ՀՅԴ Լիբանանի Կեդրոնական կոմիտէն լիբանանեան լրատուամիջոցներուն յղեց հետեւեալ հաղորդագրութիւնը:

ՀՅԴ Լիբանանի Կեդրոնական կոմիտէն խստիւ կը դատապարտէ Ժնահի մէջ գտնուող իրանեան դեսպանատունը թիրախ դարձուցած ահաբեկչական արարքը, որուն պատճառով զոհուեցան մեծ թիւով անմեղ քաղաքացիներ:

ՀՅԴ-ն նկատել կու տայ, որ այս պայթումը թիրախ կը դարձնէ Լիբանանը, որուն գերիշխանութեան դէմ դարձեալ ոտնձգութիւն գործուած է եւ ապահովական կայունութիւնը խախտած:

ՀՅԴ-ն կոչ կ՛ուղղէ լիբանանեան քաղաքական բոլոր ուժերուն` Լիբանանի դէմ նիւթուող սադրանքներուն, բռնարարքներուն եւ դաւադրութիւններուն մէջ չներքաշուելու, այլ` դիմադրելու անոնց ազգային միասնականութեամբ եւ Լիբանանը տագնապներէ չէզոք պահելով:

ՀՅԴ Կեդրոնական կոմիտէն կոչ կ՛ուղղէ լիբանանեան բանակին եւ ապահովական մարմիններուն` բացայայտելու պայթումներուն դրդապատճառները եւ խիստ պատիժներու ենթարկելու յանցագործները:

ՀՅԴ-ն յանձնառու է բոլոր լիբանանցիներուն անվտանգութեան` շուտափոյթ ապաքինում մաղթելով բոլոր վիրաւորներուն, ինչպէս նաեւ համբերութիւն` զոհերու ընտանիքներուն:

ՀՅԴ ԼԻԲԱՆԱՆԻ ԿԵԴՐՈՆԱԿԱՆ ԿՈՄԻՏԷ

Հաղորդագրութիւն

Երէկ Հայկական երեսփոխանական գրասենեակը լիբանանեան լրատուամիջոցներուն յղեց հետեւեալ հաղորդագրութիւնը, որուն մէջ Հայկական երեսփոխանական պլոքի ներկայացուցիչ, երեսփոխան Յակոբ Բագրատունի դատապարտեց Ժնահի պայթումները:

Հայկական երեսփոխանական պլոքի ներկայացուցիչ, երեսփոխան Յակոբ Բագրատունի կը դատապարտէ Ժնահի մէջ արձանագրուած ահաբեկչութիւնը, որ թիրախ դարձուց իրանեան դեսպանատունն ու անմեղ քաղաքացիները:

Ոճրային այս արարքը երկչոտ արարք մըն է, որ թիրախ կը դարձնէ ամբողջ Լիբանանը: Այս արարքին նպատակն է քայքայել Լիբանանի ապահովական կայունութիւնը եւ երկիրը առաջնորդել դէպի սադրանքներ, քաղաքական երկփեղկում եւ համայնքային տարակարծութիւններու խորացում:

Մենք այսօր, ամէն ժամանակէ աւելի, կարիքը ունինք ներքին լիբանանեան միասնականութեան եւ համախոհութեան, որպէսզի կարենանք հեռացնել Լիբանանը հարուածող եւ զայն քանդել միտող դաւադրութիւնները, ինչպէս նաեւ ամէն չարիքէ փրկել երկիրն ու քաղաքացիները:

Կոչ կ՛ուղղենք նաեւ արտաքին բոլոր գրաւները ձախողեցնելու եւ վերադառնալու ազգային երկխօսութեան, որպէսզի կարելի ըլլայ պարտութեան մատնել բոլոր այն ծրագիրները, որոնք Լիբանանը դէպի բռնարարքներ ներքաշելու առումով անդրդուելի կը մնան:

Կը խնդրենք բանակէն եւ ապահովական կառոյցներէն բացայայտել ոճրագործները եւ զանոնք ենթարկել խստագոյն պատիժներուն:

Աստուած պայթումին պատճառած բոլոր զոհերուն հոգին լուսաւորէ եւ բարի ապաքինում բոլոր վիրաւորներուն:

ՀԱՅԿԱԿԱՆ ԵՐԵՍՓՈԽԱՆԱԿԱՆ ՊԼՈՔԻ
ՆԵՐԿԱՅԱՑՈՒՑԻՉ ՅԱԿՈԲ ԲԱԳՐԱՏՈՒՆԻ