2014 թւականը, ինչպէս նախկինում էլ յայտարարւել է, իրանահայ համայնքում գործունէութիւն ծաւալած մի քանի մարզամշակութային միաւորների համար հանդիսանալու է որպէս յոբելեանական տարեթիւ:
Այդ կապակցութեամբ նոյն համայնքի մարզա-մշակութային ամենախոշոր միաւորը՝ Հայ մշակութային “Արարատ” կազմակերպութիւնը այս տարեմուտից իսկ նախապատրաստւել ու ընթացք է տւել իր իսկ հիմնադրութեան եւ գործունէութեան 70-րդ ամեակը նշանաւորելու լայնածաւալ աշխատանքներին: Իսկ այս աշխատանքները արտացոլել-իրազեկելու պարտաւորութիւնը վիճակւած է մնում մեզ՝ որպէս թէ՛ լրատւացանցի, եւ թէ՛ նոյն վիթխարի ամեակների երկայնքով կողք-կողքի ու համընթաց ուղի հարթած կառոյց-միաւորի:
Ահաւասիկ, այսօրւանից իսկ շաբաթական պարբերականութեամբ մեր էջերի ընդմիջից արտացոլելու ենք յոբելեանական յանձնախմբի կողմից նախաձեռնւած Հ. Մ. “Արարատ” Կ.-ի հիմնադրումից մինչեւ 70-ամեայ կենսագրութեան անկիւնադարձային թւականները, դրւագները, ձեռքբերումները ու մէկ խօսքով՝ քանակական թէ՛ որակական այն առաջընթացները, որոնք իրենց ներգործօն ազդեցութիւնն են ունեցել թէ՛ նոյնինքն “Արարատ” կազմակերպութեան առաւել կոփւած ու ինքնավստահ երթի շարունակման- յարատեւման, եւ թէ՛ թեհրանահայ ու ինչու ոչ՝ իրանահայ համայնքի մարզական, մշակութային, միութենական-կազմակերպական եւ որ կարեւոր է՝ ազգային ու հայրենասիրական ոգու ձեւաւորման ու ծաւալման գործում: Իսկ այդ ամէնը՝ յօգուտ եւ ի խնդիր հէնց 70-ամեայ կեանքում յաջորդական սերունդների ստւարաթիւ շարքերից առկայծող պատանի-պարմանուհիների, սկաուտ-միութենականների, ախոյեան մարզիկ-մարզիչների, թատերագէտ-արւեստագէտների ու այդ ճամբով՝ ազգային-հասարակական գործիչների փաղանգ ձեւաւորելու ազգօգուտ նպատակների:
70-ամեայ “Արարատ”-ի հարթած ուղին, ինչ խօսք, տարբեր հանգրւաններում ու փուլերում եղել է տատասկոտ, բազմապիսի խոչընդոտ-արգելքներով առլեցուն: Բայցեւայնպէս՝ եղել են Արարատանման կանգուն, հաստատակամ, նւիրեալ ու աննահանջ կամքով ու կեցւածքով օժտւած-կոփւած միութենականներ, որոնց հայեացքն ու նպատակակէտը մշտապէս սեւեռւած է մնացել դէպի բարձունքներ, դէպի միեւնոյն Արարատի հպարտ եւ առինքնող գագաթների նւաճում՝ ի հեճուկս ցրտաշունչ քամիների ու անանցանելի եւ աննւաճ թւացող կիրճեր-կածանների…
…Մեր անկեղծ ու ընկերական ողջոյնները՝ յոբելեար արարատականներին, որոնց էլ մաղթում ենք ամրաքայլ առաջընթաց՝ դէպի 70-րդ հանգրւանի նւաճում…
ԴԵՐԵՆԻԿ ՄԵԼԻՔԵԱՆ
“Ալիք” օրաթերթի գլխաւոր խմբագիր
