Հանդիպում ՕՆՆԷՏի նախագահին հետ
Յունաստանի իշխող կուսակցութեան՝ Նոր Հանրապետութեան երիտասարդական միութեան գրասենեակներէն ներս, անցեալ Հինգշաբթի 10 Ապրիլին, հանդիպում կայացաւ ՕՆՆԷՏի նախագահ Սաքիս Իոանիտիսի հետ:
ՀՅԴ Երիտասարդական Միութեան Կեդրոնական Վարչութեան կողմէ ընկ. Արամ Գոլանեան եւ ընկ.հի Մատլէն Պալատլեան ծանօթացման հանդիպում ունեցան ՕՆՆԷՏի նախագահին հետ, երկու երիտասարդականներու գործունէութեան եւ հայութեան արդար պայքարի շուրջ տեղեկութիւններ փոխանցելով:
Հանդիպման աւարտին ՀՅԴ Երիտասարդական Միութեան անդամները հրաւէր ուղղեցին ՕՆՆԷՏի նախագահին, ներկայ եւ մասնակից ըլլալու Ապրիլ 24ին, Աթէնքի Սինտաղմայէն դէպի թրքական դեսպանատուն կայանալիք պահանջատիրական ցոյցին: Պրն. Սաքիս Իոանիտիս իր պատրաստակամութիւնը յայտնեց՝ հրաւէրին ընդառաջելով եւ ներկայ պիտի ըլլայ ցոյցին:
Հանդիպում՝ ՓԱՍՕՔի երիտասարդականի հետ
Նոյն նպատակով հանդիպում մըն ալ կայացաւ ՓԱՍՕՔ կուսակցութեան երիտասարդական միութեան ընդհանուր քարտուղար Ֆիլիփոս Թուրալիսի հետ: Ինք եւս ընդառաջեց իր միութեան ուղղուած հրաւէրին եւ յայտնեց թէ ներկայ պիտի գտնուին Ապրիլ 24ի պահանջատիրական ցոյցին: