Այսօր ԱԺ արտահերթ նիստում վարման կարգով ելույթ ունեցով ԱԺ ԲՀԿ խմբակցության քարտուղար Նաիրա Զոհրաբյանը: «Հաշվի առնելով երկրում ստեղծված «բեսպրեդել» վիճակը, երբ տարբեր կարգի թափթուկներ կարող են ազատամարտիկ ծեծել, երբ չակերտավոր հայրենասերը կարող է հարվածել մեր գործընկեր Արամ Մանուկյանին, ԲՀԿ-ն առաջարկում է մինչև արտահերթի օրակարգին անցնելը, երբ յոթ վարկային պայմանագրով հերթական անգամ մեծացվելու է երկրի արտաքին պարտքը, որովհետև մենք գիտենք, թե ինչպես են կերել բազմաթիվ վարկեր, մենք առաջարկում ենք ընդհատել նիստը, հրավիրել արտահերթ նիստ` քննարկելու երկրում ստեղծված իրավիճակը, հստակ գնահատական տալ թե’ ազատամարտիկների, թե’ մեր գործընկերոջ հետ կատարվածին, այլապես ԲՀԿ-ն հայտարարում է, որ բոյկոտելու է այս արտահերթ նիստը»,- ասաց նա:
«Ժառանգություն» խմբակցության ղեկավար Ռուբիկ Հակոբյանը նույնպես նշեց, որ պետք է անդրադառնալ երկրում ստեղծված իրացվիճակին, նոր անցնել առաջ, և ԲՀԿ-ի պես նույնպես բոյկոտելու են նիստը:
ՕԵԿ խմբակցության ղեկավար Հեղինե Բիշարյանը նշեց, որ տեղի ունեցած բռնությունները ապտակ են պատգամավորներին, պետք է հրավիրել արտահերթ նիստ` քննարկելու համար ստեղծված իրավիճակը, և նույնպես բոյկոտելու են արտահերթ նիստը:
ՀՅԴ խմբակցության ղեկավար Արմեն Ռուստամյանը նշեց. «Մենք, այս դատապարտելի արարքի հետ կապված, մեր հայտարարությունն արել ենք: Մենք դատապարտում ենք այն, ինչ տեղի է ունեցել ազատամարտիկների և մեր գործընկեր Արամ Մանուկյանի հետ, դա անընդունելի է, և Ազգային ժողովը պարտավոր է արձագանքել: Մենք առաջարկում ենք, որ ԱԺ նախագահն իր մոտ խորհրդակցություն հրավիրի ու դատապարտի այդ իրադարձությունները»:
Արմեն Ռուստամյանը քսան րոպե ընդմիջում վերցրեց, որից հետո ԱԺ նախագահը իր մոտ հրավիրեց խմբակցությունների ղեկավարներին:
Երբ խմբակցությունները ԱԺ նախագահի հետ պայմանավորվեցին դատապարտող հայտարարություն տարածել ԱԺ վեց խմբակցությունների անունից, ԱԺ չորս խմբակցությունները հայտարարեցին, որ բոյկոտում են արտահերթ նիստը:
ԱԺ ՀՅԴ խմբակցության ղեկավար Արմեն Ռուստամյանը լրագրողների հետ զրույցում հայտարարեց, որ իրենք չեն բոյկոտել նիստը, այլ ընդամենը դուրս են եկել դահլիճից:
Yerkir.am-ի հետ զրույցում ՀՅԴ խմբակցության ղեկավար Արմեն Ռուստամյանը նշեց, որ ԱԺ նախագահի մոտ խորհրդակցություն է հրավիրվել և պայմանավորվածություն է ձեռք բերվել, որ այսօրվա նիստի ավարտից հետո գումարվի արտահերթ նիստ, որտեղ կընդունվի հայտարարության տեքստը: «Այս ամենը համաձայնեցնելուց հետո, մեր կարծիքով, բոյկոտը չի տեղավորվում տրամաբանության մեջ: Իհարկե, մենք հարգում ենք մեր գործընկերների դիրքորոշումը, բայց եթե լուծվում է հիմնական նպատակը, այն է` դատապարտող հայտարարություն ընդունել արտահերթ նիստում, այս ժամանակն էլ օգտագործվի, որ մշակվեր այդ հայտարարության տեսքտը, այս ամենից հետո բոյկոտել, որ քանի դեռ այդ արտահերթ նիստը չի եղել, չեն շարունակելու այս արտահերթ նիստը, դա ուղղակի հակասահմանադրական պահանջ է»,- ասաց Արմեն Ռուստամյանը:
Նա հավելեց, որ արտահերթ նիստը գումարվել է նախաձեռնողի սահմանած օրակարգով և ժամկետներում, այսինքն` հստակ սահմանված է, որ նիստը սկսվելու է ժամը 12-ին և կտևի այնքան, մինչև օրակարգը սպառվի, կամ նախաձեռնողը որոշի, թե ինչ է անելու հետո: «Ինչպե՞ս էին պատկերացնում նիստի ընդհատումը: Նիստը ընդհատելը նշանակում է հակասահմանադրական քայլ կատարել: Դրա համար մենք առաջարկել էինք այն լուծումը, որը չէր հակասի Սահմանադրությանը, կընդունվեր հայտարարություն, որը կդատապատեր այդ գործողությունները` տալով քաղաքական գնահատական»,- ասաց նա:
Ստեղծված իրավիճակում քաղաքական ուժերի առաջարկը հասել էր իր նպատակին, խնդիրներ չէին մնացել` հակասություններ առաջացնելու համար, և բոյկոտն այդ պայմաններում, ըստ Ռուստամյանի, իմաստ և տրամաբանություն չուներ:
Իսկ թե ի՞նչ պետք է լիներ ըստ ընթացակարգի, պատգամավորը նշեց, որ այսօր քաղաքական ուժերը պետք է ստորագրահավաք սկսեին, ՀՀԿ-ն էլ տվել էր իր համաձայնությունը, և վեց խմբակցությւոնների կողմից մշակվելու էր հայտարարությունների տեքստը: «Այն, ինչ ուզում էինք, ստանում էինք, չհասկացա` բոյկոտը ինչի՞ էր պետք»,- ասաց Ռուստամյանը:
Հարցին, թե բոյկոտելուց հետո ի՞նչ վարքագիծ կդրսևորի ՀՀԿ-ն, Արմեն Ռուստամյանը պատասխանեց. «Հիմա ես չգիտեմ, թե այս իրավիճակում ինչ կլինի, կամ ով պետք է աշխատի այդ հայտարարության տեքստի վրա, չէ՞ որ քաղաքական ուժերը պետք է աշխատանքային խումբ ձևավորեին ու աշխատեին»:
Aravot.am-ի հետ զրույցում մեր հարցին, որ եղել են դեպքեր, երբ ՀՅԴ-ն մասնակցել է որոշ հարցերում ընդդիմադիրների բոյկոտին եւ դրա հակասահմանադրական լինելու մասին ոչինչ չի ասել՝ ՀՅԴ պատգամավոր Արծվիկ Մինասյանը պատասխանեց. «Միայն դրանով չենք բացատրում մեր՝ բոյկոտին չմիանալը: Երբ ցանկություն կա, որ, այո, գնահատական պետք է տրվի, չկա տարակարծություն, քաղաքական մեծամասնությունը նույնպես գտնում է, որ պետք է հրավիրվի արտահերթ նիստ այսօր ժամը 18.30-ին, դրան ընթացք է տրվում, հիմնավորումը ո՞րն է, որ բոյկոտես: Եվ մեր որոշման պատճառը սա է՝ սա արտահերթ նստաշրջան է, որտեղ օրակարգում այնպիսի հարցեր կան, որոնք կենսական նշանակություն ունեն: Ոչ այնքան վարկերը, որքան հարկային արտոնությունների խնդիրը, որը պետք է քննարկվի կամ ԵՏՄ միությանն անդամակցությունից բխող օրենսդրական փոփոխությունները, որոնք տնտեսվարողների սուբյեկտների հարկային վերադարձումների խնդիրները պետք է լուծեն: Սրանք հարցեր են, որոնք պետք է քննարկման առարկա դառնան: Այլ բան, որ մենք դեմ ենք արագընթաց քննարկումներին: Ինձ համար անհասկանալի է՝ եթե ընդամենը մեկ շաբաթ առաջ ԵՏՄ պայմանագրին կողմ են քվեարկում, եւ հիմա եկել է այդ պայմանագրից բխող կոնկրետ գործողություններ անելու հարցը, ինչպե՞ս են դա բոյկոտում: Եթե բոյկոտը վերաբերում է ձեւին եւ ստեղծված վիճակին, որ բռնություններին պետք է ԱԺ-ի կողմից պատասխան տրվի, միանշանակ է, որ դա պետք է հնչեցվի: Այստեղ մենք համակարծիք ենք: Գալուստ Սահակյանը համաձայն է: Բայց եթե մենք ընդամենը ձեւ ենք անում եւ ուզում ենք բոյկոտել, որովհետեւ չենք ուզում քննարկմանը մասնակցել, դրա հիմնավորումը այլ պիտի տրվեր»:
Արծվիկ Մինասյանը նաեւ նշեց, որ ոչ իշխանական խմբակցությունների ղեկավարները Գալուստ Սահակյանի հետ հանդիպմանը չեն դրել ուլտիմատում, որ անկախ նրանից, մեր պահանջը կբավարարեք, թե չէ, մենք չենք մասնակցելու քննարկմանը. «Եթե լիներ՝ արդար կլիներ, որ դա ի սկզբանե պայմանավորվեր, չգային համաձայնության, նոր ասեին:
Անդրադարձի մասով համաձայնություն կա, որ պետք է լինի, էլ ինչի՞ն ես բոյկոտում: Թե որն է ոչ իշխանականների այդ բոյկոտի իմաստը, Արծվիկ Մինասյանը չի կարողանում հասկանալ. «Խնդիրը շահարկելը չէ այն, ինչ տեղի է ունեցել, եթե ՀՀԿ-ին ինչ-որ բան պարտադրելու խնդիր կա, ապա դա պրոցեսի մեջ պետք է հասունացնես, ոչ թե ձեւական առումով փորձես տապալել ԱԺ նիստը: Իհարկե, դրա անհրաժեշտությունն էլ կա, երբ եղել են դեպքեր, որ չես կարողացել ազդեցություն ունենալ տարբեր օրենքների վերաբերյալ, փորձել եք այդ մեխանիզմը կիրառել, բայց այս դեպքում պետք է խնդիրը քննարկես: Եվ հետո գործընկերությունը ենթադրում է, որ եթե ինչ-որ բան քննարկում ես, պետք է ի սկզբանե ներգրավես մարդկանց քննարկման մեջ: Եթե չես ներգրավում, գալիս ես ինչ-որ որոշում ես պարտադրում, մեզ համար ընդունելի չէ այդ տարբերակը»:
