«Կուտակային կեսաթոշակների մասին» նոր օրենքի քննությունը Սահմանադրական դատարանում հետաձգվում է՝ հայվցոր կողմի միջնորդությամբ:
ԱԺ պատգամավոր Արծվիկ Մինասյանը (ՀՅԴ) «Ազատությանը» փոխանցեց, որ հարցը կքննվի ոչ թե վաղը, այլ հուլիսի 7-ին:
Մինասյանի խոսքով՝ նիստը հետաձգելու լուրջ հիմնավորումներ ունեն:
Պատգամավորը պնդում է, թե Կառավարությունն ու Ազգային ժողովը անպատասխան են թողել բազմաթիվ հարցեր կամ պատասխանել են ուշացումով:
Մինասյանի մտահոգությունն է հարուցում նաև Արդարադատության նախարարությունից ստացված պատասխանը․ – «Կա՛մ Կառավարությունն է գործել օրենքի պահանջի խախտմամբ, այն է՝ առանց Արդարադատության նախարարության գրավոր եզրակացության օրենսդրական նախագծերի Սահմանադրությանը համապատասխանության վերաբերյալ կայացրել է որոշում, հրավիրել արտահերթ նիստ և քննարկման առարկա է դարձրել շուրջ հիսուն օրենքներից բաղկացած փաթեթը: Կա՛մ Արդարադատության նախարարությունում տեղի է ունեցել պաշտոնեական լիազորությունների չարաշահում»:
Պատգամավորը պնդեց, թե խորհրդարանում ևս նոր օրենքը բազմաթիվ խախտումներով է ընդունվել:
Նրա խոսքով, հայցվորները մի շարք փաստեր են ներկայացրել ընթացակարգային խախտումների մասին, սակայն օրենսդիր և գործադիր մարինները շրջանցել են այս հանգամանքը և որևիցե պարզաբանում չեն տվել:
Մինասյանը թերի է գտնում նաև բովանդակային մասին տրված պարզաբանումները․ – «Բովանդակային առումով նկարագրել էր իր պատկերացրած կամ իր ուզած համակարգը՝ շրջանցելով թե՛ մեր դիմումում ներկայացված բազմաթիվ հարցադրումները, թե՛ նաև անտեսելով Սահմանադրական դատարանի որոշումը»:
Հաշվի առնելով խնդրի հանրային հնչեղությունը՝ հայցվոր կողմը ՍԴ-ից նաև պահանջել է գործը քննել բանավոր ընթացակարգով:
Ավելի վաղ նույն կոչով Սահմանադրական դատարան էր դիմել նաև «Դ!եմ եմ» շարժումը՝ ընդգծելով, որ միայն այդ դեպքում հասարակությունը վստահություն կունենա դատավարության արդյունքների նկատմամբ:
Արծվիկ Մինասյանը վստահ է, որ Կառավարությունը «երկրորդ անգամ նույն գետը չի մտնի», – «Դա նշանակում է պարզապես ոչնչացնել Սահմանադրական դատարանին: Իսկ այդպիսի վիճակ, ես վստահ եմ, որ ներկա իշխանությունները, համեմայն դեպս սահմանադրական այս փոփոխությունների փուլում, չեն գնա»:
Պատգամավոր Մինասյանը այսօր հազարավոր բողոքներ է ստանում․ ուշանում է հաշվեհամարների վրա փոխանցվելիք գումարը, մարդիկ չեն կարողանում օգտվել սոցիալական փաթեթներից, որը կապակցված էր սոցիալական նպատակային վճարների հետ, ֆոնդերի եկամտաբերությունը բացարձակապես չի համապատասխանում անգամ նվազագույն գնաճի ցուցանիշներին:
Կառավարությունը չի արձագանքում այս խնդիրներին, և անգամ ԱԺ պատգամավորները, ըստ Մինասյանի, զրկված են կուտակային համակարգի նկատմամբ վերահսկողական լիազորություններից․ – «Արդյունքում ստեղծվել է մի վիճակ, որ այս միջոցները անհասկանալի կերպով գնում են ինչ-որ տեղեր: Ո՛չ դրանց սեփականատերերը կամ ապագա շահառուները և ո՛չ էլ իրավասու մարմինները ի վիճակի չեն պատշաճ վերահսկողություն իրականացնել այդ միջոցների նկատմամբ»:
azatutyun.am