ԱՄՆ Հավայի նահանգի Պետական Սենատն անցած շաբաթ միաձայն բանաձեւ է ընդունել՝ ճանաչելով Հայոց ցեղասպանությունը եւ ապրիլի 24-ը հռչակելով որպես Ցեղասպանության զոհերի հիշատակման օր:
Այդ մասին հաղորդում է Asbarez-ը:
«Սենատը միանում է Հավայների Ներկայացուցիչների պալատին, ամերիկահայ համայնքին եւ ողջ աշխարհով սփռված հայերին՝ ճանաչելով եւ հարգելով Հայոց ցեղասպանության զոհերի հիշատակը, կոչ անելով աշխարհի բոլոր մարդկանց երբեք չմոռանալ մարդկության դեմ այդ սարսափելի հանցագործությունը»,- ասվում է ընդունված բանաձեւում:
Հավայների Սենատում բանաձեւը ներկայացրել են սենատորներ Սյուզան Չան Օքլենդը, Դոնովան Դելա Քրուզը, Ուիլ Էսպերոն, Բրին Հարիմոտոն, Լես Իհարա կրտսերը եւ այլք: Բանաձեւի ընդունմանը ներկա է գտնվել հայ համայնքի ներկայացուցիչ Արթուր Արթենյանը:
