«Առաջին լրատվական»-ի զրուցակիցն է ՀՅԴ ԳՄ ներկայացուցիչ, ԱԺ ՀՅԴ խմբակցության քարտուղար Աղվան Վարդանյանը:

– Ինչո՞ւ, այնուամենայնիվ, չմիացաք «այո»-ի քարոզչություն իրականացնող մյուս ուժերին՝ ՀՀԿ-ին և ԲՀԿ-ին:

– Սեպտեմբեր-հոկտեմբեր ամիսներին մենք 60-70 հանդիպում ենք ունեցել մարզային կառույցներում, և հսկայական աշխատանք է կատարվել: Մինչև այսօր այլ ուժերի նման մենք ևս գրեթե ամեն օր լրատվամիջոցների հյուրն ենք, ամեն տեղ խոսում ու ներկայացնում ենք: Պասիվության մեջ մեզ մեղադրելը ճիշտ չէ:

– Շտաբի ձևավորումը փոքր-ինչ ուշացավ:

– Դաշնակցությունը կոլեգիալ մարմին է, և Գերագույն մարմինը որոշել էր, որ ամբողջ կազմով է դառնալու շտաբ, դա եղել է վաղուց: Ուղղակի, երբ շտաբներն արդեն ձևավորվում էին և հայտարարեցին այդ մասին, մենք ևս հայտարարեցինք, որ կան կենտրոնական, տարածքային և մարզային շտաբներ, մեր կենտրոնական շտաբը ղեկավարում եմ ես: Շատ բնական է, որ մենք մեր քարոզչությունը իրականացնում ենք առանձին և չենք միավորվում նույն շտաբի կամ քարոզչական խմբի մեջ: Դա մի քանի պատճառներ ունի, նախ՝ Դաշնակցությունը միշտ եղել է ինքնուրույն իր բոլոր գործողություններում, երբեք չի եղել որևէ ուժի սպասարկողը, և մենք արել ենք այն, ինչ ճիշտ ենք համարել, մենք խորապես համոզված ենք եղել, որ Հայաստանի կառավարման ճիշտ մոդելը խորհրդարանականն է, այսօր հնարավորություն է ստեղծվել մեր այս համոզումը կյանքի կոչելու: Մեր փաստարկումները, թե ինչու են անհրաժեշտ սահմանադրական փոփոխությունները, բխում են նաև այսօրվա ախտաճանաչումից, այսօրվա իրականությունից ու պրոբլեմներից: Ես խորապես համոզված եմ, որ իշխանության կուսակցությունը չի կարողանա այդքան բաց խոսել այսօրվա թերությունների մասին: Մեր փաստարկները շատ ավելի խորքային և ամբողջական են, ձևավորվել են տասնամյակների ընթացքում, և շատ բնական է, որ, իբրև ինքնուրույն քաղաքական ուժ, մենք փորձելու ենք մեր պատկերացրածը, մեր ճիշտ համարածը փոխանցել մեր քաղաքացիներին, մեր ժողովրդին:

– «Ոչ»-ի դաշտը բավականին տրոհված է, և դա ունենում է ոչ դրական ազդեցություն: Մտավախություն չունե՞ք, որ «այո»-ի քարոզչության այս տրոհումը կարող է բացասական անդրադարձ ունենալ, ի վերջո, երբ մի բանում փորձում ես համոզել ընտրողին, քաղաքացուն, և կասկածի տակ է դրվում գործընկերոջ համոզելու հիմնավորումները, դա քաղաքացու, ընտրողի մոտ կասկածներ է առաջացնում:

– Կարծում եմ՝ երկու դեպքում էլ տրոհում բառն օգտագործելը ճշգրիտ չէր, թերևս: Ես քիչ եմ տեղյակ, թե «ոչ»-ի ճամբարում ինչ է կատարվում, որովհետև իրենց անելիքն է, թող իրենց աշխատանքը կատարեն: Ես մեր անելիքը գիտեմ: Գիտեմ, որ Դաշնակցությունն այս պարագայում միայն ինքնուրույն կարող էր կազմակերպել իր քարոզարշավը և իր հիմնավորումները բերել: Ես տրոհում չէի անվանի, ընդհակառակը՝ մի քանի ճակատով ոչ նույն հիմնավորումներով, բայց նույն ուղղությամբ աշխատելը, կարծում եմ, կօգնի գործին:

– Դուք ՀՀԿ հետ սահմանադրական փոփոխությունների հարցում, փաստորեն, գտնվում եք նույն ճամբարում այս փուլում: Կարևորում եք, որ ոչ միայն ձեր ասելիքի հիմքում առաջնայինը լինի գաղափարական մոտեցումը, այլ նաև ձեզ տրվելիք քվեում լինի այդ գիտակցված մոտեցումը և գաղափարական համոզմունքը: Նույնականացման քարտերի հետ կապված այս վիճահարույց օրինագծի քվեարկության ժամանակ ՀՅԴ-ն այլ դիրքորոշում որդեգրեց, առաջարկեցիք մի քանի տարբերակ՝ նշելով, որ ձեզ համար առաջնայինն այն է, որ վստահության մակարդակը շատ բարձր լինի: Ինչպիսի՞ն կլինի ձեր արձագանքը, եթե, այնուամենայնիվ, ընտրությունների գործընթացում ձեր ուզած վստահության բարձր մակարդակը չապահովվի:

– Այս փուլում համընկնում են մեր տեսակետները, տարբեր ժամանակներում չեն համընկել: Հիշեցնեմ, որ 90-ականներին այն ժամանակվա այլ Հանրապետական կուսակցության հետ մեր տեսակետները համընկում էին, նրանք ևս պաշտպանում էին խորհրդարանական կառավարման մոդելի անցման տեսակետը: Եղել են տեղաշարժեր, փոփոխություններ և այլն, և հիմա, փաստորեն, այն, ինչ մենք տասնամյակների համոզմունքով հայտնելու էինք, նրանք եկել են մեր տեսակետին, դա շատ նորմալ է: Անդրադառնալով ID քարտերի նախագծին, մենք ձեռնպահ քվեարկեցինք նախագծին, քանի որ գտնում էինք, որ պետք է մեր քաղաքացիներին իրավունք տալ ընտրելու, բայց մեխանիզմներ պետք է առաջարկել, որպեսզի դա դուռ չբացի հնարավոր ընտրակեղծիքների համար: Նույնիսկ զարմանալի էր, որ ՀԱԿ-ը հայտարարեց, որ Դաշնակցությունը միշտ այսպիսի հարցերում եղել է հետևողական և միշտ նորմալ ընտրությունների կողմնակից է: Այո՛, այդպես է: Մեզ համար որքան կարևոր է նոր Սահմանադրության ընդունումը, նույնքան կարևոր է նաև, որ հանրաքվեն լինի առավելագույնս նորմալ պայմաններում, արդարացի, ժողովուրդը վստահ լինի, որ իր քվեն է արտահայտել:

– Դուք հավատո՞ւմ եք, որ այդպես կլինի՝ նկատի առնելով, որ ՀՀԿ-ի շտաբի պետը Հովիկ Աբրահամյանն է…

– Ես այդպիսի կատեգորիաներով չեմ առաջնորդվում՝ հավատում եմ, թե չեմ հավատում, ես առաջնորդվում եմ հետևյալով, եթե ես համոզված եմ մեկ բանում, անպայման ամեն ինչ անում եմ, որ այդպես լինի: Դրա համար էլ Դաշնակցությունն այսքան ակտիվ ներգրավված է՝ և՛ մարզային հանդիպումներ, և՛ Երևանում հսկայական ծրագրեր ունենք պլանավորած, մենք եթե մի բանի հավատում ենք, աշխատում ենք, որ այդպես լինի, այլապես մենք պետք է ձեռքներս ծալենք, գնանք տանը նստենք: Նույնականացման քարտերի հետ կապված՝ մենք կոնկրետ առաջարկներ ենք ներկայացրել, և վստահ եմ, որ քննարկման արդյունքում ինչ-որ առաջարկ, որը կնպաստի վստահության որոշակի մեծացմանը, այս ուղղությամբ ևս կլինի:

– Այդ վստահությունը հիմնված է արդեն իսկ տարված քննարկումների՞ վրա:

– Այդ վստահությունը հիմնված է առաջին հերթին մեր հետևողականության, և ինչ-որ չափով նաև քննարկումների վրա: Մենք չենք սպասում, որ մեզ ինչ-որ բան թելադրեն: Մենք եթե մի բան ճիշտ ենք համարում, հետևողականորեն ապացուցում ենք, հիմնավորում ենք, փաստաթղթավորում ենք և շատ դեպքերում արդյունքի ենք հասնում:

– Մտավախություն չունե՞ք, որ ՀՀԿ-ի շտաբում ներգրավված են պետական պաշտոնյաներ, որոնց մասնակցությունը անհասկանալի է:

– Մտաոգություններ միշտ կան, չենք կարող մտահոգություններ չունենալ, բայց մենք ունենք ռեալ իրականություն և այսօրվա օրենսդրություն: Եվ այսօրվա օրենսդրությունը, ցավոք, այս ամբողջ համակարգին որևէ կերպ չի արգելում նման մասնակցությունը: Մենք ոչ միայն պետք է պարզապես մտահոգվենք, այլ նաև այս պայմաններում պիտի փորձենք առավելագույնն անել, որպեսզի ընտրությունները գոնե որակապես չտուժեն: Ես իդեալիստ չեմ, ես գիտեմ ամբողջ պատմությունը, ընտրակեղծիքների, խախտումների ամբողջ ներկապնակը անգիր գիտեմ, բայց հավատում եմ, և ոչ միայն ես, այլ նաև իմ ներկայացրած քաղաքական ուժը պայքարում է դրա համար, որ դա տարեցտարի նվազեցվի, և դրա համար մեխանիզմներ ստեղծվեն: Մենք ինչո՞ւ ենք կողմ այս սահմանադրական փոփոխություններին, որովհետև մենք համոզված ենք, որ նոր խաղի կանոնները նաև նվազեցնելու են այդ հնարավորությունները, և նոր օրենսդրությունն այլ մակարդակ է ունենալու: Միշտ կարելի է բողոքել, գնահատականներ տալ, բայց դրանով հարցերը չեն լուծվում, հարցերը լուծվում են աշխատելով:

– Եթե այս հանրաքվեի արդյունքում, ինչպես նախորդ գրեթե բոլոր համապետական ընտրություններից հետո, նաև նախորդ սահմանադրական հանրաքվեից հետո, պարզ դառնա, որ արդյունքները ձեռք են բերվել համատարած կեղծիքների շնորհիվ, ինչպիսի՞ն է լինելու ձեր արձագանքը:

– Դեռևս չի եղել մի ընտրություն, որտեղ մենք տեսած լինենք և արձանագրած լինենք խախտումներ, ընտրակեղծիքներ, վարչական ռեսուրսի, փողի օգտագործում, և մեր գնահատականները տված չլինենք: Մեկ պրոբլեմ մենք միշտ ունեցել ենք, և ընդդիմությունը միշտ ունեցել է, դա այն է, որ այսօրվա համակարգի պայմաններում երբեք հնարավոր չի եղել փաստացի նյութով համապատասխան մարմիններում ապացուցել այս խախտումների ծավալը և ազդեցությունը: Եվ սրա համար են նաև մեր հետագա պայքարը և Ընտրական օրենսգրքի շուրջ ընթացող այս քննարկումները, այս բանավեճերը, որպեսզի իսկապես ընդդիմությունը, որը հսկայական նոր լծակներ է ունենալու նոր Սահմանադրությամբ, կարողանա իսկապես այդ բազան ունենալ և դատարանում ապացուցել: Ես խորապես համոզված եմ, եթե կլինի ձեր նշած տարբերակով, եթե-ներով չխոսենք, բայց յուրաքանչյուր դեպքում մեր հստակ գնահատականները տվել ենք, մեզ համար որքան կարևոր է նոր Սահմանադրության դրական ելքը, նույնքան կարևոր է, որ այդ ելքը առավելագույնս արդար մթնոլորտում տեղի ունենա:

– Այսինքն՝ եթե այդպես չլինի…

– Անշուշտ, գնահատական կտրվի:

– Եվ դուք պատրաստ եք անգամ ընդդիմությա՞ն հետ դուրս գալ պայքարի:

– Անշուշտ, ես որևէ խնդիր չեմ տեսնում, ճիշտ գործի համար կարելի է պայքարել ցանկացածի հետ:

– Բազմաթիվ հայտարարություններ են հնչում, հիշատակեմ մեկը. Սյունիքի մարզպետ Սուրեն Խաչատրյանը, օրինակ, օրերս հայտարարեց, որ ինքն է որոշելու «ոչ»-ի տոկոսը իր ղեկավարած մարզում: Նա նաև նշեց, որ 50 տարի ՀՀԿ-ն լինելու է, և ինքն էլ լինելու է մարզպետի պաշտոնում: Դուք ասում եք, որ ընդդիմության համար այլ միջավայր է ստեղծվելու:

– Պարոն Խաչատրյանի ասածն ինձ համար հիմք չէ: Նա նույն բաներն ասել է և՛ ՀՀՇ-ի իշխանության ժամանակ, և՛ երկրորդ նախագահի իշխանության տարիներին: Նման մարդիկ պետական համակարգում միշտ լինում են: Մեր նպատակն է ունենալ այնպիսի համակարգ, որ պետական պաշտոնյաները ծառայեն պետությանը և հասարակությանը, ոչ թե մեկ կուսակցության:

– Վերադառնանք Ձեր քարոզչական անելիքներին. Ինչպե՞ս եք պատրաստվում առաջիկայում կազմակերպել Ձեր քարոզչությունը:

– Կենտրոնական շտաբը արդեն ակտիվ գործում է, մեր կենտրոնական շտաբում հավաքվել էին մարզային շտաբների պատասխանատուները, այնուհետև Երևանի մեր 11 կոմիտեների պատասխանատուները, հստակ աշխատանքի բաշխում է կատարված: Ամենաուշը վաղը հստակ կլինի մեր գործունեության ժամանակացույցը, մարզային հանդիպումները հիմնականում առաջիկա շաբաթ և կիրակի օրերին կլինեն: Մենք ստեղծել ենք 5 քարոզչական խումբ՝ մեր հայտնի գործիչների ղեկավարությամբ, ամեն խումբը հանդիպում կունենա 2 մարզում: Նույն կարգի հանդիպումներ կունենանք նաև Երևանում, բացի դրանից՝ Երևանում նաև մասնագիտական, ոլորտային հանդիպումներ կունենանք մտավորականության հետ, բիզնես, գիտակրթական, առողջապահական ոլորտների ներկայացուցիչների հետ: Վաղը արդեն պատրաստ կլինի մեր քարոզչական հանրամատչելի նյութը՝ 10 էջանոց բուկլետը, որտեղ շատ պարզ ու հասկանալի փորձել ենք ներկայացնել ներկա համակարգի բացերը և նոր համակարգի, նոր Սահմանադրության բերած առավելությունները: Նաև պաստառներ կունենանք, և առաջիկա օրերին կսկսվի լիարժեք քարոզչական շրջանը՝ գումարած ԶԼՄ-ներով ելույթները և տեսահոլովակները:

Հեղինակ՝ Արևիկ Սահակյան

1in.am