Առաջին անգամ չէ, որ ԵԽԽՎ-ն հակահայկական ու միակողմանի բանաձևեր է քննարկում` հակառակ հայկական կողմի բողոքների: Այս մասին «Արմենպրես» մամուլի սրահում հրավիրված ասուլիսին ասաց ՀՅԴ Բյուրոյի անդամ, ՀՅԴ Հայ դատի և քաղաքական հարցերի գրասենյակի պատասխանատու Կիրո Մանոյանը` անդրադառնալով ԵԵԽՎ ձմեռային նստաշրջանում երկու հակահայկական բանաձևերի սպասվող քննարկմանը: Նրա խոսքով՝ հայկական կողմը կարողացածն անում է, պարզապես այստեղ կարևորվում է մեր հասարակության աջակցությունն ու մասնակցությունը:

«Հայտնի է, որ Հայ դատի Եվրոպայի հանձնախումբը սկսել է ստորագրահավաք: Հայաստանից էլ այդ ստորագրահավաքին մասնակցությունն օգտակար կլինի: Նախաձեռնողները 1500 ստորագրություն էին ակնկալում, բայց այդ շեմն անցել են, հիմա թիրախ են սահմանել 2500-ը, դա էլ շուտով կանցնի, եթե ՀՀ-ից էլ մասնակցեն»,-ասաց նա` ընդգծելով, որ ստորագրահավաքը վեհաժողովի պատգամավորների վրա ճնշում գործադրելու գործիք է: Նրա խոսքով՝ ցանկացած մարդ change.org կայքի միջոցով կարող է մասնակցել ստորագրահավաքին։

Ըստ Կիրո Մանոյանի` դժվար չէ ենթադրել, թե ինչպիսին կլինեն քննարկումների արդյունքները, բայց կարծում է, որ ամեն դեպքում մինչև վերջին պահն այդ ուղղությամբ պետք է աշխատանք տարվի:

«Այստեղ շատ կարևոր է ԵԱՀԿ Մինսկի խմբի համանախագահող երկրների դերակատարությունը. իրենք պետք է ակտիվ լինեն: Նախ և առաջ նման բանաձևերը հարվածում են իրենց միջնորդած բանակցությունների գործընթացին: Ադրբեջանի բուն նպատակն այն է, որ բանակցությունների հարթակը փոխի»,-ավելացրեց Կիրո Մանոյանը:

Ըստ նրա՝ հայկական պատվիրակությունը կարող է ավելի մեծ արդյունքի հասնել, եթե ԵԽԽՎ-ում շատ պատգամավորների հետ աշխատի: Ամեն դեպքում, բանաձևերի ընդունումը Կիրո Մանոյանն աշխարհի վերջը չի համարում: Նա նշեց, որ Ադրբեջանը քարոզչական նկատառումներով կարող է օգտագործել այդ հակահայ որոշումները:

«Բայց ինչքան էլ ասենք կարեւոր չէ ԵԽԽՎ-ի նման որոշումը, եթե հայանպաստ որոշում լիներ՝ կբարձրաձայնեինք, որ շատ կարեւոր է: Ուղղակի այս որոշումը ղարաբաղյան հարցի վրա դրական ազդեցություն չի կարող ունենալ, սակայն բացասական ազդեցություն կունենա, ինչը կխրախուսի Ադրբեջանին՝ շարունակելու իր կամայական կեցվածքը բանակցությունների ընթացքում, Հայաստան-Ադրբեջան սահմանին, Արցախ-Ադրբեջան շփման գծում: Ադրբեջանը դժգոհ է բանակցային գործընթացից, ուզում է հարցը տեղափոխել բանակցային սեղանից այլ հարթակներ, տվյալ դեպքում՝ ԵԽԽՎ: Անհրաժեշտ է, որ միջազգային համայնքը, եթե հարգում է իրեն, թույլ չտա, որ ծախու ապրանք դառնա Ադրբեջանի ձեռքին»,-ասաց նա և հույս հայտնեց, որ Մինսկի խմբի համանախագահող պետություններն ավելի ակտիվ կլինեն եւ իրենց տեսակետը լսելի կդարձնեն կողմ քվեարկած պատգամավորներին, որ քայլը կվնասի բանակցային գործընթացին:

Հիշեցնենք, որ այս տարվա հունվարի 25-ին Ստրասբուրգում մեկնարկում է ԵԽԽՎ ձմեռային նստաշրջանը, որի օրակարգում ընդգրկված են երկու հակահայկական բանաձեւերի: ԵԽԽՎ սոցիալական հարցերի կոմիտեն ընդունել է բոսնիացի պատվիրակ Միլիցա Մարկովիչի «Ադրբեջանի սահմանամերձ շրջանները միտումնավոր զրկված են ջրից» անվանումով զեկույցը, իսկ ԵԽԽՎ քաղաքական հարցերի կոմիտեն ընդունել է բրիտանացի պատվիրակ Ռոբերտ Ուոլթերի հեղինակած «Բռնությունների աճը Լեռնային Ղարաբաղում եւ Ադրբեջանի այլ գրավյալ տարածքներում» անվանումով զեկույցը:

Մեր հարցին՝ ԱԺ-ում ընդդիմադիրները աղմուկ բարձրացրեցին, որ ԵԽԽՎ-ի այդ բանաձեւերը կարող էին եւ չլինել, եթե հայկական պատվիրակությունը լավ աշխատեր, առնվազն հնարավոր էր փոխել զեկուցողին,Դուք կիսո՞ւմ եք այդ տեսակետը, որ հնարավոր էր դրանից խուսափել եւ չարվեց՝ Կիրո Մանոյանը պատասխանեց. «Այդքան էլ հեշտ չի զեկուցողին փոխելը, որովհետեւ այնտեղ կա Թուրքիայի պատվիրակությունը, որը բավականին մեծ թիվ է ներկայացնում, էլ չեմ խոսում Ադրբեջանի մասին, մի շարք պետությունների պատգամավորներ, որոնք կարելի է աչքը փակ ասել, որ իրենց հետ են լինելու: Ոմանք կարող է սկզբունքային հարց ունենան, որոշ պետություններ, որոնք նման խնդիրներ ունեն, կարող է նաեւ այլ կեցվածք ունենան, բայց ակնհայտ է, որ կարեւոր թվով պատգամավորներ Ադրբեջանը կարողանում է առնել: Եվ միայն աշխատանքով հնարավոր չէ նրանց կողմնորոշել, հատկապես, երբ նման անսկզբունքային մոտեցումներ են դրսեւորվում: Իրենք գումարով են առել, մենք պիտի փորձենք այլ քաղաքական նորմալ միջոցներով ճնշել»:

Հարցին՝ երբ նման հակահայկական բանաձեւեր են ընդունվում, անընդհատ խոսում են, որ պատվիրակությունների կազմը պետք է փոխել, որովհետեւ պատահական մարդիկ են լինում, որոնք տարվում են խանութներից առեւտուր անելով եւ չեն կենտրոնանում խնդրի վրա՝ Կիրո Մանոյանը պատասխանեց. «Պատվիրակության բոլոր անդամների մասին համաձայն չեմ, դա չի վերաբերվում: Կուսակցությունները, ովքեր ներկայացուցիչ են նշանակում, պետք է իրենք պատասխանատու լինեն: Մենք մեր մասով շատ հանգիստ ենք, որ մեր ներկայացուցիչը լիիրավ արդարացնում է իր ներկայությունն այնտեղ: Խոսքը Արմեն Ռուստամյանի մասին է»:

Թուրքիայի այս իշխանությունները կարծես որդեգրել են հետևյալ սկզբունքը. այնպես անել, որ իրենց ծրագրածն առաջ տարվի, հակառակ դեպքում երկիրը կտանեն պատերազմի, ինչպես հիմա տարել են քաղաքացիական կռիվների: Նման կարծիք հայտնեց ՀՅԴ Հայ Դատի և քաղաքական հարցերի գրասենյակի պատասխանատու Կիրո Մանոյանը` անդրադառնալով տարածաշրջանային զարգացումներին:

«Հաշվի առնելով, թե Թուրքիայի ներսում ինչ է կատարվում, իշխանություններն ինչ ուղղություններով են աշխատում, կարող ենք ասել, որ Թուրքիայի համար բավական ոչ կայուն զարգացումներ են սպասվում առաջիկա ամիսներին, նույնիսկ տարիներին»,-ասաց Կիրո Մանոյանը: Հնարավո՞ր է Հայաստանը, Սփյուռքը միջազգային հարթակներում Հայ դատի հարցն առաջ տանելու գործում հաջողություններ գրանցեն` հաշվի առնելով այն, որ Թուրքիան ներքին խնդիրներով ու ահաբեկչական հարցերով է տարված և կարծես թե Հայոց ցեղասպանության հարցի ուղղությամբ իշխանությունների ուշադրությունը մարել է: Պատասխանելով հարցին` Կիրո Մանոյանը նշեց, որ ճիշտ չէ ասել, որ Հայոց ցեղասպանության հարցի նկատմամբ Թուրքիայի իշխանությունների ուշադրությունը մարել է: «Դա այնքան էլ միանշանակ չէ… Այո, Թուրքիան զբաղված է ներքին հարցերով, բայց մենք տեսանք, թե Թուրքիան ԵՄ-ի համար մեծ կարեւորություն ստացավ Սիրիայից փախստականների հարցերի հետ կապված եւ ինչպես Գերմանիայի խորհրդարանը հետաձգեց Հայոց ցեղասպանության հարցի քննարկումը: Պարզ էր, որ դա արվեց Թուրքիային չնեղացնելու համար»,-ավելացրեց Կիրո Մանոյանը:

Անդրադառնալով տարածաշրջանային զարգացումներին՝ Մանոյանը նշեց, որ ստեղծված իրավիճակը վտանգավոր է, բայց հաճախ նոր հնարավորություններ են ստեղծվում, որոնցից կարելի է օգտվել` կապված թե ինչ ակտիվություն կցուցաբերի Հայաստանը:

«Եթե շատ սրվեն հարաբերությունները ՌԴ-Թուրքիա՝ հասնելու մինչեւ պատերազմական վիճակի, կարծում եմ, մեզ համար ոչ մի լավ բան էլ չի լինի: Բայց ինչ-որ չափով սրումը որոշ հնարավորություն է տալիս, որ ակտիվներ ձեռք բերենք:
Տարածաշրջանային զարգացումներում Թուրքիան՝ որպես տարածաշրջանային դերակատար, բավական շատ վարկաբեկվում է իր պահվածքով, և մենք կարող ենք նաև այլ պետությունների հետ այս ուղղությամբ արդյունավետ աշխատանք տանել»,-ասաց նա:

Կիրո Մանոյանը կարևորեց նաև Իրան-Արևմուտք հարաբերությունների կարգավորումը: Ըստ նրա` դա դրական ազդեցություն կթողնի Հայաստանի վրա, որովհետև Հայաստանն արդեն և’ Իրանի, և’ Արևմուտքի հետ ունի սերտ հարաբերություններ և կարող է այս առիթից օգտվելով՝ որոշ տնտեսական գործընթացներում դերակատարություն ունենալ:

armenpress.am / «Առավոտ» / news.am

Պատրիարք Կիրիլը կա՛մ պատմությունից անտեղյակ է, կա՛մ էլ նպատակաուղղված խեղաթյուրում է

Մոսկվայի եւ Համայն Ռուսիո պատրիարք Կիրիլը «Ռոսիա 1» հեռուստաընկերության եթերում հունվարի 7-ին սուրբծննդյան հարցազրույց էր տվել Դմիտրի Կիսիլյովին եւ խոսելով Մերձավոր Արեւելքում ստեղծված իրավիճակի մասին՝ Օսմանյան կայսրության օրինակն էր բերել՝ ասելով. «Օրինակ՝ վերցնենք թուրքական, Օսմանյան կայսրությունը: Այո՛, եղել են քրիստոնյա փոքրամասնություններ, սակայն նրանց ոչ ոք չի ոչնչացրել»: Այս հայտարարությունը բնականաբար բացասական արձագանք էր ստացել մեր հայրենակիցների կողմից: Եվ չնայած հայտարարությունից հետո պատրիարքի մամուլի խոսնակ Ալեքսանդրա Վոլկովան պարզաբանում էր տարածել, որ Ռուս Ուղղափառ եկեղեցու դիրքորոշումը Հայոց ցեղասպանության վերաբերյալ անփոփոխ է, բայց այդ պարզաբանումը եւս միանշանակ չի ընդունվում:

Այս առնչությամբ Aravot.am-ի հետ զրույցում ՀՅԴ Հայ Դատի եւ քաղաքական հարցերի գրասենյակի պատասխանատու Կիրո Մանոյանն ասաց. «Կարծում եմ, պատրիարքը ինչ-որ տեղ սխալվել է: Եթե չի սխալվել, շատ հստակ պատմությունը խեղաթյուրում է: Իրենց այդ հաջորդած բացատրությունը, եթե տեղադրել են իրենց կայքում, դա նշանակում է՝ իրենց մյուս ասածը սխալ է: Չի կարելի մի կողմից Հայոց ցեղասպանությունը ճանաչել, մյուս կողմից ասել, որ Օսմանյան կայսրությունում միշտ էլ լավ է եղել: Այնպես չէ, որ Օսմանյան կայսրության ամբողջ գործունեության ընթացքում միշտ քրիստոնյաների ջարդեր են տեղի ունեցել, բայց դա չի նշանակում, որ տեղի ունեցած ջարդերը պետք է անտեսել: Կարծում եմ, իր ճիգն ուրիշ էր, նա փորձում էր իսլամին չմեղադրել, ասել, որ անցյալում էլ իսլամի հետ քրիստոնյաները կարողացել են նորմալ ապրել, բայց իրականությունն այն է, որ ցեղասպանության ժամանակ, կամ ցեղասպանությանը ն ախորդած ջարդերի, սպանդների ժամանակ իսլամն օգտագործվել է: Մենք չենք ասում դա իսլամն է արել, բայց իսլամի անունով գործել են ե՛ւ իշխանավորներ, ե՛ւ կրոնավորներ: Այսօր էլ Մերձավոր Արեւելքում, երբ իսլամի անունով տեղի են ունենում նման ոճիրներ, դա չի նշանակում, որ իսլամն է մեղավոր, բայց իսլամի անունով անում են: Ինքը, ընդհակառակը, փոխանակ փորձեր տարբերություն դնել, պիտի ասեր, որ անցյալում էլ է եղել, հիմա էլ է լինում եւ ոչ թե այդ տարբերությունը, որը լրիվ հակասում է»:

Ըստ Կիրո Մանոյանի, պատրիարք Կիրիլի հայտարարությանը հաջորդած պարզաբանմամբ իրենք մեզ հանգստացրեցին, բայց դա միայն մեզ չէր վերաբերվում. «Օսմանյան կայսրության մեջ այդ վերաբերմունքը վերաբերում էր հույներին նաեւ, ասորիներին, սերբերին: Այս բոլորը հերքելն արդեն նշանակում է ուրիշ բան՝ կա՛մ պատմությունից անտեղյակ է պատրիարքը, կա՛մ էլ նպատակաուղղված ձեւով խեղաթյուրում է: Երկու դեպքում էլ ափսոս է պատրիարքը»:

aravot.am