Ոչ ոք չի հայտարարել, որ երեկվա դրությամբ բանակցությունները պետք է ավարտվեին. այսօր խորհրդարանում, պատասխանելով լրագրողների հարցին, թե ինչո՞ւ երեկվա դրությամբ չավարտվեցին իշխանությունների հետ բանակցությունները համագործակցության շուրջ, ասաց ԱԺ ՀՅԴ խմբակցության քարտուղար Աղվան Վարդանյանը:
«Մենք ունենք առնվազն երեք խնդիր, որոնք պահանջում են ժամանակ, աշխատանք, քննարկումներ: Առաջին խնդիրն այն է, որ հնարավոր համագործակցության արդյունքում մենք պետք է մեր քաղաքացիներին ու հասարակությանը համատեղ ասելիք ունենանք, թե ինչ ենք ծրագրում անել, ինչպես ենք ծրագրում, ինչ ուղղություններով ենք աշխատելու, և դա պետք է լինի իսկապես այսօրվա ռեալություններից բխող: Սա ենթադրում է փոխադարձ համաձայնեցում»,- ասաց նա:
Երկրորդ ուղղությունը, ըստ Վարդանյանի, համատեղ որոշումներ կայացնելու, քննարկելու և համաձայնեցնելու մեխանիզմն է: Երրորդ ուղղությունը պատասխանատվությունն է:
«Որքան էլ փորձեր արվեցին Դաշնակցությանը պառակտել, Դաշնակցության ու Հանրապետականի միջև կռիվ գցել, բայց կարևորն անկարևորից պետք է զանազանել, և պետք է հասկանանք, որ, ուզենք, թե չուզենք, նոր Սահմանադրությունը և նոր համակարգը մեր երկրում սկիզբ է դրել միակուսակցական համակարգի ավարտին: Շատերը սա չեն ուզում տեսնել, բայց մենք համակարգ ենք փոխում, գուցե դանդաղ, բայց մենք այս ճանապարհով ենք գնալու:Պետք է նոր քաղաքական մշակույթ ձևավորվի, որտեղ տարբեր քաղաքական ուժեր կարողանան բանակցել, քննարկել ու համաձայնեցնել հարցերը»,- ասաց Վարդանյանը:
Ճեպազրույցների ընթացքում ԱԺ ՀՅԴ խմբակցության քարտուղար Աղվան Վարդանյանը պատասխանեց լրագրողների հարցերին:
Հարցին, թե որքանո՞վ արդյունավետ կարող է լինել համագործակցությունը իշխանությունների հետ, այն դեպքում, երբ ԲՀԿ-ն որոշել է չհամագործակցել իշխանությունների հետ` դա անարդյունավետ համարելով, Աղվան Վարդանյանը պատասխանեց. «Այն, ինչ որոշում է ԲՀԿ-ն, դա իր խնդիրն է, ներկուսակցական հարցերը, և ես բացարձակապես հետաքրքրված չեմ, բայց մենք ասել ենք, որ բնական ու նորմալ համագործակցությունը, կոալիցիան ընտրություններից հետո է լինում, և դա իրական է, երբ որևէ քաղաքական ուժ առանձին չի ունենում մեծամասնություն, և երբ որոշումները հստակ մեկը մյուսով պայմանավորված են: Բայց մենք նոր իրավիճակում ենք գտնվում, ունենք հսկայական աշխատանք` գոնե սկսելու կյանքի կոչել նոր համակարգը: Այստեղ, այո, մենք գտնում ենք, որ ուժերի միավորումը կարող են արդյունք տալ: Մենք ուզում ենք այս երկրում գոնե փոքր դրական փոփոխություններ առաջացնել, հույս ներշնչել, որ համակարգն իսկապես լիարժեք կաշխատի: Այո, մեկ տարին բավարար է դրա համար, վեց ամիսն էլ է բավարար, երեք ամիսն էլ գուցե բավարար` հույս առաջացնելու: Ոչ մեկի համար գաղտնիք չէ, որ Հանրապետականը զվարթնոց չէ, այսինքն` հրեշտակների հավաքվելու վայր: Նույնիսկ Դաշնակցությունը զվարթնոց չէ: Պարզ է, որ կլինեն տարբեր մոտեցումներ, տարբեր կարծիքներ, բայց մեր պես քաղաքական ուժը ունենում է հստակ առանցք և ուղղություն: Եթե մենք համոզված չլինենք, որ ճիշտ բան ենք անում, վստահ եղեք, որ չենք անի: Մենք գիտենք, որ այս երկրում կան լրջագույն խնդիրներ, և անհրաժեշտ են արմատական փոփոխություններ: Կկարողանա՞նք նպաստել դրան, ուրեմն կաշխատենք»:
Հարցին, թե ի՞նչ նկատի ուներ ՀՀԿ խոսնակ Էդուարդ Շարմազանովը, երբ ասում էր, որ ՀՅԴ-ի հետ նախատեսվում է երկարաժամկետ, կայուն համագործակցություն, Աղվան Վարդանյանը պատասխանեց, որ խոսվում է ապագայի կոնտեքստում, որ եթե կարողանում են համագործակցությամբ լավ հիմքեր դնել, փոփոխություններ ու հույս առաջացնել, կախված 2017թ. ընտրությունների արդյունքներից` կքննարկվի արդեն կոնկրետ ձևաչափը:
«Ուզենք, թե չուզենք, մենք դուրս ենք գալիս միանձնյա ղեկավարման շրջանակներից, ինչը ենթադրում է բոլորովին այլ հարաբերություններ, բոլորովին այլ տիպի աշխատանք»,- ասաց նա՝ հորդորելով լրագրողներին կարդալ Կարո Արմենյանի հոդվածը «Ասպարեզ» օրաթերթում:
Լրագրողները Աղվան Վարդանյանից հետաքրքրվեցին, թե ում թեկնածությունն են առաջադրելու ՄԻՊ-ի պաշտոնում:
Աղվան Վարդանյանը նշեց, որ ՀՀԿ-ի առաջադրած թեկնածուին՝ ՀՀ արդարադատության փոխնախարար Արման Թաթոյանին չի ճանաչում, դեմքը, սակայն, ծանոթ է: Նա նշեց, որ ՀՅԴ-ն նախնական քննարկում է անցկացրել այդ հարցով, բայց դեռ որևէ մոտեցում չունեն:
Հարցին, թե հնարավո՞ր է, որ պաշտպանեն Զարուհի Փոստանջյանի թեկնածությունը, պատասխանեց. «Ես անձամբ Զարուհի Փոստանջյանին ասել եմ, եթե իր անունը հասնի խորհրդարան, ես նրան կողմ եմ քվեարկելու: Մնում է` օգնեք, որ հասնի: Ես անձամբ եմ խոստացել նրան: Ես կանանց անձամբ եմ խոստումներ տալիս»:
Պետք է նոր քաղաքական մշակույթ ձևավորվի, որտեղ տարբեր քաղաքական ուժեր կարողանան բանակցել, քննարկել ու համաձայնեցնել հարցերը: Մեր շատ սիրելի նախկին քաղբանտարկյալներից մեկը գրում է, թե «Մոսկվայում է որոշվել, որ Դաշնակցությունը պետք է համագործակցի իշխանությունների հետ»: Այդ ինչո՞ւ մենք չենք ասում, որ Մոսկվայից էին ձեզ ասել, որ Սահմանադրությանը «ոչ» պետք է ասեք, կամ երեկ կարդում եմ. «Հանրապետականները գտնում են, որ Աղվան Վարդանյանը վարկաբեկված է, դրա համար համաձայն չեն»:
Զառանցանք, ո՞վ է խոսում վարկաբեկվածությունից, ո՞ւմ կայքերը: Մարդիկ, ովքեր կոկորդներն ու ամեն տեղերը պատռում էին, որ Սահմանադրությունը չի անցնելու, որ պետք է «ոչ» ասել Սահմանադրությանը, հիմա էլ իրենց համար մի փոքր անկյուն են գտել ու սկսում են բամբասել: Աղվան Վարդանյանի խնդիր ընդհանրապես չի եղել, չենք էլ քննարկել նման բան»,- ասաց Աղվան Վարդանյանը:
