Օրերս Փարիզում տեղի ունեցաւ ՀՅ Դաշնակցութեան Բիւրոյի հերթական լիագումար նիստը:

Օրակարգում Հայաստանի նոր քաղաքական իրավիճակում այլեւս ընդդիմադիր կարգավիճակով հանդէս եկող ՀՅ Դաշնակցութեան անելիքների հարցն էր` ե’ւ ներքին, ե’ւ արտաքին քաղաքականութեան մէջ:

Քննարկելով վերջին զարգացումները` Բիւրոն հաստատեց, որ ստեղծուած կացութեան մէջ կոալիցիայից դուրս գալը միակ ճիշտ քայլն էր: Ընդդիմութիւն դառնալը հնարաւորութիւն է` սթափեցնելու իշխանութիւններին եւ կանխելու վտանգաւոր զարգացումները հայ-թուրքական յարաբերութիւններում: Դաշնակցութիւնը ծայրայեղութիւններից զերծ է մնալու` իր կեցուածքների փոփոխութիւնը պայմանաւորելով իշխանութեան քայլերով:

Այսուհետ հայրենիքում ՀՅԴ առաջնահերթ խնդիրներն են` կուսակցութեան կազմակերպական հզօրացումը, լայն շերտերի շրջանում ազգային-պետական մտածողութեան դաստիարակութիւնն ու արմատաւորումը, ժողովրդավարական եւ սոցիալական արդարութեան ՀՅԴ ծրագրային մօտեցումները կեանքի կոչելը, գիտակից, պատասխանատու, հայկական շահերով առաջնորդուող քաղաքական, տնտեսական, հոգեւոր-մշակութային ազդեցիկ խաւի ձեւաւորմանն աջակցելը: Այս առումով յատուկ կարեւորուեց երիտասարդութեան շրջանում կատարուելիք աշխատանքը:

Արցախեան հիմնահարցի կարգաւորման գործընթացում զգօնութեան պահպանումը, թուրքական միջամտութեան բացառումը, միջազգային ասպարէզում հայկական տեսակէտների ներկայացումն ու պաշտպանութիւնը Դաշնակցութեան ամենօրեայ գործը պէտք է դառնան:

Որոշուեց Հայ Դատի գրասենեակների համաշխարհային ցանցի միջոցով նոր թափ հաղորդել Ցեղասպանութեան ճանաչման, Թուրքիայի դատապարտման եւ հատուցման աշխատանքներին:

Հայաստանի պետական շահերի պաշտպանութիւնը, տնտեսական կարողականութեան բարձրացումը շարունակելու են մնալ արտաքին ճակատում մեր հիմնական գերակայութիւնները:

Ընդգծուեց, որ կոալիցիայից ՀՅ Դաշնակցութեան դուրս գալը որեւէ կերպ չպէտք է բացասաբար անդրադառնայ Հայաստան-սփիւռք յարաբերութիւնների վրայ: Ընդհակառակը, մենք պէտք է գիտակցենք, որ միայն համազգային համախմբմամբ, նիւթական, մտաւոր եւ հոգեւոր ուժերի մէկտեղմամբ կարող ենք ու պարտաւոր ենք յաղթահարել մեր երկրի եւ ժողովրդի առջեւ ծառացած մարտահրաւէրները:

27 մայիսի 2009թ.