ԵՐԵՒԱՆ, «Արմէնփրէս».- Ֆրանսայի հայկական համայնքը Յուլիս ամսուան ընթացքին հանդիպում պիտի ունենայ այդ երկրի նախագահ Ֆրանսուա Հոլանտի հետ՝ առաջին անգամ ըլլալով անոր նախագահութեան պաշտօնի ստանձնումէն ի վեր:
«Արմէնփրէս»ի հետ հարցազրոյցի մը ընթացքին, Հայ Դատի Փարիզի գրասենեակի ղեկավար Հրաչ Վարժապետեան յայտնած է. «Ազգային ժողովի պատգամաւոր Վալերի Պուայէ Հայկական Ցեղասպանութեան ուրացումը քրէականացնող նոր օրինագիծը պիտի ներկայացնէ, հաւանաբար, Հոկտեմբերին: Այս անգամ եւս ընթացակարգը նոյնն է՝ քննարկում խորհրդարանին մէջ, ապա՝ Ծերակոյտին մէջ, որմէ ետք նախագահ Հոլանտ պէտք է վաւերացնէ օրինագիծը՝ առանց սպասելու, որ այն բողոքարկուի եւ ուղարկուի Սահմանադրական խորհուրդ»:
Ըստ Վարժապետեանի՝ այս հարցերը հայ համայնքի ներկայացուցիչները պիտի քննեն նախագահին հետ իրենց հանդիպման ընթացքին: Միասնաբար պէտք է պատրաստուի նոր օրինագիծը, որուն համար, նախագահի վարչակազմի կողքին, պէտք է մասնակցին նաեւ հայ մասնագէտներ եւ համայնքի քաղաքական ներկայացուցիչներ: Այս բոլոր հարցերը պիտի յստականան Հոլանտի հետ հանդիպումէն ետք:
«Թուրքիա այս անգամ եւս ամէն գնով պիտի փորձէ խոչընդոտել գործընթացը: Թրքական կողմը Հոլանտի մօտ արդէն հակաքարոզչութիւն սկսած է իրականացնելու, սակայն հայ համայնքը եւս վճռական է, եւ այդպէս պիտի մնայ մինչեւ օրինագիծի վաւերացումը, որպէսզի Ֆրանսայի տարածքին Հայոց Ցեղասպանութեան ժխտողականութիւնը օրէնքի ուժով պատժելի ըլլայ», նշեց Հայ Դատի Փարիզի գրասենեակի ղեկավարը:
Վարժապետեանի համաձայն՝ ընկերվարականներու իշխանութեան օրերուն շատ աւելի լուրջ եւ հաստատ պէտք է ըլլայ այս օրինագիծին ներկայացումն ու վաւերացումը:
Ֆրանսայի Սահմանադրական խորհուրդը Փետրուար 28ին հակասահմանադրական նկատած էր Ցեղասպանութիւններու ուրացումը քրէականացնող օրինագիծը, որ խորհրդարանին եւ Ծերակոյտին կողմէ վաւերացուած էր յաջորդաբար՝ Դեկտեմբեր 2011ին եւ այս տարուան Յունուարին: Օրինագիծը կը պահանջէր Ֆրանսայի տարածքին Հայոց Ցեղասպանութիւնը ուրացողները պատժել մէկ տարի բանտարկութեամբ եւ 45 հազար եուրօ տուգանքով: