Այսօր խորհրդարանական ճեպազրույցներում ԱԺ ՀՅԴ խմբակցության քարտուղար Աղվան Վարդանյանը, պատասխանելով հարցին` արդյո՞ք Դաշնակցությունը հարվածի տակ չդրեց իր հեղինակությունը՝ գնալով ՀՀԿ-ի հետ քաղաքական համագործակցության, ասաց. «Դաշնակցությունը շարունակում է իր աշխատանքն այնպես, ինչպես արել է ընդդիմություն եղած ժամանակ: Մեզ համար այս կարգավիճակը նոր չէ. մենք եղել ենք արմատական ընդդիմություն, եղել ենք իշխանության մաս, նորից ենք եղել ընդդիմություն, բայց երբեք չենք խուսափել հարցերին հավասարակշռված արդյունք ակնկալող աշխատանքից: Երբեք պոպուլիստ չենք եղել, չենք հավատացել մեկ օրում հարցերը լուծելուն: Մենք փորձել ենք, խնդիրները փաստարկելով, հիմնավորելով, դրանք հայեցակարգի վերածել ու աշխատել: Դաշնակցության վարկանիշի համար խնդրում եմ մի’ անհանգստացեք: Այսօր քաղաքական ուժերը բոլորն ունեն խնդիր, որովհետև քաղաքական համակարգը ինքնին վստահություն չի վայելում լայն հասարակության շրջանում, բայց լայն հասարակությանն էլ համեմատության մեջ պետք է նայել»:

Պատգամավորըի խոսքով՝ հենց սկզբից է ասվել, որ, ՀՀԿ-ի հետ քաղաքական համագործակցության գնալով, Դաշնակցությունը մեծ պատասխանատվություն է իր վրա վերցնում, շատ հարվածներ է վերցնելու, շատ է թիրախավորվելու:

«Ասել եմ նաև, որ ուրախ կլինեմ, որ մեր նախարարների գործունեությունը լինի մանրադիտակի տակ, որովհետև մենք պատասխանատվությունից երբեք չենք խուսափել: Մենք համարում ենք, որ քաղաքական ուժը կարող է և’ ընդդիմություն լինել, և’ իշխանության մաս կազմել: Այսօրվա պառլամենտում կամ պառլամենտից դուրս քաղաքական ուժեր կան, նրանց վարքն էլ գիտեք, գործունեությունն էլ գիտեք, նրանց երբեմն ուղղված սլաքներն էլ տեսնում եք անզեն աչքով: Ի՞նչ է, նրանց հանդեպ վստահությունն ավելի մե՞ծ է, ավելի մե՞ծ հեղինակություն ունեն, աշխատելու ավելի մե՞ծ կարողություն ունեն»,- ասաց նա:

Հարցին, թե ընդդիմություն եղած ժամանա՞կ էին ավելի լավը, թե՞ հիմա, Աղվան Վարդանյանը պատասխանեց. «Մենք միշտ լավն ենք»:

Ինչ վերաբերում է առաջիկա ՏԻՄ ընտրություններին ՀՅԴ-ի մասնակցությանը, նա նշեց, որ սեպտեմբեր-հոկտեմբերին ՏԻՄ ընտրություններին մասնակցելու համար ՀՅԴ-ն կազմակերպական մեծ աշխատանքներ է տանում մարզային կառույցների հետ, փորձ է արվում ուսումնասիրել, թե որ տարածքներում կան ռեալ թեկնածուներ` ոչ միայն ՀՅԴ-ից:

«Ինձ համար կարևոր է, որ, օրինակ, համայնքապետը լինի սրտացավ, իրազեկ, իր գործառույթներն իրականացնող, համայնքի մասին մտածող մարդ, քան թե անպայման կուսակցական»,- ասաց Աղվան Վարդանյանը՝ հավելելով որ երկու խոշոր համայնքներում՝ Վանաձորում ու Գյումրիում, ՀՅԴ-ն կմասնակցի համամասնական ընտրություններին, և հսկայական աշխատանքներ պետք է իրականացվեն:

Պատգամավորի խոսքով՝ արտահերթ նստաշրջանը կավարտվի, ու ամառը կօգտագործվի հենց տեղական ինքնակառավարման մարմինների ընտրություններին մասնակցելու նպատակով:

Աղվան Վարդանյանը, պատասխանելով այն հարցին, թե չի՞ կարծում, որ 2015-ի բյուջեի կատարողականին ձեռնպահ քվեարկելը դուր չի գա գործադիր իշխանությանը, որի կազմում դաշնակցական նախարարներ կան, պատասխանեց. «Ոչ, չեմ կարծում: Դաշնակցության մեջ նման բան չկա, որ գործադիրն ու ֆրակցիան իրարից նեղանան: Իսկ տրամաբանական կհամարեի՞ք, որ մենք կողմ քվեարկեինք: 2015թ. բյուջեին մենք դեմ ենք քվեարկել՝ մեր հիմնավորումներով, և 2015-ի բյուջեի կատարողականի հետ կապված` չունենք որևէ պարտականություն, պատասխանատվություն, այդ թվում՝ մեր նախարարները: Ընդհակառակը, ես կարծում եմ, որ սա շատ բնական, շատ քաղաքական դիրքորոշում է, եթե հակառակը լիներ, դուք իրավունք կունենայիք մեզ մեղադրելու»:

Հարցին, թե ինչպե՞ս ստացվեց, որ պատգամավոր եղած ժամանակ մենաշնորհների դեմ պայքարող Արծվիկ Մինասյանը նախարար դառնալուց հետո հայտարարում է, որ հեշտ չէ պայքարել մենաշնորհների դեմ, Աղվան Վարդանյանը պատասխանեց, որ մենաշնորհների դեմ պայքարի գործընթացի հիմքը դրվել է երեք փաստաթղթով: Առաջինը նոր Սահմանադրությունն է՝ իր համապատասխան բաժիններով, որը վերաբերում է նաև տնտեսական քաղաքականությանը, մենաշնորհներին ու գերիշխող դիրքին:

«Երկրորդ փաստաթուղթը ՀՀ նախագահի` փետրվարի 12-ի ելույթն էր, որում ևս կան այն բոլոր առանցքային հարցերը, որոնք կանգնած են երկրի առջև, մատնանշված են ուղղությունները, և այդ ելույթն այն հիմքերից մեկն է, որը հնարավոր դարձրեց մեր համագործակցությունը: Եվ երրորդը բուն քաղաքական համագործակցության փաստաթուղթն է, որում ևս բոլոր հարցերը ներկայացված են: Ուղղությունը ձևակերպված է, այն ճիշտ է ձևակերպված, քայլերը առայժմ նախասկսված են»,- ասաց դաշնակցական պատգամավորը:

Ինչ վերաբերում է Արծվիկ Մինասյանին և նրա ասածներին, ըստ Վարդանյանի` Արծվիկ ՄԻնասյանը 10-ից ավելի տարիներ բոլորի համար, նաև` լրագրողների, եղել է ամենահրապարակային քաղաքական գործիչներից մեկը և մենաշնորհների դեր պայքարող ամենահետևողական, պրոֆեսիոնալ քաղաքական գործիչը: «Եվ հանկարծ մի արտահայտությունից մեր հանրության մի հատվածը, այդ թվում`որոշ լրատվամիջոցներ փորձեցին Արծվիկ Մինասյանին դարձնել իր տեսակի հակառակը: Հանրությունը շատ լավ ճանաչում է Արծվիկ Մինասյանին, բոլորը նրան գնահատում են և նրա հանդեպ շատ դրական վերաբերմունք ունեն, քանի որ նա ազնիվ, արդարամիտ, աշխատող, պրոֆեսիոնալ մարդ է, բայց մեր հանրության մոտ կա մի վատ բան, որ կարող են այսօրվա ամենահարգված, գնահատված գործչին հանկարծ մի բառի պատճառով՝ ճիշտ կամ սխալ հասկացված, փորձել շուռ տալ ու 180 աստիճանով այլ գնահատականներ տալ: Սա ամենավատ բանն է, որ կա մեր իրականության մեջ: Արծվիկ Մինասյանը որևէ սխալ բան չի ասել, ասել է այն, ինչ գրված է մեր նոր Սահմանադրության մեջ»,- ասաց Աղվան Վարդանյանը:

Շարունակելով խոսքը` նա նշեց, որ նոր Սահմանադրությունն ասում է, որ մենաշնորհները պետք է կարգավորվեն օրենքով: Այսօր կան մենաշնորհներ կամ գերիշխող դիրք ունեցողներ, բայց դրանք որևէ կանոնակարգման, որևէ օրենսդրական կարգավորման չեն ենթարկվում, որևէ պատասխանատվություն չեն ենթադրում: «Գուցե օրինակը, շաքարավազի ոլորտի հետ կապված, սխալ է բերել Արծվիկ Մինասյանը, բայց ամենապրոֆեսիոնալ գնահատականն է տվել և այսօր այդ ուղղությամբ գիշեր-ցերեկ աշխատում է: Եթե դու ուզում ես որևէ հարց լուծել և հարցը սխալ ես ձևակերպում, երբեք չես կարող լուծել այդ հարցը: Ես ասացի, որ այսօր մեր առջև դրված խնդիրները ճիշտ ձևակերպված են, և այդ ուղղությամբ քայլեր են արվում: Գրեթե ամեն օր կառավարությունում հակակոռուպցիոն քննարկումներ են ընթանում, և եթե որևէ մեկը կարծում է, որ դա օրենքով չպետք է լինի, այլ՝ կամայականությամբ, ապա կամայականության արդյունքը զրո է: Ինչպիսի՞ն կլինի արդյունքը, կախված է մեր աշխատանքից: Ես խորապես համոզված եմ, որ այն հիմքը, որը դրել են Դաշնակցությունը, Հանրապետական կուսակցությունը, ձևակերպելով խնդիրները, ուղղակի չեն կարող արդյունք չունենալ: Միանգամից արդյունքներ մենք երբեք չենք խոստացել, միշտ եղել ենք պրագմատիկ, բայց պետք է հասկանալ, որ յուրաքանչյուր պրոցես ունի մի սահմանային իրավիճակը, երբ այլևս անհնար է այդ ցավոտ հարցերին չանդրադառնալ, լուծումներ չփնտրել: Որքանո՞վ մեր քաղաքական, տնտեսական էլիտան պատրաստ կլինի մինչև վերջ այս հարցերը հանգուցալուծել, ես էլ որոշ թերահավատություն ունեմ, բայց որ խնդիրը ճիշտ է ձևակերպված, և դա աշխատանքով պետք է իրականացնել, ևս հստակ է»,- ասաց Աղվան Վարդանյանը՝ հորդորելով քաղաքական գործիչներին գնահատել ժամանակի մեջ, իրենց ամբողջության մեջ, ոչ թե մեկ վայրկյանում տեսակետը փոխել 180 աստիճանով:

yerkir.am