Սերժ Սարգսյանի նախագահությամբ ՀՀԿ-ն ու ՀՅԴ-ն կքննարկեն հուշագրով ամրագրված դրույթները
Առաջիկայում Հայաստանի Հանրապետական և Հայ Յեղափոխական Դաշնակցություն կուսակցությունները քաղաքական համագործակցության շրջանակներում հանդիպում կունենան:
Tert.am-ի հետ զրույցում ՀՅԴ անդամ Արսեն Համբարձումյանը նշեց, որ ստեղծված «4+4+1» ձևաչափի խորհուրդը (ՀՅԴ-ՀՀԿ-Սերժ Սարգսյան) քննարկելու է համագործակցության հուշագրով ամրագրված նպատակների իրականացման հաջորդականության, ժամանակացույցի, իրականացման գործողությունների վերաբերյալ հարցերը:
– ՀՀԿ-ՀՅԴ քաղաքական համագործակցության արդյունքում ստեղծված խորհուրդը, որը մեկ անգամ է նիստ գումարել, ի՞նչ աշխատանք է հիմա ծավալում, ե՞րբ է գումարվելու երկրորդ նիստը:
– Առաջին նիստի ժամանակ պայմանավորվածություն ձեռք բերվեց, որ առաջիկայում երկրորդ նիստը գումարենք: Կա համաձայնություն նիստերի անցկացման պարբերականության, օրակարգի հարցերը նախապես պլանավորելու, ձևավորելու շուրջ: Մոտ ապագայում հաջորդ նիստը կկայանա…
– Մոտավորապես ե՞րբ:
– Կոնկրետ ժամկետ ասել չեմ կարող: Բայց կարծում եմ, որ ընթացիկ ամսվա մեջ հաջորդ նիստը կկայանա:
– Առաջին նիստը քառօրյա պատերազմի հետևանքով հետաձգվեց: ՀՅԴ-ՀՀԿ քաղաքական համագործակցությունից հետո, շատերի կարծիքով, ոչինչ չի փոխվել: Ինչպե՞ս եք վերաբերում այս քննադատություններին: Եթե անգամ երկրորդ հանդիպումն էլ լինի, ի՞նչ է փոխվելու, ինչի՞ համար է այն: Արդյոք ձևական չէ՞:
– Համաձայն չեմ, որ խորհուրդը ձևական բնույթ ունի: Կոալիցիոն համաձայնագրով նախատեսված շրջանակներում խորհուրդը գործառույթներ է իրականացնում: Իսկ պարբերականության վրա շեշտադրում կատարելը ճիշտ չէ: Խորհրդի քննարկման շրջանակն ամրագրված է համաձայնագրով, ուստի հստակ պարբերականության շեշտադրումը ճիշտ չէ: Այո, տեղի ունեցան ապրիլյան իրադարձությունները, դրա համար զուտ ներքաղաքական խնդիրներին այս ձևաչափով անդրադառնալը ճիշտ չէր լինի, դրա համար նախատեսված նիստը հետաձգվեց:
– Այսինքն՝ կարող եք ուշ-ուշ հանդիպել, բայց կարևոր որոշումներ կայացնե՞լ:
– Բնականաբար:
– Ո՞րն է լինելու առաջիկա հանդիպման օրակարգը:
– Քննարկելու են բոլոր դրույթները, որոնք ամրագրված են կոալիցիոն համաձայնագրով, ներկայացնելու ենք այդ դրույթների պլան-ժամանակացույցի իրականացման քայլերի հաջորդականությունը: Նախագծին ծանոթ եք, քննարկելու ենք՝ ինչ քայլերով, ինչ ժամանակացույցով, ինչ գործողություններով պիտի դրանք իրականացվեն:
– Ինչո՞ւ խորհրդի նախագահող ընտրվեց Նախագահ Սերժ Սարգսյանը:
– Այո, կա նման պայմանավորվածություն, որ նիստերը վարելու է նախագահը: Նա լինելու է արբիտրի դերում: Պայմանական ասած՝ որոշել ենք, որ գործի «4+4+1» ձևաչափովը:
tert.am
