Այսօր խորհրդարանական ճեպազրույցներում ԱԺ ՀՅԴ խմբակցության ղեկավար Արմեն Ռուստամյանը, պատասխանելով հարցին, թե ի՞նչը ստիպեց իշխանություններին գնալ կտրուկ փոփոխությունների, ասաց, որ այսօր բոլորին ակնհայտ է, թե ինչը պետք է փոխվի, և որքան էլ նախորդ կառավարությունները փորձել են ինչ-որ բան անել, սակայն չեն կարողացել այն տեմպով լուծել խնդիրները, ինչ արագությամբ դրանք կուտակվում էին:
«Խնդիրները մեծ արագությամբ են կուտակվում, ուստի համակարգային փոփոխություններ են պետք, ներիշխանական խաղի կանոնների փոփոխություն է պետք, և դուք տեսնում եք, թե ինչ աշխույժ փոփոխություններ են տեղի ունենում»,- ասաց Արմեն Ռուստամյանը:
Նրա խոսքով՝ նոր վարչապետը բավական լուրջ, ոչ մի տաբուներով չկաշկանդված լրջագույն գործընթաց է սկսել, և այդ փոփոխությունները պետք է լինեն հստակ տրամաբանված ու նպատակային՝ բոլոր խնդիրներն արձանագրելով, թե որ ոլորտում ինչ խնդիր կա, ինչպես են լուծելու դրանք և ինչ ժամկետներում:
Հարցին, թե արդյո՞ք առաջիկա խորհրդարանական ընտրությունները ստիպեցին գնալ կտրուկ փոփոխությունների, Արմեն Ռուստամյանը պատասխանեց, որ փոփոխությունների գնալ ստիպեց այն փաստը, որ այսպես շարունակել այլևս հնարավոր չէ: Երկրում կուտակվել էին լրջագույն մարտահրավերներ, որոնք դանդաղ էին լուծում ստանում կամ լուծում չէին ստանում: Ահա, թե ինչու Հովիկ Աբրահամյանը հայտարարեց, որ հեռանում է, որ դուռ բացվի փոփոխությունների համար: Պատգամավորի խոսքով` եկել է վարչապետ, ով հստակ սահմանել է, թե ելակետն ինչպիսին պետք է լինի՝ հայտարարելով, որ տնտեսությունը շատ ծանր վիճակում է:
Արմեն Ռուստամյանը, պատասխանելով հարցին, թե ճիշտ են տեղեկություններն այն մասին, որ ՀՅԴ-ն դժգոհ է Շիրակի ՀՅԴ-ական մարզպետ Հովսեփ Սիմոնյանից, որովհետև ՏԻՄ ընտրություններում ՀՅԴ-ն ցածր արդյունքներ ունեցավ, ասաց, որ նախևառաջ մարզպետի գործառույթը ձայներ ապահովելը չէ:
«Մենք մարզպետ չենք նշանակել, որ նրանով ձայն ապահովենք,, կամ նա պետք է գնար ձայներ հավաքեր: Մարզպետի խնդիրը այն է, որ նա կարողանա տվյալ մարզում առաջացած խնդիրներին ժամանակին լուծում տա՝ հայեցակարգված ձևով, և դրանով նվաճեր բնակչության հարգանքը: Արդյունքում կշահեր այն կուսակցությունը, որը ներկայացնում է ինքը:
Մարզպետի ուղղակի դերակատարում ընտրություններում մենք չենք դիտարկել, չենք էլ գնա դրան, որովհետև մենք ուզում ենք հենց դրանից ազատենք երկիրը, որ ընտրություններում չկիրառվեն տարբեր վարչական լծակներ: Որ կիրառող լիներ, երևի այլ արդյունքներ կլինեին, ինչպես դա տխուր ավանդույթի միջոցով տեսնում ենք այլ տեղերում»,- ասաց Արմեն Ռուստամյանը: Միաժամանակ նա նշեց, որ ՀՅԴ-ն հայտարարել է ՏԻՄ ընտրություններից իրենց դժգոհության մասին: Ռուստամյանի կարծիքով այս ՏԻՄ ընտրությունները մրցակցային էին, կայացած, կա դրական տենդենց:
«Հիմա մենք քննություն ենք նշանակել ՏԻՄ ընտրություններում մեր արդյունքները վերլուծելու համար, և այդ պատկերի հետ կապված մենք կկայացնենք մեր որոշումը, որը կվերաբերվի ամեն մեկի ունեցած դերին, հաշվետվություն պետք է ներկայացնեն բոլոր օղակները»,- ասաց Ռուստամյանը:
Առհասարակ, նրա կարծիքով, քաղաքական պայքարում պարտությունը նորմալ երևույթ է, այն կարող է ունենալ դրական արդյունք լուրջ քաղաքական ուժի համար, որովհետև պարտությունը չի թողնում, որ քաղաքական ուժը մեծամտանա, հոխորտացող հայտարարություններ կատարի, և ստիպում է, որ սխալներդ դիտես բաց աչքով:
ՀՅԴ-ի համար այս ՏԻՄ ընտրությունները կարևոր էին, այն ստուգատես էր առաջին հերթին, մինչև հաջորդ ԱԺ ընտրություններ: Սակայն ՀՅԴ-ն չի ընդունում մյուս ծայրահեղությունը, թե այս ՏԻՄ ընտրությունները արտացոլելու են հաջորդ ԱԺ ընտրությունների արդյունքների պատկերը: ՀՅԴ-ն գտնում է, որ ՏԻՄ ընտրություններում իրենց ներկայացվածությունը աճել է, ուստի այդ համեմատությամբ ՀՅԴ արդյունքները ձախողում համարել չի կարելի:
«Ազնիվ, անկեղծ կվերլուծենք արդյունքները, և կկայացնենք մեր որոշումները: Ինչ վերաբերում է հրաժարականներին, , դա ինքնագլուխ չի արվում, դա ԳՄ որոշումներով է լինելու»,- ասաց Ռուստամյանը:
Արմեն Ռուստամյանն անդրադարձավ ՏԻՄ ընտրություններին, մասնավորապես` Վանաձորում ու Գյումրիում ստեղծված քաղաքական իրավիճակին:
Հարցին, թե պատկերացնո՞ւմ է ՀՀԿ-ին Վանաձորում ընդդիմադիրի կարգավիճակում, նա պատասխանեց, որ եթե բոլորը միանան, ապա ՀՀԿ-ն ընդդիմադիրի կարգավիճակ ձեռք կբերի:
«Բոլոր խաղաքարտերն այսօր ընդդիմադիր դաշտի ձեռքում են: Այդ առումով էլ դրական եմ համարում, որ առաջին անգամ երրորդ քաղաքում արձանագրվել է մի արդյունք, երբ ոչ իշխանական ուժերն ունեն հնարավորություն կոնկրետ քաղաքում իշխանափոխություն կատարելու: Եվ ի՞նչը պետք է խանգարի նրանց դա անել: Գիտեմ, որ ինչ-որ համաձայնություններ արդեն կան, բայց ես, դառը փորձ ունենալով, չէի շտապի դա վերածել 17 ձայնի: Քվեարկությունը փակ, գաղտնի է լինելու: Կբացվեն տուփերը, կտեսնենք արդյունքները: Ես իսկապես ուզում եմ, որ այդտեղ լինի 18 ձայն, ինչը կնշանակի, որ իշխանությունն անցնում է ընդդիմությանը: Հրաշալի է, բա մենք դա էինք ուզում, որ հակակշռման և զսպման մեխանիզմներ լինեն ոչ միայն ԱԺ-ում, այլև ներքևից վերև: Շատ լավ իրավիճակ է, ես սա համարում եմ լավ նախադեպ, բայց լավ կլինի, որ այդ նախադեպն ինչ-որ ինտրիգներով չձախողվի: Անկեղծորեն եմ դա ասում»,- ասաց Ռուստամյանը:
Նա հավելեց, որ Դաշնակցության վարքագիծը չի փոխվել` անկախ այն բանից` իշխանություն է, թե` ընդդիմություն: ՀՅԴ-ն ունի իր հստակ ծրագրերը, որոնցով էլ առաջ է գնում՝ արձանագրելով հաջողություններ:
«Ովքեր մի ժամանակ դեմ էին սահմանադրական փոփոխություններին, հենց նրանք կարող են վայելել սահմանադրական փոփոխությունների արդյունքները, սակայն չեն ամաչելու, որ Դաշնակցությանը քարկոծել են: Նույնը՝ Վանաձորում ու Գյումրիում ստեղծված իրավիճակն է, որովհետև եթե չլինեին սահմանադրական փոփոխությունները, այդ փոփոխությունների հնարավորությունը չէր լինի, երբ ընդդիմությունը միավորվում է և կոնկրետ քաղաքում իշխանությունն իր ձեռքն է վերցնում: Եվ նույնը կարող է լինել խորհրդարանում»,- ասաց Ռուստամյանը:
