Հարցեր Դաշնակցությանը

Պատասխանում է ՀՅԴ Երեւանի Ավագանու ընտրությունների ցանկը գլխավորող Միքայել Մանուկյանը

-Պարոն Մանուկյան սոցցանցի օգտատիրոջից այսպիսի հարց է ստացվել. ինչո՞ւ երբ Սերժ Սարգսյանն էր իշխանություն դուք իշխանություն էիք, իսկ հիմա, երբ Փաշինյանն է իշխանություն դուք էլի իշխանության հետ եք:

-Նախ օգտատիրոջն ուզում եմ հիշեցնել, որ մենք 2009-ից մինչև 2016 թվականը եղել ենք ընդդիմություն, դրանից հետո Սերժ Սարգսյանը մեզ խնդրեց, որպեսզի մաս կազմենք իշխանությանը։ Իսկ այս պարագայում, Նիկոլ Փաշինյանն է խնդրել մաս կազմել ազգային համերաշխության ծրագրին։

-Նախընտրական ծրագրում ներառե՞լ եք կանաչապատման և այգիների սմարթ-կարգավորման հարցերը։

-Մենք չունենք ոռոգման համակարգ։ Դրա համար փորձելու ենք նախ դա վերականգնել։ Այսինքն չունենալով ոռոգում՝ ծաղկապատում ենք կամ կանաչապատում։ Ծառը տնկում ենք մեկ տարվա համար, որը չորանում է։ Առաջին հերթին պետք է սկսել ժամանակակից ոռոգման համակարգից, երբ ունենանք ժամանակակից ոռոգման համակարգ, ապա կանաչապատումը կամ ծաղկապատումը կլինի ավելի հեշտ ու կդառնա լուծելի խնդիր։

Անի Ավագյանը հարցնում է

– Ընդհանրապես ապահովության մասին մտածո՞ւմ եք, ձեր նախնտրական ծրագրում կա՞ այդ մասին։ Ինձ համար ամենից կարևորը անձի ապահովության հարցն է։

-Բնականաբար ամենակարևոր հարցը մեր քաղաքացիների ապահովությունն է։ Մեր ծրագրում կա դրույթ մունիցիպալ ոստիկանության մասին։ Ոստիկանությունը պետք է իրականացնի համայնքային գույքի պահպանություն և մեր ժողովրդի անվտանգության ապահովում։

Սրբուհի Ազատյանը հարցնում է

– ի՞նչ հիմքեր ունեք, որ Երեւանը լինի կանաչ քաղաքների ցանկի մեջ:

-Կանաչապատումը Երևանի ամենակարևոր հարցերից մեկն է։ Մինչև այժմ Երևանում լուրջ կանաչապատում չի իրականացվել։ Ծաղկապատման աշխատանքներ են կատարվել, որոնք բավարար չեն, իհարկե էսթետիկ տեսքը լավ է, սակայն կանաչապատում ասելով ես հասկանում եմ լուրջ ծառատունկ, անտառապատում։ Կարծում եմ , որ Երևանը 4 կողմից պետք է ունենա անտառային պաշտպանիչ շերտ և քաղաքը ազատի փոշուց։

Գայանե

– Երևանում առաջնահերթ է դարձել ԺԵԿ-երի հարցը, ոչինչ չանող` վարձատրվող կառույց է, ի՞նչ կարծիք ունեք անձամբ Դուք, այս կառույցի հետագա անելիքների վերաբերյալ:

-Մինչև հիմա համատիրություններն իրենց գործառույթներով չեն զբաղվել։ Համատիրությունները եղել են ընտրություն կազմակերպող, ընտրական գործընթացին մաս կազմող մարմին։ Մեր թիմում տեսակետները տարբեր են՝ սկսած խոշորացումից, մինչև որ ամեն շենք ունենա իր լիազորը։ Իրականում համատիրության ղեկավարը պիտի ընտրվի քաղաքացու կողմից, իսկ գործառույթները պիտի լինեն շատ հստակ՝ գույքի պահպանություն։ Խոշորացման դեպքում լավ է այնքանով, որ ֆինանսական միջոցները կհերիքեն լուրջ ծրագրեր իրականացնելու համար։

Գայանե

-Վթարային շենքերն օր օրի ավելանում են, եղածների վիճակն էլ ավելի վատանում է։ Վերելակները այնքան հին են, Ադրբեջանը նախանձում է: Հասկանում ենք, քաղաքային բյուջեի հարց է, բայց մարդկանց կյանքն ու առողջությունը իսկապես վտանգված են:

-Հարութ Գալստյան

-Վերելակների մեծ մասն ունեն մոտ 30 տարվա պատմություն և իրենք իրենց սպառել են, վերանորոգմամբ այդ հարցը չի լուծվի։ Պետք է ամբողջությամբ փոխվեն՝ և՛ տեխնիկական մասը, և՛խցիկները։ Այդ ամենը պետք է բերվի ժամանակակից տեսքի և ապահովվի քաղաքացիների անվտանգությունը։ Գիտեմ, որ Երևանում կա վերելակների արտադրություն։Անհրաժեշտ է ուսումնասիրել հզորությունները, պետք է տվյալ ընկերության հետ աշխատել, օժանդակություն տրամադրել և արտադրանքը համապատասխանեցնել Երևանի պահանջներին։ Մեր ծրագրի ցանկացած ոլորտում համայնք մասնավոր գործակցությունը, կապը շատ կարևոր է։

Գայանե

-Կոլորիտային, հնամյա քաղաքի տեսքը օր օրի կորցնող Երևանին պետք է գոնե այս քաղաքի անցյալը փաստող, վկայող, կոլորիտ հաղորդող կառույցների պահպանման և վերանորգման հարցը դարձնել առաջնային, հնի նկատամաբ նախկին քաղաքապետների սրտացավությունը 0-էր, կարո՞ղ ենք հույս ունենալ, որ ՀԻՆԵՐԵՎԱՆԸ փոքր ինչ տեսքի կգա: Նախագծեր կմշակվե՞ն վերականգնելու համար կիսաքանդ հին տները, Արամ Մանուկյանի տան օրինակով:

-Սկսեմ վերջին հարցից. Արամ Մանուկյանի տան հետ կապված։ Ում պատկանում է տարածքը, մենք արդեն ունենք նրա հետ պայմանավորվածություններ։ Արամ Մանուկյանի տունը թանգարանի կվերածվի՝ առայժմ մի մասով։
Մյուս շինությունների հետ կապված․ գիտեք, որ խորհրդային շրջանից Երևանը շեղվել է թամանյանական նախագծից և ամեն քաղաքապետ այդ առումով իր հետքը թողել է Երևանի վրա։ Այսօր խոսել վերակառուցման մասին կամ գնալ թամանյանական նախագծ՝ երևի արդեն անհնար է։ Կարծում եմ, որ մենք հնի ու նորի ճիշտ համադրում պիտի անենք և այստեղ գործ ունեն անելու ճարտարապետները, որոնք պիտի մշակեն Երևանի նոր հայեցակարգը թե ինչպիսին ենք այն պատկերացնում։ Մենք իհարկե ունենք հին երևանյան շենքերի ցանկ, որոնց մոտ գնալ ընդհանրապես պետք է արգելել ։

Գայանե

-Աղբահանության ձևը փոխելու, ավելի բնապահպանական դարձնելու տարբերակներ հնարավո՞ր են արդյո՞ք, աղբահանության հարցի վերջնական կարգավորման համար ի՞նչ ծրագիր ունեք:

-Այսօր աղբահանությունը Երևանում իրականացնում է մեկ ընկերություն՝Sanitek Armenia-ն , որը մենաշնորհային դիրք ունի այդ բնագավառում։ Դա պետք է վերացնել։ Աղբահանությամբ պետք է զբաղվեն մի քանի մասնավոր ընկերություններ և քաղաքացին ինքը պիտի որոշի, թե իր վարչական շրջանի աղբահանությունը որ օպերատորին է վստահում։ Երևանցին նաև պիտի ունենա հնարավորություն, որ վատ աշխատանքի դեպքսւմ հրաժարվի այդ օպերատորի մատուցած ծառայությունից։ Ինչ վերաբերվում է աղբի վերամշակման գործարանին, ասեմ, որ այո, մեր ծրագրում կա, դա շատ կարևոր է։ Զարմանում եմ, ինչու մինչև հիմա չի իրականացվել, բազմաթիվ արտասահմանյան ընկերություններ են դիմել, ցանկություն են հայտնել կապ հաստատել վարչապետերի հետ։ Իսկ թե ինչու պատասխան չի եղել, այդ մասին տեղյակ չեմ ։

Գայանե

-Ինչպիսի՞ն է Ձեր երազած Երևանը:

-Երևանը պիտի լինի ուրախ , ունենա հոգի ու սիրտ։ Բոլոր երևանցիները սիրում են Երևանը։ Մեզ առաջին հերթին համերաշխություն ու համախմբում է պետք։ Երևանը պիտի կառուցենք բոլորս միասին , քաղաքապետը և քաղաքապետարանը պիտի լինեն շարժիչ ուժը մեր քաղաքը վերակառուցելու համար։

Արա Արմենակյան

-Եթե ընտրվեք, ձեր առաջին 10 հանձնարարականները որո՞նք կլինեն:

-Նախ համախմբել բոլոր թեկնածուներին և բոլորի նախընտրական ծրագրերը։ Բոլոր դաշինքների և թեկնածուների խորհուրդ ձևավորել, ուժերը մեկտեղել և կազմել երևանի զարգացման ծրագիր։

-Երևանի խնդիրները բազմազան են։ Մայրաքաղաքի բոլոր վարչական շրջաններում աղբահանության լուրջ խնդիր կա, սա հրատապ լուծում պահանջող հարց է։ Լուծումները պատկերացնում ենք։

Հաջորդը կանաչապատումն է, հետո՝ կոմունալ շինարարություն, առողջապահություն, բոլոր ուղղություններով անելիքներ կան և բոլորը հրատապ են։

Վաղինակ Քոբելյան

-Երևանում կան առաջնահերթ լուծում պահանջող մի շարք խնդիրներ և դրանցից ամենակարևորը տրանսպորտի խնդիրն է: Ինչպիսի՞լուծումներ եք առաջարկում, ո՞րն է տրանսպորտի ոլորտի կարգավորման Ձեր տեսլականը:

-Տրանսպորտի բարելավման ուղղությամբ ծրագիր մշակել ենք ։ Ուզում եմ նշել, որ քաղաքապետարանը վաղուց ծրագիր էր մշակել, առաջնահերթ պետք է ծանոթանալ քաղաքապետարանի ծրագրին, եթե փոփոխությունների կարիք կա՝ անել, հետո նոր իրագործել։ Ընդհանուր առմամբ մոտեցումը նույնն է՝ ներդնել միասնական տրանսպորտի համակարգ։ Ինչ է դա նշանակում․ քաղաքացին մեկ օրվա համար գնելով երթուղայինի տոմս, տրանսպորտ փոխելուց ավելորդ վճարում չի անում։ Սոցիալական խմբերի, պատերազմի մասնակիցների, ուսանողների համար նախատեսում ենք տարբեր արտոնություններ։

Արտաշես Ջոկալյան

-Երեւանում թափառող շների հարցը ինչպե՞ս եք մտադիր լուծել։

-Բնականաբար կարևոր հարց է։ Նախկինում եղել է ստերիլիզացման ծրագիր, որը շատ վատ է իրականացվել։ Գործը պետք է շարունակվի և ավելին՝ պետք է կենդանիների համար բուժհաստատություներ հիմնենք, որտեղ տվյալ կենդանիներին կարող ենք պահել և խնամել։

Արտաշես Ջոկալյան

-Քաղաքի կենտրոնում ազատ հանրային զուգարաններ մտադի՞ր եք ստեղծել, հատկապես զբոսաշրջիկներին նկատի ունենալով։

-Այստեղ կարևորը համայնք-մասնավոր գործակցությունն է։ Տարբեր սրճարաններ և բիզնեսով զբաղվող ընկերություններ կան Երևանում և, բնական է, բոլորն էլ ունեն զուգարաններ։ Այստեղ պետք է գործակցել մասնավորի հետ, որ միայն իր հաճախորդը չօգտվի, այլև անցորդը և զբոսաշրջիկը։

Արտաշես Ջոկալյան

– Քաղաքապետարանի մեջ փտածության (կոռուպցիայի) դեմ ինչպե՞ս պիտի պայքարեք։

-Կամք, վճռականություն առաջին հերթին, ապա արհեստավարժ մասնագետների հետ արդյունավետ աշխատանք։

Արտաշես Ջոկալյան

-Քաղաքակիրթ երկիրների նման հատուկ հեծանիվի համար նախատեսված ճանապարներ մտադի՞ր եք ստեղծել, եւ ինչու չէ, եթե վարձու հատուկ մատչելի կետեր ապահովեք, որ մարդիկ ավելի հեծանիվներ օգտագործեն, մանավանդ զբոսաշրջիկները։

-Իհարկե շատ լավ կլինի, բայց դա լուրջ ուսումնասիրության կարիք ունի։ Հնարավորթություններ կլինեն արդյո՞ք, կամ մեր ճանապարհներն այդպիսի շռայլություն թույլ կտա՞ն մեզ։

Վարո Մեհրաբյան

Կանաչապատում, վերելակ, տրանսպորտ ու ջրահեռացում կամ ձյունը մաքրելու խնդիր: Այդ հարցերի մասին հարց չեմ տա: Իմ հարցն այլ բանի է վերաբերվում: Հարցս ծավալուն է:

-Իմ պատկերացմամբ այս անգամ ՀՅԴ-ն կունենա ֆրակցիա ավագանիում, պատրա՞ստ եք արդյոք ապացուցելու, որ այսքան ժամանակ չընտրվելուց կորցրել է, ոչ միայն ՀՅԴ-ն այլև Երևանը, կկարողանա՞ք կարճ ժանանակում ընդգծված ներկայացնել Ձեր մոտեցումները, փոխել Երևանի ավագանիում ձևավորված կարծրացած շեֆ-ենթականեր ատավոր մշակույթը:

-Կկարողանա՞ք Երևանը դարձնել այնպիսի կենտրոն, որը նաև կբալանսավի ներքաղաքական համակարգը: Ինչպե՞ս եք վերաբերվում երբ ՀՀ-ում շատերը հիմա պատրաստ չեն ընկալել թիմային կազմի կարևորությունը և շեշտը դնում են անհատի վրա, մինչդեռ թիմն ավելի կարևոր է:

-Համաձայն եմ օգտատիրոջ հետ, քիչ առաջ էլ ես ասացի, քաղաքապետը և քաղաքապետարանը մեր քաղաքի շարժիչ ուժն են, որի շուրջ պիտի համախմբվեն թե՛ բոլոր ավագանիները թե՛ մեր Երևանի քաղաքացիները։ Այո, ես կարևորում եմ թիմային աշխատանքը, միշտ աշխատել եմ թիմով, և իմ աշխատանքի մեջ ամենակարևոր մասը, որ գնահատում եմ՝ թիմային աշխատանքն է։

Շեֆ–ենթակա իհարկե արատավոր մշակույթ է, որից պետք է կարողանանք ձերբազատվել, ինչը կարծում եմ թիմային աշխատանքի շնորհիվ կլինի։ Ես երբեք շեֆ չեմ եղել եւ չեմ էլ լինելու։

-Մեծամասնություն լինելով հանդերձ կհարգե՞ք մեր թավշյա հեղափոխության արժեքները, թե կհամագործակցեք նախկին իշխանավորների հետ, քանի-որ ՀՅԴ-ն մի քանի անգամ ասել է, որ դա չի բացառվում։ Ո՞րն է ձեր գաղափարական ուղենիշը։

Տեղի ունեցածը հեղափոխություն ես չեմ կարող անվանել, դա ժողովրդային շարժում էր, որը գլխավորեց Նիկոլ Փաշինյանը։ Սա ժողովրդի հաղթանակն է։ Եւ ես ժողովրդին և Երևանցուն չեմ բաժանի ըստ քաղաքական ուժերի, գույների, Երևանի քաղաքացին Երևանի քաղաքացին է և մերժողովուրդն է։


Ջուլիետ Դավթյան

-ինչպե՞ս եք պատկերացնում Երևանի մետրոյի գիծը հնարավո՞ր է երկարացնել եւ այն ավելի արդյունավետ դարձնել:

-Բնականաբար ծրագրում ունենք դրույթ, դա շատ ավելի երկարատև գործընթաց է և իրոք պետք է լավ ուսումնասիրել։

Բայց մետրոյի կայարաններ և ուղիներ չենք պատկերացնում միայն ստորգետնյա։ Մենք պատկերացնում ենք նաև վերգետնյա, որը շատ ավելի մատչելի շինարարություն է։ Կարևորում ենք մետրոն օդանավակայանից կապել մյուս կայարաններին։ Եւ մի կայարանի մասով կան կատարված աշխատանքներ, պետք է դա վերականգնել ու շարունակել մնացածը։

-Տեսախցիկները հանելուց հետո Երևանում շատացել են վթարները: խիստ անհրաժեշտ է հսկել և ավելացնել ոստիկանության թիվը քաղաքում: Ի՞նչ ծրագիրներ ունեք այդ ուղղությամբ:

-Դա ճանապարհային ոստիկանության խնդիրն է և չի կարող լինել Երևանի ենթակայության տակ, բայց ես խոսեցի մունիցիպալ ոստիկանության մասին, որն իրոք պետ է պահպանի քաղաքացիների գույքն ու անվտանգությունը։

-Խրախուսո՞ւմ եք փողոցային արվեստը` քաջալերելով այն և ստեղծելով դիւրութիւններ:

-Խրախուսել չի կարելի ասել, բայց դա քաղաքային մշակույթի մաս է, դա միշտ լինլու է, պարզապես պետք է կանոնակարգել այնպես, որ անհանգստություն չպատճառի հարակից բնակչությանը։ Բայց որ դա լինելու է և քաղաքային մշակույթից անբաժան է, անկասկած։

Լոնի Մանուկյան

-Արդյո՞ք ունեք որեւէ ծրագիր, որը պահպանելու է Երեւանի հին շենքերի տեսքը:

-Լոնի ջան, ասացի, մենք ցանկ ունենք, և այո իհարկե պետք է պահպանենք մեր հին շենքերը և համադրենք նորերի հետ։

Շարքային քաղաքացի

-Դաշնակցությունը սփյուռքում ավելի մեծ ուժ ունի, եթե չեմ սխալվում: Որպես շարքային քաղաքացի հետաքրիքր է՝ ինչպե՞ս եք սփյուռքը ներգրավելու Երևանի զարգացման գործում: Մենակ խնդրում եմ հստակ պատասխանեք, որ հավատանք:

-Շարքային քաղաքացին իրավացի է իհարկե, մենք բազմաթիվ երկրների խոշոր քաղաքներում ունենք կառույցներ, որոնք սերտ հարաբերություններ ունեն իրենց տեղական իշխանությունների հետ։ Մենք շատ տեղերում ունենք նաև դաշնակցական քաղաքապետեր, որոնց ներուժը մինչև այսօր էլ փորձել ենք ուղղորդել Հայաստան։ Բազմաթիվ ծրագրեր ենք իրականացրել սահմանամերձ գյուղերում, Արցախում: Երևանում դաշնակցական քաղաքապետ ունենալու դեպքում այո, իհարկե, այդ ներուժը կուղղորդենք նաեւ Երևան։ Այսինքն քույր քաղաքների մշակույթը մենք պետք է ձևավորենք։ Հետո, եթե տեղում մշտական գործող մարմին կա, շատ հեշտ է հարաբերվելը տվյալ երկրների կառավարման մարմինների հետ, կլինի դա մշտական մեր դրսի կառույցների ուշադրության կենտրոնում։

Արգինե Գևորգյան

-Ինչպե՞ս եք պատրաստվում լուծել հաշմանդամություն ունեցող մարդկանց տեղաշարժվելու հետկապված խնդիրները։

-Հաշմանդամության հետ կապված մարդկանց տեղաշարժի խնդիրների համար արդեն ինչ- որ բան արվում է և մենք պետք է շարունակենք ծրագիրը։ Այդ մասով երթուղայինների հետ կապված խնդիրները պետք է լուծենք։ Մենք բոլոր սոցիալական շերտերի մասին պետք է մտածենք, Երևանի քաղաքացիների հոգսը քաղաքապետի ու քաղաքապետարանի հոգսն է։

Անուշ Արսենի Համբարձումյան

-Ինձ հետաքրքրում է, ինչպե՞ս եք պատրաստվում լուծել գիշերային լուսավորության հարցը՝բոլոր վարչական շրջաններում։
Շնորհակալություն ընձեռնված հնարավորության համար։

-Իհարկե խնդիրը կա, գիշերային լուսավորության ցանցը պետք է շատացնենք և փոխարինենք էներգախնայող լամպերով։

Աննա Խաչատրյան

-Ինչու՞ Դաշնակցությունը նախորդ ավագանու ընտրություններին չմասնակցեց:

-Աննա խաչատրյանը եթե հարց է տալիս, ապա լավ հիշում է տվյալ ժամանակահատվածի մթնոլորտը։ Այդ մթնոլորտում մենք նպատակահարմար չգտանք մասնակցել ավագանու ընտրություններին, քանի-որ ընտրության տրամաբանությունն այլ էր, քան այսօր։ Այսօր գոնե խոստում կա, որ ընտրակաշառք չի լինելու, պետական համակարգը չի աշխատելու իշխանական ուժի համար։

Լույս Մադլեն Բոսնոյան

-Արդյո՞ք շարունակվելու է Աջափնյակ մետրոյի կայարանի կառուցումը ու այլ վարչականշ րջաններում ևս կայարաններ լինելո՞ւեն: Շնորհակալություն:

-Քիչ առաջ նշեցի, որ մեկ կայարանի մասով ինչ -որ բան արված է և շարունակելու ենք, խոսքս հենց Աջափնյակի կիսատ թողած կայարանի մասին էր։

-Պարոն Մանուկյան վերջում ինչ որ բան ունեք ավելացնելու:

-Մեր կարգախոսն է միասին հանուն Երևանի, եւ ես կուզենայի Երևանը տեսնել միասնական, կցանկանայի տեսնել ուրախ երևանցիների, կցանկանայի որպեսզի երևանցիները ընտրությանը ակտիվ մասնակցեն և քվեարկեն խղճի մտոք։

Տպել Տպել