Վարչապետի` ՀՅԴ նախարարներին ազատելու հրամանը ստորագրվել է այն բանից հետո, երբ Դաշնակցությունն արդեն հետ էր կանչել իր նախարարներին: Այս մասին խորհրդարանում լրագրողների հետ զրույցում ասաց ԱԺ ՀՅԴ խմբակցության ղեկավար Արմեն Ռուստամյանը: «Այս հարցի հետ կապված պետք չէ շոուներ անել: Մենք հետ ենք կանչել կառավարության մեր անդամներին, դրանից հետո են եղել համապատասխան հրահանգները»,- ասաց նա:

Անդրադառնալով «ԱԺ կանոնակարգ» օրենքում աղմկահարույց փոփոխությանըէ Ռուստամյանը նշեց, որ փոփոխությունը չի արվել արտահերթը կանխելու համար: Ըստ պատգամավորի` դա թյուրըմբռնում է: «Փաստվեց, որ ճիշտ ենք արել, որ երեկ ընդունել ենք այդ օրենքը: Եթե մեր 7 պատգամավորից 4-ի աշխատանքին խոչընդոտել են, խոչընդոտել են հայհոյանքներով, անպատիվ խոսքերով, սրան նորմալ չեմ վերաբերվում: Խոսում ենք սիրո և համերաշխության հեղափոխությունից, բայց սիրուց ու համերաշխությունից բան չի մնացել»,- ասաց նա:

Այդ օրենքը, ըստ Ռուստամյանի, այն բանի համար է, որ ԱԺ-ն լուծարվի այնպես, ինչպես Սահմանադրությունն է պահանջում: «Եթե այսպես չգնանք, կլինի ուժի իրավունքով լուծարում, սրանից մենք զերծ պահեցինք»,- ասաց նա:

Պատգամավորը նշեց, որ կտրականապես մերժում է այն թեզը, որ վարչապետը նետել է հրապարակ, թե դա պատերազմ հայտարարել էր ժողովրդին: «Եթե սահմանադրական ճանապարհով խորհրդարանը լուծարելու գործընթացը ժողովրդին պատերազմ հայտարարել է, ուրեմն մենք չենք հասկանում` ինչի մասին ենք խոսում: Եթե որևէ մեկի մտքով անցնում է որևէ բան ասել վարչապետի ասածից դուրս, դառնում է հակահեղափոխական, սև ուժ: Մենք այսպես ո՞ւր ենք գնում ընտրությունների, այս ձևով ԱԺ-ն ո՞ւմ է պետք»,- ընդգծեց նա ու շարունակեց, որ այս դեպքում մեկ տարի հետո կարող է դրվել Ազգային ժողովի լեգիտիմության հարցը, ոնց որ հիմա է արվում:

«Այսօր մեզ ասում են, թե Ազգային ժողովը չի ներկայացնում ժողովուրդին: Մենք ասում ենք, որ ներկայացնում ենք մեզ ձայն տված 103 հազար քաղաքացիներին: ՀՅԴ-ն ոչ մի ձայն փողով չի գնել, թող բերեն մի դեպք, որ Դաշնակցությունը փողով թեկուզ մեկ ձայն է վերցրել, այդպիսի դեպք չկա: Ուրեմն ես լեգիտիմ իրավունք ունեմ խոսելու 103 հազարի անունից»,- հայտարարեց պատգամավորը:

Ռուստամյանն ընդգծեց, որ կեղծ թեզ է, որ ասում են` դուք ոչ մեկի չեք ներկայացնում: Միևնույն ժամանակ շեշտեց, որ ժողովրդի տրամադրությունները նույնը չեն մնում: «Եթե այդպես է` թող կարգ մտցնեն, և վեց ամիսը մեկ փաստենք` ով որքան ձայն ունի: Տեսնենք` մեկ տարի հետո իրենք այդ 80% ձայնները կարո՞ղ են փաստել: Երբ, քաղաքական շահից ելնելով, խնդիր է լուծվել երկրում, տեսել ենք, թե դա ոնց է փլվել. 90-ականներին տեսել ենք 90 տոկոսանոց իշխանություն և տեսել ենք, թե ոնց են քանդվել»,- եզրափակեց նա:

Վարչապետի և խորհրդարանական ուժերի ներկայացուցիչների երեկվա հանդիպումը առիթ էր, որ քննարկում կատարվի, դիրքորոշումները ներկայացվեն. ասաց ԱԺ ՀՅԴ խմբակցության ղեկավար Արմեն Ռուստամյանը:

«Օգտակար հանդիպում էր, անկեղծ ու բաց խոսակցություն եղավ: Իհարկե, հիմնական լեյտմոտիվն այն էր, որ որևէ մեկն այսօր արտահերթ ընտրություններին դեմ չէ, տարաձայնությունը ժամկետների հետ է կապված: Այդ առումով պայմանավորվածություն այսօր գոյություն չունի: Վարչապետը պնդում է, որ պետք է լինի դեկտեմբերի մեջ, մեր համոզմամբ՝ պետք է կատարենք քայլեր, որոնք, ըստ էության, վարչապետն էլ է ընդունում, մասնավորապես՝ գնալ ընտրությունների նոր Ընտրական օրենսգրքով, Հայաստանի` այս սուպերվարչապետական համակարգը փոխարինել ավելի վարչապետականով, ինչն, առնվազն, ենթադրում է ոստիկանության վերաենթակայություն կառավարությանը։ Այս փոփոխության հետ էլ է վարչապետը համաձայն։ Մնում է հարցը, թե ինչքա՞ն ժամանակ հատկացվի, որպեսզի հասարակությունն ու քաղաքական ուժերը պատշաճ կերպով նոր իրավիճակին ադապտացվեն, ու մասնակցությունը լինի բոլորի համար հասկանալի պայմաններում»,- շեշտեց պատգամավորը:

Նրա խոսքով` դեկտեմբեր ամիսը որպես ինքնանպատակ դնելը ճիշտ մոտեցում չէ։ Նա նաև ընդգծեց, որ եթե բանակցություններ են ընթանում, ճիշտ չէ խոսել վերջնագրերով, և որ բանակցությունները ենթադրում են կոմպրոմիսներ: Ռուստամյանը կրկին ընդգծեց, որ ընտրությունների սահուն անցկացման համար իրենք առաջ են քաշում մի փաթեթ, որը նախատեսում է առաջնային երեք կետերի իրականացում՝ ընտրություններին գնալ նոր Ընտրական օրենսգրքով, վերանայել Հայաստանի սուպերվարչապետության հարցը և ընտրել այնպիսի ժամկետներ, որ քաղաքական ուժերն ու հասարակությունը կարողանան պաստրաստվել ընտրություններին։

Հարցին` իսկ այդ դեպքում կա՞ն երաշխիքներ, որ վարչապետի ընտրություններին թեկնածուներ չեն առաջադրվի, և ԱԺ-ն կլուծարվի, Ռուստամյանը պատասխանեց. «Մենք ասել ենք` եթե համաձայնության ենք գալիս այս փաթեթով, իհարկե, նաև պայմանավորվում ենք, որ գործընթացն ընթանա ըստ Սահմանադրության պահանջի՝ չլինեն առաջադրումներ»։