Վաղը, չորեքշաբթի, փետրւարի 27-ի առաւօտեան թեհրանահայ համայնքի պահանջատէր ժողովրդի զաւակները համախմբւելու են թուրքական դեսպանատան առջեւ (Ֆերդոսի պողոտայ)՝ բողոքելու նոյն երկրի տարածաշրջանային եւ մասնաւորապէս սիրիական տագնապում ցուցաբերած դաւադիր քաղաքականութեան եւ դրանից բխող՝ ոչ-հայանպաստ հետեւանքների դէմ:

Թէպէտ Թուրքիան սկզբից ձեւացրել է, թէ սիրիական տագնապում հետամուտ է եղել այսպէս ասած՝ «արաբական գարնան» հոլովոյթում հակառեժիմ գործընթացների, բայց եւ այնպէս՝ որեւէ արդարացում չի կարող քողարկել թուրքական բուն նպատակը՝ գաղափարա-քաղաքական միտումներով «նէոօսմանիզմը» գովազդելու-քարոզելու հանգամանքը: Աւելին՝ թուրքական դաւերի կենսագործման ճամբին «Ալ Ղայիդա»-կան եւ նմանատիպ վարկաբեկւած գործօնների առկայութիւնը սաղմի մէջ իսկ յօդս է ցնդեցնում թուրքական հերթական լարախաղաց քայլերը, որոնք մշտապէս ի վնաս են գործել անմիջական հարեւանների շահերին ու առհասարակ՝ շրջանային խաղաղութեանն ու կայունութեանը:

Հայկական գործօնի եւ տւեալ դէպքում՝ սիրիական արդէն երկամեայ տագնապի արդիւնքում սիրիահայ ծաղկուն համայնքի խիստ անմխիթար ու ծանրակշիռ իրավիճակը հաստատապէս հետեւանքն է միեւնոյն՝ թուրքական տարածաշրջանային ընդհանուր քաղաքականութեան, որտեղ սիրիացի տուժող ժողովրդից անմասն չի մնում նաեւ ու մանաւանդ սիրիահայ գաղթօջախը:

Ահաւասիկ, ինչպէս ողջ հայաշխարհի ցաւակից ու պահանջատէր հայորդիներ, իրանահայ զաւակները եւս ամէն պատճառ ու հիմք ունեն առանց այդ էլ ցեղասպան Թուրքիային բողոքի ցոյցերով յիշեցնել-զգուշացնելու իր՝ մասնաւորապէս հայութեան իւրաքանչիւր բեկորի կամ հատւածի ուղղակի թէ անուղղակի վնաս հասցնելու մասին:
Բողոքի ու արդար պահանջատիրութեան այս իրաւունքը յարգելով, ահա ԻԻՀ համապատասխան մարմինների ընդառաջմամբ ու համայնքիս ազգային մարմինների համադրական ջանքերով, թեհրանահայութիւնը ինչպէս միշտ՝ կուռ եւ քաղաքակիրթ կեցւածքով համախմբւելու է Թուրքիայի դեսպանատան առջեւ, իր գերազանցապէս բարոյական ու քաղաքական ձայնակցութիւննեցուկը ցուցաբերելու սիրիահայ մեր քաջակորով հայրենակիցներին:

«ԱԼԻՔ»