Հաջորդ տարի գարնանը տեղի է ունենալու ՀՅ Դաշնակցության (ՀՅԴ) Հայաստանի գերագույն ժողով, որի արդյունքում էլ փոփոխություններ տեղի կունենան կուսակցության Հայաստանի Գերագույն մարմնի (ԳՄ) կազմում:

Այս մասին «Ազատություն» ռադիոկայանի հետ զրույցում տեղեկացրեց Դաշնակցության Մամլո Դիվանի պատասխանատու Արտյուշ Շահբազյանը:

Հայաստանի խորհրդարանական, նախագահական և երևանյան վերջին ընտրություններից հետո լրատվամիջոցներում տեղեկություններ հայտնվեցին, թե Դաշնակցության շարքերում դժգոհություն են առաջացրել կուսակցության անհաջողությունները նշված ընտրություններում, և կարծիքներ էին հնչում, թե արդյունքը կարող են լինել փոփոխությունները կուսակցության ղեկավար կազմում:

«Փոփոխություն տեղի կունենա՝ Գերագույն մարմնի կա՞զմը կփոխվի», – «Ազատություն» ռադիոկայանի այս հարցին Շահբազյանը պատասխանեց․ – «Անշո՛ւշտ տեղի կունենա, անշո՛ւշտ տեղի կունենա, որ չափով՝ ես չեմ կարող ասել, բայց, անշուշտ, փոփոխությունները՝ էդպիսի ժողով չի եղել, որ մեզ մոտ մարմինները չփոփոխվեն, փոփոխություն չկրեն»:

«Եվ ի՞նչ եք կարծում՝ փոփոխությունը ռադիկալ բնույթ կկրի, ընդհանրապես կազմը կփոխվի, թե․․․», – այս հարցին էլ դաշնակցական գործիչը արձագանքեց․ – «Գիտեք, դա ոչ ոք չի կարող ասել, որովհետև մեզ մոտ նման բաները կանխատեսելը․․․ Որովհետև դա ոչ վերահսկվում է, ոչ էլ թելադրվում, ոչ ոք չի կարող ասել: Ժողովից ժողով, ցանկացած ժողովում, օրինակ՝ նույն վերջին մարմինն էլ երևի 70-80 տոկոսով նոր մարմին է եղել: Այսինքն, էդ փոփոխությունները միշտ էլ հնարավոր են, դրանք քննարկումների արդյունքում են կարծես թե ի հայտ գալիս, թե ինչ տեսակ մարմին կձևավորվի»:

«Բայց մի բան էլ կա, որ, անշուշտ, մենք միշտ աշխատում ենք պահպանել որոշակի ժառանգականություն, որոշակի շարունակականություն, այսինքն՝ նաև փորձառու ընկերները պիտի լինեն, մարմիններում եղած արդեն ընկերները պիտի լինեն, որոնք գիտեն՝ երեկ ինչ էր արվում և վաղը ինչ պիտի արվի», – ընդգծեց Արտյուշ Շահբազյանը:

ՀՅ Դաշնակցության Հայաստանի Գերագույն մարմնի ներկայացուցիչն այսօր Արմեն Ռուստամյանն է, ով ղեկավարում է կուսակցության խմբակցությունը Ազգային ժողովում և ով գլխավորում էր Դաշնակցության համամասնական ցուցակը այս տարի մայիսին կայացած երևանյան ընտրություններում:

«Ազատություն» ռադիոկայանի հարցին՝ հնարավո՞ր է, որ փոխվի նաև Դաշնակցության գերագույն մարմնի ներկայացուցիչը, Շահբազյանը պատասխանեց․ – «Ես տեղեկություն էդպիսի չունեմ, բայց և՛ հնարավոր է, և՛ հնարավոր չէ: Որովհետև մեզ մոտ մարմնի ներկայացուցիչը, մարմնի դիվանը՝ ոնց որ մենք ասում ենք, ձևավորվում է արդեն մարմնի ընտրությունից հետո, այսինքն՝ ժողովը չի ընտրում»:

Իսկ հարցին էլ՝ կարելի՞ է ասել, որ այս փոփոխությունների պատճառը նաև նախորդ ընտրություններում Դաշնակցության գրանցած արդյունքն է, ինչպես վերը նշված հրապարակումներն են պնդում, Արտյուշ Շահբազյանը արձագանքեց․ – «Գիտեք, դա կախված է գնահատականներից՝ գուցե նաև գնահատականների մեջ դա տեղի ունենա: Չեմ կարող վստահ ասել, հիմա դժվար է ասել՝ գնահատականները ինչ են լինելու նախորդ ընտրությունների վերաբերյալ, այսինքն՝ որքանով են հիմքերը ընտրությունների արդյունքների ինչով են պայմանավորված, և այլն»:

azatutyun.am

Պատերազմի ժամանակ թշնամիները հանդիպո՞ւմ են

Դաշնակցության Մամլո Դիվանի պատասխանատու Արտյուշ Շահբազյանը Ժողովուրդ -ի հետ զրույցում հայտարարեց, որ ՀՅԴ-ն միանշանակորեն ընդդիմություն է ու դա ապացուցում է իր ամենօրյա աշխատանքով:

-Պարո՛ն Շահբազյան, նախօրեին ՀՅԴ-ն հաղորդագրություն է տարածել, որի բովանդակությունը բոլորի մոտ տարբեր հարցեր է առաջացրել: Այնտեղ շատ ՙմութ՚ կետեր կան, նշվում է, թե ՙառկա մարտահրավերները դիմագրավելու համար ՀՀ-ն պետք է ամրապնդի ներքնապես, միատեղի համայն հայության ներուժը, հստակեցնի եւ վարի նպատակային ու ակտիվ արտաքին քաղաքականություն՚: Ինչպե՞ս հասկանալ սա:

-Դրանից պարզ ինչպե՞ս գրվեր: Լինելու է ակտիվ քաղաքականություն:

-Իսկ հնարավո՞ր է, այդ ակտիվ քաղաքականությունը լինի իշխանությունների հետ համագործակցության տեսքով:

-Ակտիվ քաղաքականություն ասելովª դա՞ հասկացաք: Մենք այն, ինչ գրել ենք, ուղիղ ենք գրել: Արտաքին քաղաքականության մեջ եթե անհրաժեշտ է լինում, մենք օժանդակում ենք ու կշարունակենք օժանդակել: Հայ դատի գրասենյակները հիմնականում դրանով են զբաղված: Բայց սա առաջին դեպքը չէ, որ ասվում էª Հայաստանը պետք է ակտիվ քաղաքականություն վարի: Ներքին առումով պետք է լինի ուժեղ, որպեսզի կարողանա դիմագրավել նաեւ հնարավոր արտաքին ճնշմանը: Շատ պարզ է ասված:

-Դեռեւս 2009թ. ՀՅԴ-ն կոալիցիա էր կազմել իշխանությունների հետ, հնարավո՞ր է կրկին կոալիցիա կազմեք ու այդ կերպ շարունակեք Ձեր քաղաքականությունը:

-Մենք առաջիկա տարիներին չենք տեսնում մեզ նոր կոալիցիայի մեջ, այդպիսի հեռանկար չի տեսնում ՀՅԴ-ն: Այս իշխանությունների հետ նման հեռանկար հնարավոր չէ տեսնել: Միշտ էլ մյուս կուսակցությունների հետ եղել են համագործակցություններ, հիմա էլ հնարավոր է գործակցություն: Հիմա էլ ենք գործակցում, օրինակ, խորհրդարանի մակարդակով:

-Եթե որեւէ հեռանկար չեք տեսնում իշխանությունների հետ, այդ դեպքում ինչո՞ւ է ՀՅԴ բյուրոյի ներկայացուցիչ Հրանտ Մարգարյանը պարբերաբար հանդիպումներ ունենում ՀՀԿ առաջնորդ Սերժ Սարգսյանի հետ: Դա տարակուսանք է առաջացնում բոլորի մոտ:

-Գիտեք ինչ, Հրանտ Մարգարյանը տարբեր առիթներով տվել է դրա բացատրությունը, ու կարծում եմ, որ շատ հստակ է տվել: Հայաստանի պետության ղեկավարը եւ համահայկական կուսակցության ղեկավարը չեն կարող չհանդիպել, որովհետեւ բազմաթիվ խնդիրներ կան, որոնց շուրջ քննարկումներ պետք է լինեն: Եթե թշնամիներն անգամ պատերազմի ժամանակ կարող են իրար հետ հանդիպել, ապա այս խաղաղ պայմաններում, մանավանդ մի երկրի, մի համահայկական կուսակցության ղեկավար եւ մի պետության ղեկավար չեն կարող ընդհանուր հետաքրքրող խնդիրների շուրջ չհանդիպել ու չզրուցել: Դրանից կարելի է եզրակացնել, որ եթե խոսում են, ուրեմն հայկական շահերի մասին են խոսում, որոշ տեղերում, մասնավորապես արտաքին քաղաքականության մեջ աշխատանքի համադրման մասին են խոսում: Բնականաբար, խոսում են ընդհանուր շահերի ու աշխատանքների մասին:

-Իսկ այս իշխանությունների ստեղծած պայմաններում ՀՅԴ-ն հնարավոր համարո՞ւմ է նորմալ աշխատել, որի արդյունքում կարելի է ինչ-որ բանի հասնել:

-Մենք ունենք տարբեր դժգոհություններ եւ արտահայտել ենք, բայց թեկուզեւ այն, որ այսօր խորհրդարանում Դաշնակցությունն առաջարկում է, առաջարկություններ է անում, քննարկումների է մասնակցում, նշանակում է, որ մենք աշխատում ենք, չէ՞, իշխանությունների հետ: Դա աշխատա՞նք չէ: Այդ ամենն աշխատանք է:

-Սփյուռքի ձեր համախոհները տեղյա՞կ են ձեր հաղորդագրությունից ու հետագա քայլերից…

-Մենք բոլորս միասին ենք այս բոլոր խնդիրները քննարկել, ինչ-որ կարդում եք, այս ամենին կողմնակից են ներկայացրած խորհրդաժողովի ներկայացուցիչները:

-Այսօր ընդդիմադիր դաշտը լճացել է, ու բոլորի համար անհասկանալի է, թե որտեղ է իրական ընդդիմությունը: Ի վերջո, ՀՅԴ-ն ընդդիմությո՞ւն է:

-Հստակորեն դա կարելի է այդպես ասել, որեւէ բան չի փոխվել, կարծում եմ, որ մեր հաղորդագրությունից էլ է դա հստակ երեւում: Ինչո՞ւ, չի՞ երեւում, որ մենք ընդդիմություն ենք, մենք ամեն օր, տարբեր խնդիրների հետ կապված, իշխանությունների հետ բանավեճերի, քննարկումների մեջ ենք: Բարձրացնում ենք տարբեր հարցեր ու լուծումներ ենք պահանջում, ընդդիմությունն ի՞նչ պետք է անի: Հո չե՞ն կրակելու իրար վրա կամ անպայման միմյանց հայհոյե՞նք, որ լինի ընդդիմություն: Ընդդիմությունն իր ընդդիմադիր գործունեությամբ է ընդդիմություն, իսկ ՙԴաշնակցություն՚-ն էլ ընդդիմադիր գործունեություն է իրականացնում:

-Տեղեկություններ կան, որ ՀՅԴ անդամներ Վահան Հովհաննիսյանին եւ Լեւոն Մկրտչյանին ՀՀ դեսպաններ են նշանակելու: Իրենք համաձա՞յն են:

-Ես այդ մասին իմացել եմ մամուլից: Այդպիսի որեւէ հաստատված տեղեկություն չկա: Մի բան եթե հաստատ չէ, ուրեմն չի կարելի ուղղակի տեսական բաներ ասել: Հո Կիկոսի մահվան պատմությո՞ւնը չէ:

zhoghovurd.am