ՀՅԴ «Նիկոլ Աղբալյան» ուսանողական միությունը, որը այսօր՝ սեպտեմբերի 2-ին, նախաձեռնել էր բողոքի ակցիա՝ ընդդեմ ուսման վարձավճարների թանկացման, ժամը 13-ի սահմաններում միացել է ԵՊՀ առջեւ առավոտից բողոքի ակցիա անցկացնող ուսանողներին: Հիշեցնենք, որ ավելի վաղ նրանց միացել էին նաեւ ԵՊՃՀ ուսանողները, հիմնականում՝ առաջին կուրսի ուսանողներ:
Բողոքի ակցիայի մասնակիցներն այնուհետեւ միասին շարժվեցին դեպի Կառավարության շենք, որտեղ պահանջելու են չեղյալ հայտարարել ուսման վարձավճարների բարձրացման որոշումը:
Ճանապարհին ուսանողները կանգառ են արել Խաչատուր Աբովյանի անվան հայկական պետական մանկավարժական համալսարանի մոտ եւ ապագա մանկավարժներին նույնպես կոչ են անում միանալ իրենց ակցիային:
Ուսանողները վանկարկում են «Ուսանող ոտքի», « Ուսանողի շահերը վեր են կուսակցական շահերից»: Պաստառներից մեկին գրված է. « Լուծեք մեր հարցերը, այլապես մենք կլուծենք ձեր հարցերը:
Հիշեցնենք, որ ավելի վաղ ոստիկանները բերման էին ենթարկել ԵՊՀ երկրորդ կուրսի ուսանող Հարություն Մկրտչյանին եւ առգրավել նրա բարձրախոսը:
news.am
Կառավարություն, պատասխան տուր քո ուսանողին, որին հարստահարել ես. ակցիա նախագահականի դիմաց
«Նիկոլ Աղբալյան» ուսանողական միության անդամներն այսօր իրենց բողոքի ակցիան ավարտեցին կառավարության շենքի դիմաց, որտեղ հանդես եկան բարձրակոչ հայտարարություններով. «Կառավարություն, պատասխան տուր քո ուսանողին, որին հարստահարել ես»:
Ուսանողներին մոտեցավ կառավարության նամակների վարչության պետ Ալեքսանդր Ղազարյանը, ում ուսանողները նամակ տվեցին՝ ուսման վարձերի թանկացման որոշումը չեղյալ համարելու պահանջով:
Ուսանողները հայտարարեցին, որ հաջորդ ակցիան կանցկացնեն սեպտեմբերի 5-ին, նախագահի նստավայրի դիմաց: «Պահանջում ենք նախագահին պատասխան տալ, մենք հույսեր չենք կապում կառավարության հետ»,- հայտարարեց «Նիկոլ Աղբալյան» ուսանողական միության անդամ Մհեր Ղազարյանը:
«Մենք առանձնակի սպասելիքներ չունեինք էլ կառավարությունից։ Մենք մեր պահանջը ներկայացրինք, կսպասենք պատասխանին։ Հաջորդ քայլը նախագահից ենք պահանջելու պատասխան տալ, կառավարությունը միշտ էլ աչքի է ընկել իր ապակառուցողական մոտեցումներով»,- հայտարարեցին նրանք:
Ցուցարարները նաև զրույց ունեցան նամակների վարչության պետի հետ՝ պահանջելով լրջագույն ուշադրություն դարձնել իրենց պահանջին:
Կառավարությանը փոխանցած նամակով ուսանողական միության անդամները պահանջել են ՀՀ իշխանությունների ուշադրությունը սևեռել ուսանողների սոցիալական վիճակի վրա. «Ուսանողն այսօր դարձել է սոցիալապես ամենախոցելի զանգվածը, և մեզ չի հետաքրքրում, թե ուսման վարձերն ինչ հիմքերով են բարձրացրել»:
«Մի թալանեք ուսանողին, ուսանողը չպետք է պատասխան տա ձեր օֆշորների համար, ձեր անգրագիտության համար ուսանողը չպետք է պատասխան տա, պարոն վարչապե՛տ, իջեք պատասխան տալու, Տիգրա՛ն, հեռացիր» և նմանատիպ այլ կոչեր հնչեցրին ուսանողները:
Նշենք, որ բողոքի ակցիան սկսվել էր Հայաստանի պետական ճարտարագիտական համալսարանի դիմացից, անցել ԵՊՀ-ի, ԵՊՏՀ-ի, Երևանի պետական մանկավարժական համալսարանի տարածքներով և ավարտվել կառավարության մոտ:
Նշենք նաև, որ այսօր առավոտյան մի խումբ ակտիվիստ ուսանողներ նույն պահանջով բողոքի ակցիա էին անցկացնում ԵՊՀ-ի դիմաց, որից հետո նրանք գնացին Կրթության և գիտության նախարարություն և չմիացան «Նիկոլ Աղբալյան» ուսանողական միության նախաձեռնած ակցիային:
tert.am