Այսօր, հոկտեմբերի 4-ի ԱԺ ավանդական ճեպազրույցում լրագրողները հերթական անգամ անդրադարձել են ԱԺ ՀՅԴ խմբակցության պատգամավոր Վահան Հովհաննիսյանի` Գերմանիայում դեսպան նշանակվելուն:
Լրագրողներին հետաքրքրում էր, թե հնարավո՞ր է` դրանից հետո ՀՅԴ-ն փոխի իր դիրքորոշումները:
«Այսքան ժամանակ դուք տեսե՞լ եք, որ որեւէ հարցում մեր դիրքորոշումները փոխվեն, տեսե՞լ եք, որ մենք ասենք, թե իշխանափոխություն պետք չէ մեր երկրում»,- նշել է ԱԺ ՀՅԴ խմբակցության քարտուղար Աղվան Վարդանյանը:
Նա լրագրողներին հիշեցրել է, որ այդ թեմայի շուրջ Վահան Հովհաննիսյանը բազմիցս խոսել է, հարցազրույցներ տվել, մամուլի ասուլիս հրավիրել:
«Ինձ համար մեկ բան է կարեւոր` Վահան Հովհաննիսյանի դեսպան դառնալը կարեւոր երկրներից մեկում օգո՞ւտ է մեր երկրին, թե՞ ոչ: Համոզված եմ, որ դուք էլ կողմ կլինեիք, որ մեր բոլոր դեսպաններն ունենային նրա փորձառությունը, կարողությունները, առահասարակ, պետական կառավարման համակարգում էլ մարդիկ դարձյալ իրենց հատկություններով, աշխարհայացքով մոտ լինեին պարոն Հովհաննիսյանին: Իհարկե, Վահան Հովհաննիսյանի` դեսպան նշանակվելուց երկիրը կշահի»,- հայտարարել է Աղվան Վարդանյանը:
Նա անդրադարձել է այն խնդրին, թե արդյո՞ք չի տուժի դրանից ՀՅԴ-ն: «Կտուժի՞ Դաշնակցությունը: Գուցեեւ տուժի, բայց կուսակցությունն ինքն իր համար չէ, երկրի եւ պետականության համար է: Ոչինչ, դրան էլ կդիմանանք, հանգիստ եղեք»,- ասել է դաշնակցական պատգամավորը եւ խորհուրդ տվել այս հարցի առումով դուրս գալ պարզամիտ, պրիմիտիվ մոտեցումներից:
Աղվան Վարդանյանը խոսել է նաեւ կուսակցության մշակած արտագաղթի կանխարգելման ծրագրի մասին. «Մենք բավական երկար ժամանակ մշակել ենք այդ ծրագիրը և այժմ ինտենսիվ աշխատանք ենք տանում այն կյանքի կոչելու համար: Մենք այն արդեն ներկայացրել ենք բոլոր քաղաքական ուժերին, փորձագետներին, հասարակական կազմակերխություններին»,- ասել է Վարդանյանը` ընդգծելով, որ արտագաղթը Հայաստանի առջև ծառացած ամենալուրջ մարտահրավերներից մեկն է, և իրենք ամեն ինչ անելու են այն կանխելու համար:
Ինչ վերաբերում է Գևորգ Կոստանյանին գլխավոր դատախազի պաշտոնում նշանակելուն, ըստ Աղվան Վարդանյանի Հայաստանի արդարադատության համակարգում լուրջ խնդիրներ կան, որոնք պետք է լուծում ստանան համատեղ աշխատանքի արդյունքում. «Մենք չպետք է ձեռքներս ծալած նստենք և սպասենք փոփոխությունների, այլ պետք է մեր աշխատանքով այնպես անենք, որ այդ բարեփոխումները իրականանություն դառնան: ՀՅԴ-ն գործունեության հենց այդ ուղին է ընտրել»:
Անդրադառնալով ԵԽԽՎ-ում Զարուհի Փոստանջյանի հնչեցրած հարցին՝ ԱԺ ՀՅԴ խմբակցության ղեկավար Աղվան Վարդանյանը հստակեցրել է, որ այդ հարցը տասներորդական է, պետք չէ այդքան կենտրոնանալ դրա վրա` հաշվի առնելով երկրում առկա բազմաթիվ խնդիրները:
Լրագրողների այն հարցին թե արդյոք ՀՅԴ-ն հարցի շուրջ հանդես է գալու դատապարտող հայտարարությամբ, պատգամավորը պատասխանել է. «Չեմ կարծում, որ սա այն հարցն է եւ այն անձը, որ հանդես գանք հատուկ դատապարտող հայտարարությամբ: Մենք մեր տեսակետն ասել ենք, ոչինչ չի փոխվել: Բոլորս Փոստանջյանին ճանաչում ենք` թուրք չէ, հայ կին է, չորս երեխաների մայր, բայց շատ յուրօրինակ կին է: Այդ հարցը այդ տեղում տալը ճիշտ չէր, մենք նման բաներ մեզ երբեք թույլ չենք տվել: ժամանակին երբ ձերբակալված էին ՀՅԴ-ի տղաները, միջազգային կառույցներն այցելում էին նրանց եւ փորձում բողոքներ լսել եւ հետո դրանք օգտագործել մեր երկրի դեմ, բայց տղաներն ասում էին, որ սրանք մեր ներքին հարցերն են»:
Ըստ ԱԺ ՀՅԴ խմբակցության ղեկավարի՝ այս հարցում «Ժառանգության» խմբակցությունն անելիք ունի` պետք է հայտնի իր տեսակետը, պարզաբանի` դա Փոստանջյանի՞, թե՞ խմբակցության դիրքորոշումն էր. մեր խնդիրները պետք է այդ կառույցում բարձրաձայնվեն, բայց այդ բնույթի հարց, որն ապացուցելի չէ, պետք չէր տալ, կարելի էր շատ ավելի ծանրակշիռ հարց տալ:
Վարդանյանը դատապարտել է նաեւ այն ՀՀԿ-ականներին, ովքեր այս օրերին հայհոյախառն խոսքեր են հնչեցնում Փոստանջյանի հասցեին:
