Հայկական երեսփոխանական պլոքի ներկայացուցիչ, երեսփոխան Յակոբ Բագրատունի «Շաղզոյեան» կեդրոնի իր գրասենեակին մէջ ընդունեց ՄԱԿ-ի ընդհանուր քարտուղար Պան Քի Մունի անձնական ներկայացուցիչ Տերեք Փլամպլին, որուն հետ մէկ ժամ տեւած հանդիպումի մը ընթացքին քննեց Լիբանանը եւ շրջանը յուզող զանազան հարցեր:
Երեսփոխան Բագրատունի ՄԱԿ-ի պաշտօնատարին ներկայացուց ՀՅ Դաշնակցութեան լիբանանեան քաղաքականութեան հիմնական ուղղութիւնները, որոնք կը բխին երկրին ամբողջականութեան, գերիշխանութեան, անկախութեան եւ ազատութեան սկզբունքներէն, ինչպէս նաեւ համայնքներու գոյակցութեան եւ փոխադարձ յարգանքի պատասխանատուութենէն:
Տեսակցութեան ընթացքին լայնօրէն արծարծուեցան Ազգային երկխօսութեան նիստի աւարտին հրապարակուած Պաապտայի յայտարարութեան մէջ նշուած կէտերը, ուր թէ՛ Փլամպլի եւ թէ՛ Բագրատունի շեշտեցին երկխօսութեան կարեւորութիւնը եւ զայն աշխուժացնելու անհրաժեշտութիւնը:
Հանդիպումը առիթ մը եղաւ նաեւ քննելու շրջանային իրավիճակը եւ այդ գծով ՄԱԿ-ի դերակատարութիւնը:
