Այսօր, ՀՅԴ Հայաստանի երիտասարդական միության և «Նիկոլ Աղբալյան» ուսանողական միության նախաձեռնությամբ, տեղի ունեցավ բողոքի ակցիա Սիրիայի Քեսաբ քաղաքում տեղի ունեցող իրադարձությունների նկատմամբ ՄԱԿ-ի դրսևորած անտարբերության կապակցությամբ:
«Քեսաբը մերն է` մերն է լինելու», «Թուրքի’ա, ձեռքերդ հեռու’ Քեսաբից» վանկարկումներերով ակտիվիստներն ու Հայաստանում բնակվող քեսաբահայերը ՀՅԴ Գերագույն մարմնի շենքից երթով շարժվեցին դեպի ՄԱԿ-ի հայաստանյան գրասենյակ, որտեղ նամակ հանձնեցին կազմակերպության ներկայացուցչին: 
Ակցիայի մասնակիցները պահանջում էին ՄԱԿ-ից` կատարել իր իրական առաքելությունը, դատապարտել և կանխել Թուրքիայի քողարկված ագրեսիան Քեսաբի խաղաղ բնակչության նկատմամբ, ինչպես նաև միջոցներ ձեռնարկել` քեսաբցիներին իրենց մշտական բնակության վայր անվտանգ տեղափոխելու համար:
ՀՅԴ «Նիկոլ Աղբալյան» ուսանողական միության վարչության ատենապետ Գերասիմ Վարդանյանը բարձրախոսով նշեց, որ Քեսաբ հայահոծ տարածքի վրա Թուրքիան երեք անգամ ոտնձգություն է կատարել՝ 1909, 1915 թվականներին և հիմա: «Այս երեք գործողությունները Թուրքիայի կողմից միտված են ոչնչացնելու Քեսաբի հայ բնակչությանը: Թուրքիան շարունակում է հայերի ցեղասպանությունը: Միջազգային հանրությունն իր կրավորական կեցվածքով, անտարբերությամբ, լռությամբ սատարում է Թուրքիայի հակահայ քաղաքականությանը, խրախուսում է Թուրքիային՝ շարունակելու ցեղասպանությունը»,- ասաց Վարդանյանը՝ պահանջելով միջազգային հանրությունից համապատասխան գնահատական տալ, միջամտել և պահանջել Թուրքիայից՝ զերծ մնալ պատերազմի հրահրումից, հակահայկական գործողություններից: «ՄԱԿ-ը պարտավոր է ստեղծել պայմաններ, որպեսզի քեսաբահայությունը վերադառնա իր բնակավայր»,- ընդգծեց Վարդանյանը:
ՄԱԿ-ի ներկայացուցիչը հավաստիացրեց, որ նամակն անպայման արձագանք կգտնի և կուղարկվի նաև ՄԱԿ-ի միջազգային գրասենյակ:
Ակցիային մասնակից քեսաբահայերը, ովքեր շատ հուզված էին, պատմում էին, թե վերջին օրերին ինչպիսի զրկանքներ են կրել իրենց հարազատները: «100 տարի անց նորից Թուրքիան իր սև գործն է անում»,- նշեց քեսաբահայերից մեկը:
