ԱԺ ՀՅԴ խմբակցության ղեկավար Արմեն Ռուստամյանն ԱԺ ավանդական ճեպազրույցում խոսելով ներկա պահին ՍԴ-ում քննվող կուտակային օրենքի մասին, նշեց, որ գալիս է հենց ՍԴ-ից, լսել է դիմող կողմի առաջին ելույթները, և կարող է փոխանցել անգամ այնտեղ նստած ունկնդիրների տպավորությունները:
Նրա խոսքով` այն փաստերը, որոնք ներկայացվում են ՍԴ-ին, ուղղակի անհերքելի են, մասնավորապես խտրականության և սեփական իրավունքի խախտումների հարցը, սակայն դեռ շատ այլ հարցեր կան, քանի որ հարցը տարողունակ է: «Կարծում եմ՝ սա անկյունաքար է ՍԴ համար, որովհետև այսպիսի ակնհայտ խախտումներ, իրավական նորմերի խախտումներ, որոնք առաջացնում են միջազգային խարտիաների հետ անհամապատասխանություն, դեռ չէր եղել:
Հույս ունեմ, որ ՍԴ-ն կանտեսի քաղաքական ցանկացած ճնշում ու փաստարկ, դուրս կգա այդ հարթությունից ու զուտ իրավական տեսանկյունից կկայացնի որոշում»- ասաց Արմեն Ռուստամյանը:
Նա նաև կարծիք հայտնեց, որ ՍԴ-ն կգնա միջանկյալ տարբերակով, այսինքն ՍԴ-ն կտա իրավական դիրքորոշում, որը մոտավորապես նման կլինի հայ-թուրք արձանագրությունների ժամանակ առաջացած իրավիճակին, երբ ՍԴ-ն որոշեց, որ միջանկյալ դիրքորոշումը չի հակասում օրենքի՝ նկատի ուեննալով իրավական դիրքորոշումը:
Այդ դեպքում, ըստ պատգամավորի, էական փոփոխություններ կկատարվեն օրենքում և ամբողջ փաթեթը պետք է վերանայվի:
Արմեն Ռուստամյանը համոզված է, որ օրենքի խորքային քննարկման ընթացքում կապացուցվի, որ այն տեսքով, որով ներկայացվում է օրենքը տարբեր է Չիլիից:
«Այն ինչ Հայաստանում է ներդրվում ունիկալ է, որևէ երկրում նման ձևով չի դրվել, ինչպես առաջարկվում է կիրառել Հայաստանում: Կարծում եմ տրամաբանված քաղաքացիական հասարակությունը և քաղաքական ուժերը լուրջ հիմնավորված պայքար են տանում, ես հավատում եմ հաջողությանը»,- ասաց պատգամավորը:
ԱԺ ՀՅԴ խմբակցության ղեկավար Արմեն Ռուստամյանի կարծիքով` Հայաստանը ճիշտ է քվեարկել ՄԱԿ-ում՝ դեմ լինելով Ուկրաինայի տարածքային ամբողջականության բանաձևին. «ձեռնպահ»-ի ու «դեմ»-ի միջև էական տարբերություն չկա, ավելի լավ է, որ Հայաստանը հստակ է արտահայտել իր դիրքորոշումը:
Ըստ պատգամավորի` եթե դա ճիշտ բանաձև լիներ, ապա բոլորը կողմ կքվեարկեին այդ բանաձևին: «Հայաստանը չէր կարող դեմ չքվեարկել, եթե Ղրիմի հանրաքվեն միջազգային հանրությունը դնում է կասկածի տակ, այն հանրաքվեն, որը, կպարզվի, ստիպողաբար չի եղել և իսկապես արտահայտել է ժողովրդի ազատ կամքը: Ղրիմի բնակչության 70 տոկոսը ռուսներ են, ի՞նչ է՝ ռուսները չե՞ն ուզել միանալ ռուսներին: Ուրեմն` դա ժողովրդի ազատ կամաարտահայտություն է եղել, հետևաբար` չի կարելի ժողովրդի կամքին հակառակ որոշումներ կայացնել»:
Արմեն Ռուստամյանը հավելեց, որ ակնհայտ երևում են քաղաքական շահերը, որոնք հանգեցնում են երկակի ստանդարտների: Օրինակ՝ այդ հարյուր երկրները, որոնք կողմ են քվեարկել Ուկրաինայի ամբողջականության վերաբերյալ բանաձևին, ինչո՞ւ են կողմ քվեարկել Կոսովոյի անկախությանը: «Հանրաքվեն չի կարող մի տեղ լինել օրինական, մյուս տեղում` անօրինական: Մեր շահը հստակ է, ունենք Արցախի խնդիր, որն ունի իր առանձնահատկությունը: Դեմ եմ, որ այն նույնացնում են Ղրիմի հետ, բայց երկու հարց կա՝ ժողովրդի ազատ կամքի դրսևորում ու ինքնորոշման իրավունք, որը մարդու իրավունքից էլ վեր իրավունք է: Ցանկացած հանրաքվե միանշանակ չի ընկալվում, որովհետև ամեն երկիր իր շահերն է տեսնում»,- ասաց նա:
Պատգամավորի խոսքով՝ Խորհրդային Միությունն է ստեղծել ազգամիջյան հակամարտությունների հիմքը, և Խորհրդային Միության փլուզումից հետո այդ կոնֆլիկտները մտան արյունալի պրոցեսների մեջ:
Պատգամավորը նշեց, որ ներկա պահին էլ Ուկրաինայում անիշխանություն է, և խնդիր կա ՝ հաղթահարելու ճգնաժամը, որը կհաղթահարվի միջազգային նորմերով:
Ինչ վերաբերում է Հայաստանի քվեարկության արդյունքում Ուկրաինայի հայ համայնքի երկակի դրությանը, Արմեն Ռուստամյանը նշեց, որ հայ ազգը աշխարհի շատ պետություններում ունի համայնք, և հայկական համայնքները պետք է առաջնորդվեն տվյալ տեղի ժողովրդի կայացրած որոշումներով ու համակերպվեն այդ որոշումների հետ` անկախ այն բանից, թե այդ երկրները միմյանց հետ ինչ խնդիրներ ունեն:
Հարցին ի պատասխան՝ արդյո՞ք Հայաստանի քվեարկության գործընթացում եղել է ճնշում Ռուսաստանի կողմից, Արմեն Ռուստամյանը կարծիք հայտնեց, որ, բնականաբար, կա քաղաքական խնդիր՝ Մաքսային միության առումով, բայց չի կարծում, թե այդ հանգամանքը միակ գործոնն է եղել քվեարկության ժամանակ, որովհետև եթե այդպես լիներ, ՄՄ անդամ այլ երկրները նույնպես դեմ կքվեարկեին:
Պատգամավորի կարծիքով` Հայաստանն այսօր երկակի ստանդարտների ականատեսն է լինում, աշխարհը փոխվել է՝ միաբևեռ աշխարհից անցում կատարելով բազմաբևեռ աշխարհի:
