Այսօր լրագրողների հետ զրույցում ԱԺ ՀՅԴ խմբակցության ղեկավար Արմեն Ռուստամյանը, պատասխանելով այն հարցին, թե հնարավո՞ր է, որ ՀՅԴ-ն կոալիցիա կազմի իշխող կուսակցության հետ, հաշվի առնելով, որ ՀՅԴ-ն քառյակի ուժերից միակն է, որ կողմ է սահմանադրական բարեփոխումների անցկացմանը, նշեց. «Ոչ, ՀՅԴ-ն ոչ մի կերպ կոալիցիա կազմելու խնդիր չի դրել, այդ նույն հարցը տալիս էին, երբ յոթ կետերն էինք ներկայացնում: Այն ժամանակ էլ ասեցին` ՀՅԴ-ն ուզում է կոալիցիա կազմել, դրա համար է կետեր ներկայացնում: Մենք մեր տեսակետներն ունենք քսան-քսանհինգ տարի, արտահայտել ենք ու շարունակում ենք պաշտպանել այդ տեսակետները: Եւ եթե այդ տեսակետներից մեկը պաշտպանվում է, մենք համարում ենք, որ դա դրական գործընթաց է ու անկախ նրանից, թե ով է այդ տեսակետն ընդունում, մենք պատրաստ ենք համագործակցել ու այդ տեսակետը իր իրագործմանը հասցնել»:

Պատգամավորի խոսքով` ոչ ոքի համար նորություն չէ, որ ՀՅԴ-ն կողմ է եղել խորհրդարանական համակարգին: «Մեզ ասում են` կողմ եք` չտեսնելով նախագիծը, մենք ասում ենք` եթե ուզում ենք խորհրդարանական համակարգին անցնել, դրա համար սահմանադրական բարեփոխումներ են անհրաժեշտ, մենք դրա համար ենք սահմանադրական բարեփոխումներին կողմ, ոչ թե ինքնանպատակ ենք կողմ: Չենք կարող կողմ չլինել սահմանադրական բարեփոխումներին, եթե ուզում ենք, որ համակարգը փոխվի, այլ ճանապարհ չկա: Ինքնանպատակ կոալիցիա կազմելու ցանկություն Դաշնակցությունը երբեք չի ունեցել, եթե այդպես լիներ կոալիցիայից դուրս չէինք գա էլի»,- ընդգծեց Արմեն Ռուստամյանը:

Նա նշեց, որ շուտով քառյակը հանդիպում կունենա, ու իրենք իրենց այս մոտեցումը կպաշտպանեն: Ինչ վերաբերում է քառյակի մասնատմանը, նա նկատեց, որ միշտ էլ ասել են` քառյակ է այնքանով, քանի չորս ուժերով համաձայն են ինչ-որ բանի հետ, մնացած հարցերում ազատ են տնօրինելու իրենց տեսակետները:

yerkir.am

ԵԽԽՎ-ում զինվորական կարգապահությամբ կատարվում են Բաքվի հրահանգները

«Գնահատումները բավական նախնական են: Ըստ էության, գնահատում էլ չի, այլ իրավիճակի հետ կապված թվարկում, լուրեր եւ իրենց տպավորությունները: Կարեւորվում են առաջիկայում սպասվող իրադարձությունները, այդ թվում նաեւ սահմանադրական բարեփոխումների հարցին քաղաքական ուժերի դիրքորոշումները: Հիմնականը նաեւ դատական եւ արդարադատության համակարգերի բարեփոխումների հետ կապված խնդիրներն են, ոստիկանության թափանցիկ գործունեության եւ դրա հետ կապված ընթացքի մեջ դրված գործողությունները: Դրական է համարվում այն, որ Հայաստանը, անկախ նրանից, որ հիմա պատերազմական իրավիճակում է, հաստատել է այլընտրանքային ծառայության մասին օրենքը, որը գործադրված է ու լուրջ դիտողություններ, առարկություններ չի առաջացնում մյուս կողմերի համար»,-Aravot.am-ի հետ զրույցում ասաց ՀՅԴ խմբակցության ղեկավար Արմեն Ռուստամյանն` անդրադառնալով ԵԽԽՎ մոնիտորինգի հանձնաժողովում տեղի ունեցած քննարկումներին:

Հիշեցնենք, սեպտեմբերի 3-ին ԵԽԽՎ Մոնիտորինգային կոմիտեի դռնփակ նիստում Հայաստանի հարցով համազեկուցողներ Աքսել Ֆիշերը եւ Ալան Միլը ներկայացրել են հունիսի 16-18-ին Հայաստան կատարած այցի արդյունքները: Հայաստանի կողմից Մոնիտորինգային հանձնաժողովի դռնփակ նիստին ներկա են գտնվել ԵԽԽՎ-ում Հայաստանի պատվիրակության ղեկավար Հերմինե Նաղդալյանն ու պատվիրակության անդամ Արմեն Ռուստամյանը:

Ըստ մեր զրուցակցի, այնուհետ ադրբեջանցի պատվիրակն իր ելույթում փորձել է աղավաղել փաստերը`ներկայացնելով
իբրեւ մեծ խախտում այն, որ ՀՀ նախագահը այցելել է ԼՂՀ, որ սիրիահայ փախստականներին տեղաբաշխում են այդ տարածքներում եւ այլն:

Իր արձագանքում Արմեն Ռուստամյանը նկատել է, որ ԼՂՀ այցելությունները կամ այն, որ Հայաստանը զբաղվում է փախստականների տեղավորման հարցերով, խախտում ներկայացնելու փոխարեն, Ադրբեջանը պետք է դադարի թյուրիմացության մեջ դնել ԵԽ-ն, հրաժարվի իր «սեւ ցուցակի» պրակտիկայից, որտեղ հայտնվել են նաեւ նիստին ներկա պատգամավորներից ոմանք: Սահմանային իրավիճակը ներկայացնելիս, ադրբեջանցի պատվիրակը մեղավորությունն ամբողջությամբ հայկական կողմի վրա է բարդել: «Մենք իրականությունը ներկայացրեցինք, որ իրական խախտումը եւ արժեհամակարգի ոտնահարումը հենց պատերազմ սանձազերծելն է, ինչն այսօր Ադրբեջանը բոլորի աչքի առաջ կատարում է: Ես իրեն ուղիղ ասացի`Դուք եք հարձակվել, բնականաբար ետ եք մղվել, բնականաբար, ունեք զոհեր`շատ ավելի, քան մեր կողմինը: Համ հարձակվել, հարձակվելուց հետո ունենալ զոհեր եւ գալ այստեղ դժգոհե՞լ: Սա ուղղակի ադրբեջանական տրամաբանություն է: Բավական է այս կառույցին թյուրիմացության մեջ դնեք եւ մղեք ձեր քարոզչությանը հարմար ուղղությամբ»,- ասել է Արմեն Ռուստամյանը:

Այնուհետեւ, Ադրբեջանին վերաբերվող հարցի քննարկում է տեղի ունեցել, որի հիմնական թեման եղել է մեր հարեւան երկրում քաղբանտարկյալների առկայությունը: «Ամենազավեշտալին այն էր, որ Լեյլա Յունուսը մեղադրվում է Հայաստանի օգտին գաղտնի լուրեր փոխանցելու մեջ ու դիտվում է, որպես դավաճան: Բանը չհասավ նրան, որ մեն պաշտպանենք Լեյլա Յունուսին, բայց մարդիկ կան, ովքեր ճանաչում են իրեն, իբրեւ մարդու իրավունքների պաշտպան եւ այլն»,- ասաց Արմեն Ռուստամյանը`հավելելով, որ նույն տրամաբանությամբ է ադրբեջանական կողմը գործում`ԼՂՀ հակամարտությունն օգտագործել`բոլոր նմանատիպ հարցերից ձերբազատվելու համար. «Հիմա էլ ցանկի մեջ «հինգերորդ շարասյուն» հասկացությունն են մտցրել, որտեղ տեղավորում են բոլոր նրանց, ովքեր, իրենց կարծիքով, դավաճանություն են իրականացնում»:

Հարցին`ինչպիսի՞ն էր Մոնիտորինգի հանձնաժողովի անդամների վերաբերմունքն այդ քննարկումներին, Արմեն Ռուստամյանը պատասխանեց, որ բոլորին էլ ակնհայտ էր, որ ընդամենը մեկ ամիս առաջ կատարվածը հնարավոր չէ գլխիվայր շուռ տալ ու ադրբեջանական տեսակետն առաջ տանել: «Բայց բոլորս էլ գիտենք, թե ինչ լուրջ լոբբինգ է իրականացնում Ադրբեջանը ԵԽ-ում եւ սա մեր ամենագլխավոր մարտահրավերն է»,- ասաց նա: Իսկ ի՞նչ ակնկալիքներ կան վերջնական փաստաթղթերի առումով:

Արմեն Ռուստամյանն ասաց, որ օրինակ, Ադրբեջանի հարցով զեկուցողը հայտարարել է, թե իրեն ձայնագրություններ են փոխանցել երրորդ կողմի հետ խոսակցությունների եւ այլն, որոնց հետ ինքը չի կարող հաշվի չնստել: «Մտածել, որ հետագայում ավելի ամբողջական եւ լիարժեք գնահատական կտրվի թե Հայաստանի, թե Ադրբեջանի ընթացքին`լավատես չեմ, քանի որ գիտեմ, թե ինչպես ե կատարվում քվեարկությունները ԵԽ-ում եւ ի՞նչ ազդեցության տակ են նրանք: Եթե մի ժամանակ խոսում էինք ինչ-որ շահագրգռվածության մասին, հիմա, այնքան են այդ անձինք լոբբինգի մեջ խորացել, որ զինվորական կարգապահությամբ կատարում են այն ամենն, ինչ-որ Բաքվից իրենց հրահանգվում է: Հիմա ԵԽ-ում ունենք նոր որակ: Եթե Ադրբեջանի օգտին ինչ-որ քվեարկություն է սպասվում, բոլորը մեկ հրահանգով ներկայանում են այնքան, որ անգամ նստելու տեղ չի լինում»,- եզրափակեց Արմեն Ռուստամյանը: Այս պարագայում ի՞նչ պիտի անի Հայաստանը`հարցի մասին, մեր զրուցակիցն ասաց, որ մեկ այլ անգամ կխոսի այդ մասին:

Նելլի ԳՐԻԳՈՐՅԱՆ

aravot.am

Հայկական բանակը Ադրբեջանին պարտադրեց գնալ բանակցությունների

Ազգային ժողովի ՀՅԴ խմբակցության ղեկավար Արմեն Ռուստամյանը գտնում է, որ Հայաստանի և Ադրբեջանի նախագահների հանդիպումներն ավելի լավ են, քան պատերազմները, սակայն այդ հանդիպումներից մեծ ակնկալիքներ չունի: Ազգային ժողովում լրագրողների հետ զրույցում ՀՅԴ խմբակցության ղեկավարը նշեց, որ քանի դեռ Ադրբեջանը չի փոխել իր սադրիչ քաղաքականությունը, և շատ հարցերում ուղղակի հնարավոր չէ այդ երկրի հետ համաձայնության հասնել, այդ հանդիպումներից մեծ ակնկալիքներ չունի: «Ինչպե՞ս կարելի է բանակցել մի կողմի հետ, որը բացարձակապես չի պատկերացնում՝ իր զիջումները որոնք պիտի լինեն։ Այն, ինչ Ադրբեջանը ներկայացնում է, դա միակողմանի զիջումներ է ենթադրում հայկական կողմից: Եթե մի ձեռքով բանակցությունների մեջ ես, մյուս ձեռքով՝ պատերազմի դաշտում, սա չի կարող համարվել նորմալ գործընթաց»,- «Արմենպրես»-ի հաղորդմամբ՝ ասաց Ռուստամյանը։

Պատգամավորը կարծում է, որ Սարգսյան-Ալիև հանդիպումը չէր կարող Պուտինի հետ հանդիպմամբ սահմանափակվել, քանզի մանդատը մեկն է՝ եռանախագահներ կան, և այդ եռանախագահների մանդատը չի կարող փոխվել որևէ այլ ձևաչափով։ «Եվ կարծում եմ, որ դրա պատճառով է, որ այդ հանդիպմանը հետևել է նաև հանդիպումը Ջոն Քերիի հետ, և չեմ բացառում, որ լինի նաև հանդիպում ֆրանսիական կողմի հետ, որը նորմալ եմ համարում»,- պարզաբանեց Ռուստամյանը:

Հարցին, թե արդյոք որևէ դինամիկա տեսնու՞մ է այս հանդիպումներում, Արմեն Ռուստամյանը պատասխանեց, որ իր կարծիքով՝ դինամիկան պարտադրել է հայկական բանակը, երբ հետ է մղել հակառակորդի լայն ճակատով հարձակումները։ Ըստ Ռուստամյանի՝ սա ստիպեց ադրբեջանական կողմին նորից գալ բանակցությունների

armenpress.am

ՀՅԴ-ն ոչ մեկի հետ կոալիցիա կազմելու խնդիր չի դրել

ՀՅԴ-ն ոչ մեկի հետ կոալիցիա կազմելու խնդիր չի դրել։ Այս մասին լրագրողների հետ զրույցում ասաց Ազգային ժողովի «Հայ Յեղափոխական Դաշնակցություն» խմբակցության ղեկավար Արմեն Ռուստամյանը։

Նա նշեց, որ Դաշնակցությունը խորհրդարանական համակարգին կողմ է եղել և իրենք պատրաստ են համագործակցել բոլոր նրանց հետ, ովքեր կընդունեն իրենց տեսակետները։ «Եթե ուզում եք խորհրդարանական համակարգի անցնել, անհնար է դա կատարել առանց Սահմանադրական փոփոխությունների»,-ասաց նա։ Անդրադառնալով ներքաղաքական խնդիրներին՝ մասնավորապես քառյակի հնարավոր պառակտմանը՝ պատգամավորը նշեց, թե միությունը քառյակ է այնքանով, քանի համաձայն է 4 քաղաքական ուժ, իսկ եթե 4 քաղաքական ուժ համաձայն չէ ինչ-որ բանի հետ, մնացած բոլոր հարցերում ազատ են տնօրինելու իրենց քաղաքականությունը։

-Ի՞նչ կասեք վերջերս շրջանառվող այն խոսակցությունների մասին, որ Դաշնակցությունը հնարավոր է կոալիցիա կազմի իշխանությունների հետ։

-ՀՅԴ-ն ոչ մեկի հետ կոալիցիա կազմելու խնդիր չի դրել, այդ նույն հարցը տալիս էին, երբ յոթ կետերն էինք ներկայացնում։ Այն ժամանակ էլ ասացին, որ ՀՅԴ-ն ցանկանում է կոալիցիա կազմել, սակայն մենք մեր տեսակետները ունենք, որոնք արտահայտել ենք 20, 25 տարի և շարունակում ենք դրանք պաշտպանել։ Հիմա, եթե այդ տեսակետներից որևէ մեկը պաշտպանվում է, մենք համարում ենք, որ դա դրական գործընթաց է, և անկախ նրանից, թե ով է դա ընդունում, մենք պատրաստ ենք համագործակցել, որպեսզի այդ տեսակետը և բարեփոխման ուղղությունը մինչև վերջ իր նպատակին հասնի։ Ո՞ւմ համար է նորություն, որ Դաշնակցությունը խորհրդարանական համակարգին է կողմ եղել։ Այսօրվա քաղաքական դաշտում, բացի ՀԱԿ-ից թերևս, եթե հիշենք, որ ՀՀՇ-ն դեմ էր, մնացած բոլորը արտահայտվել են խորհրդարանական համակարգին կողմ, այդ թվում՝ ՀՀԿ-ն, որովհետև վեցյակի նախագծում կար նաև ՀՀԿ-ն։ Եթե նրանք մի բան ասում են, իսկ հետո որոշակի պայմանների բերումով կարող են հրաժարվել դրանից, դա Դաշնակցությանը բացարձակապես չի կարող առնչվել, որովհետև դաշնակցությունը սկզբունքային քաղաքականություն վարող և գաղափարական հիմքի վրա ձևավորված կուսակցություն է։ Այլ բան, թե նրանք մեր առաջարկած մոտեցումների հիման վրա առաջարկ չբերեն, եթե դրա հիման վրա նախագիծ չբերեն, մենք ինքնանպատակ կհամարենք սահմանադրական փոփոխությունները։ Սակայն, եթե դեռ նախագիծը բացարձակապես չկա, ընդհանրապես խոսել նախագծին դեմ լինելու մասին, դա անհասկանալի է։ Մեզ ասում են՝ դուք էլ կողմ եք՝չտեսնելով նախագիծը։ Սակայն մենք ասում ենք շատ պարզ բան, եթե ուզում եք խորհրդարանական համակարգի անցնել, անհնար է դա կատարել առանց սահմանադրական փոփոխությունների։ Մենք դրա համար ենք սահմանադրական փոփոխություններին կողմ, ոչ թե կողմ ենք ինքնանպատակ։ Չենք կարող չէ՞ կողմ չլինել սահմանադրական փոփոխություններին, եթե ցանկանում ենք, որ համակարգը փոխվի։ Սա է մեր մոտեցումը, և ես կարծում եմ, որ այդ մոտեցումը մոտ ժամանակներս կքննարկեն քառյակի մեր գործընկերների հետ և իրենց համար սա նորություն չէ։

-Պարո՛ն Ռուստամյան, հաշվի առնելով առանցքային հարցերում քառյակում առկա տարակարծությունները (սահմանադրական փոփոխություններ, «կուտակային»-ի հարցով ՍԴ դիմել- չդիմելու հարց և այլն), հնարավո՞ր է, որ քառյակն ամեն դեպքում բաժանվի, չհաշված գաղափարական տարբեր մոտեցումները։

-Նայած, թե ով ինչ է պատկերացրել քառյակ ասվածը, մենք ի սկզբանե նույնն ենք ասել և կրկնում ենք։ Ես բազմիցս եմ հայտարարել՝ քառյակ է այնքանով, քանի համաձայն են 4 քաղաքական ուժ։ Եթե չորս քաղաքական ուժ համաձայն չեն ինչ-որ բանի հետ, մնացած բոլոր հարցերում ազատ են տնօրինելու իրենց քաղաքականությունը, և այդ կուսակցությունները նույնացված չեն։ Մենք էլի պատրաստ ենք, նույն քառյակով կլինի, թե այլ ձևաչափով կլինի, շարունակել այն քայլերը կատարել, որոնք համաձայնեցված են և համատեղ են։ Քառյակը, կարելի է ասել, վեցյակ եղավ, երբ գնացինք սահմանները։ Հիմա ի՞նչ, չգնայի՞նք, որովհետև քառյակ էր, և պետք է քառյակն առանձի՞ն գնար, մյուսներն՝ առանձի՞ն։ Շատ ուրախ ենք, որ վեցն էլ միասին են գնացել, և առաջին հերթին ժողովուրդն է շատ ուրախ, որ սահմանի վրա կանգնած մեր բնակիչը տեսավ, որ այս հարցում բոլորը միակամ են, և այստեղ ընդդիմություն և իշխանություն չկա։ Սա է ճիշտ մոտեցումը և տրամաբանությունը, և սրանով մենք առաջնորդվելու ենք։ Ինքնանպատակ կոալիցիա կազմելու խնդիր երբեք չի ունեցել Դաշնակցությունը, եթե այդպես լիներ, կոալիցիայից դուրս չէր գա։

-Կարո՞ղ ենք ամփոփել, որ «թեժ» աշունը հետաձգվում է։

-Ինչու սա թեժ չէ՞։

-Բայց քառյակն ավելի «թեժ» էր նախատեսում։

-Ավելի թեժ ասվածը ո՞րն է, շատ էլ թեժ է։ Եթե թեժությունը նրանով է պայմանավորված, որ անպայման փողոցներում ընդհարումներ լինեն, ապա դա երևի ուրիշ տեղ պետք է փնտրել։ Ես կարծում եմ, որ թեժ է լինելու, որովհետև բանավեճերը լուրջ ուղղություն և խորություն են ստանում։

-Պարո՛ն Ռուստամյան վերջին օրերին շատ է խոսվում երկրորդ Նախագահի վերադարձի մասին, Դուք ինչպես կվերաբերվեք, եթե նա որոշի վերադառնալ։

– Ես որևէ մեկի վերադարձին դեմ չեմ, ինչո՞ւ են հեռացել, որ հիմա էլ վերադառնան։ Թող միշտ էլ լինեն քաղաքական դաշտում և իրենց փորձը, գիտելիքները ի նպաստ բերեն մեր երկրի ժողովրդի համար։

-Իսկ հնարավո՞ր է՝ Դաշնակցությունը սատարի նրան։

-Դաշնակցությունը սատարելու է իր մոտեցումները։ Սա է ամբողջ խնդիրը, որ երբ մենք մեր մոտեցումներով ենք ներկայանում, ասում ենք՝ երկրորդական է անձը, ասում են, որ դուք դա արել եք, որպեսզի մտնեք կոալիցիա կամ սրան կամ նրան պաշտպանելու համար եք դա մտածել։ Բայց մենք դա նոր չեն ասում, 20– 25 տարի է նույն բան ենք ասում, իսկ եթե դրան դեմ են, մենք ոչ մեկին էլ չենք պաշտպանում։ Ինձ համար օրինակ ի՞նչ տարբերություն, որ այսօր այն քաղաքական ուժերը, որոնք որ մեր յոթ կետերը չեն ընդունում՝ ասում են, որ քանի մենք ընդդիմության մեջ ենք, եկեք իրար հետ սերտ համագործակցենք։ Հա լավ, սերտ համագործակցենք, որ ի՞նչ, որ մեկը գա՝ դառնա նախագահ, ու հիմա էլ իրենի՞ց պահանջենք, որ անցնենք խորհրդարանական համակարգի, թե՞ այն բանաձևն են ուզում կիրառեն, որ մենք գանք, հետո անենք։ Դա նմանվում է նրան, որ թողեք, մի քիչ ես նստեմ այս աթոռին, հետո հանեք այս աթոռը։

-Ռոբերտ Քոչարյանի հարցազրույցից հետո շատերը համարեցին, որ կարծես իր քարոզարշավն է սկսել, դո՞ւք ինչ եք կարծում այդ մասին։

-Դե հիմա, գիտեք, ես որևէ մեկի քարոզարշավի մասին չեմ ցանկանում խոսել, հիմա ես հարցազրույց եմ տալիս կարող է մեկը գնահատել, որ ես էլ մեր քարոզարշավն եմ սկսել։ Քաղաքական գործունեությունը ենթադրում է ինչ-որ մի ակտիվություն, և դա պետք չէ պիտակավորել մեզ ծանոթ ձևերով՝ հենց ակտիվ դարձավ, ուրեմն քարոզարշավ է սկսել։ Ես էլ ասում եմ՝ միշտ պետք է ակտիվ լինեն և դա պետք է, որպեսզի բանավեճերը լինեն ավելի խորքային և ընդլայնված ծավալով։

tert.am