Ինչո՞ւ է Դաշնակցությունը գրավում Արցախը


«Առաջին լրատվական»-ի հետ հարցարույցում, ՀՅԴ Գերագույն մարմնի ներկայացուցիչ, ԱԺ ՀՅԴ խմբակցության ղեկավար Արմեն Ռուստամյանը հերքեց, թե դաշնակցությունն այսօր գրավում է Արցախը, որպեսզի այնտեղից իշխանության գա Հայաստանում: Ինչպես հայտնի է, վերջին տարիներին Արցախից են իշխանության գալիս Հայաստանում: Իսկ Հայաստանում շարունակվում է ձերբակալությունների թեման. քննարկումներ են գնում, թե ովքեր կարող են հաջորդել Խաչիկյանին և որ ոլորտում ձերբակալություններ կլինեն: Հայտնի է նաև, որ Վերահսկիչ պալատը ժամանակին աղաղակող բացահայտումներ արեց դաշնակցական նախարարների ղեկավարած ոլորտներում` գյուղատնտեսության, կրթության և սոցապ նախարարություններում:

– Պարոն Ռուստամյան, հայտնի է, որ Վազգեն Խաչիկյանի դեմ գործ հարուցվեց Վերահսկիչ պալատի բացահայտումների հիման վրա: ՎՊ-ն ժամանակին բացահայտումներ էր արել դաշնակցական նախարարների ղեկավարած ոլորտներում: Հնարավոր չե՞ք համարում, որ դաշնակցականների դեմ գործեր հարուցվեն:

– Ո՛չ, ես բացառում են նմանատիպ բաները, որովհետև եթե դաշնակցականների դեմ 0.1 տասնորդական տոկոս հնարավորություն ունենան գործ ներկայացնելու, անպայման կներկայացնեն: Մեր պատմությունն էտ է ցույց տվել: Բան չունենալով են մեզ մեղադրում, բա որ բան ունենան, ոնց չեն մեղադրի:

– Իսկ Վերահսկիչ պալատի այդ բացահայտումների առթիվ ի՞նչ կասեք:

– Վերահսկիչ պալատի բացահայտումների մասին մենք բազմիցս խոսել ենք: Վերահսկիչ պալատը լիարժեք չի կարող աշխատել, բացահայտումներն էլ չեն կարող դիտվել ամբողջական, քանի այդ Վերահսկիչ պալատում ընդդիմությունը չունենա քվոտա, ներկայություն, որ բալանսավորվեն ՎՊ բոլոր որոշումները, չլինեն ընտրովի, չլինեն պատիժները հասցեավորված, այլ լինի Վերահսկիչ պալատի կարգավիճակին համապատասխան լիարժեք գործունեություն: Սա չի կարող տեղի ունենալ, եթե այնտեղ իշխող կուսակցությունն է թելադրողը:

– Սակայն եթե այսօր իշխող կուսակցության ներկայացուցչին` Վազգեն Խաչիկյանին են ձերբակալում, ապա իշխանության մաս չհանդիսացող կուսակցության ներկայացուցչի հարցում, կարծում եք, խնդիր կլինի՞:

– Բա ո՞ւմ ձերբակալեն, իրենք են: Եթե մարդ պիտի ձերբակալեն, իրենք են: Այդ դաշտում որևէ այլ մարդ չկա: Մարդ չի մնացել ուրիշ: Իշխող կուսակցությունն է ամեն տեղ: Եթե ինչ-որ բանով պիտի այդ մարմինը զբաղվի, եթե ընդհանրապես պիտի ձերբակալություններ լինեն, իրենց պիտի ձերբակալեն, բա ո՞ւմ պիտի ձերբակալեն:

– Ասել է թե` մտավախություն չունե՞ք, որ դաշնակցականների հանդեպ որևէ բան կլինի:

– Ո՛չ:

– Պարոն Ռուստամյան, Վարդան Օսկանյանին անձեռնմխելիությունից զրկելու միջնորդության քննարկումից հետո ԱԺ-ն քննարկելու է բյուջեի կատարողականը, ՀՅԴ-ն ինչպե՞ս է քվեարկելու:

– Մենք դեմ ենք քվեարկելու, բայց քննարկելու ենք, որովհետև էդ ամեն ինչը իր կարգն ունի: Կառավարության վերաբերյալ մենք մեր տեսակետը հստակ հայտնել ենք: Կառավարության ծրագրի, նրա գործունեության: Մենք, բնականաբար, մեր քննադատությունն ու դժգոհությունը ամբողջական տեքստով հրապարակել ենք: Մեզ չի բավարարում այն ձևը, մեթոդները, եղանակները, որով որ կառավարությունը գործում է:

– Ձեր կարծիքով` վարչապետի փոփոխություն անհրաժե՞շտ է:

– Կառավարության փոփոխություն է անհրաժեշտ, մեր կարծիքով, ամբողջական փոփոխություն և համակարգի փոփոխություն, որ մենք ունենանք մեր ուզած երկիրը:

– Փաստորեն, ՀՅԴ-ն Հայաստանում դեմ է կառավարությանը և ուզում է իշխանափոխության հասնել, իսկ Ղարաբաղում կողմ է կառավարությանը և փոխվարչապետի պաշտոն է վերցրել:

– Տարբեր պետություններ են: Լեռնային Ղարաբաղի Հանրապետությունում այլ իրավիճակ է, Հայաստանում այլ իրավիճակ է: Երկու տարբեր պետությունների մասին ենք խոսում:

– Ասել է թե` այնտեղ փոխվարչապետի պաշտոն վերցնելը ընդդիմադիր ուժի համար նորմա՞լ եք համարում:

– Ընդդիմադիր չի այնտեղ ՀՅԴ-ն: Էս է ամբողջ հարցը: Դաշնակցությունը ԼՂՀ-ում ընդդիմադիր չի, պաշտպանել է Բակո Սահակյանի թեկնածությունը:

– Իսկ հնարավո՞ր է այլ դաշնակցականներ ևս այնտեղ պաշտոններ ստանան, օրինակ` Դուք կամ որևէ մեկը:

– Ես ոչ, որևէ այլ մեկը կլինի, թե ոչ` կտեսնենք, չգիտեմ: Դա էնտեղ հարցրեք, մենք ունենք Կենտրոնական կոմիտե ԼՂ-ում: …Արթուր Աղաբեկյանն էնտեղից եկավ, հետո գնաց: Նա ծնվել, մեծացել է Հադրութում: Հիմա էլ էնտեղ է շարունակում գործել, տնտեսության մեջ շատ լուրջ ներդրումներ է արել:

– Գիտենք, որ բիզնեսներ ունի Ղարաբաղում:

– Այո՛, թող էտ բիզնես ունեցող ղարաբաղցիները գնան, էնտեղ դնեն այդ բիզնեսը: Արթուրը էն մարդն է, որ լինելով ղարաբաղցի, իր երկրում է բիզնեսները զարգացնում: (Նկատենք, որ Արթուր Աղաբեկյանը ԱԺ պատգամավոր էր, իսկ դրանից առաջ` ՊՆ փոխնախարար.- Մ. Խ.):

– Իսկ այստեղի դաշնակցության իմիջին որևէ կերպ չի՞ հարվածում, որ Ձեր ներկայացուցիչը կառավարության պատասխանատու է դառնում ԼՂ-ում:

– Մենք ապակենտրոն կառույց ենք: Հայաստանում` ընդդիմություն ենք, ԼՂ-ում իշխանության հետ համագործակցող կուսակցություն է, պաշտպանել է գործող նախագահին: Սիրիայում այլ վիճակ է, Պարսկաստանում` այլ, Ֆրանսիայում` այլ: Ամեն տեղ գործելու իր ձևն ու չափը որոշում է տեղի Կենտրոնական կոմիտեն, ինչն այս դեպքում կատարում է Արցախի Կենտրոնական կոմիտեն:

– Իսկ հնարավո՞ր է` հասկացել եք, որ Հայաստանում Ղարաբաղից են իշխանության գալիս, դրա համար էնտեղ դառնում եք իշխանություն, որ էստեղ գա՞ք:

– Ո՛չ: Մենք իշխանության գալիս ենք ամեն երկրում տվյալ երկրի պայմաններին համապատասխան:

«Առաջին լրատվական»

Տպել Տպել